UYOBHI 10

Ngoko ndiya kuyivulela inkalazo yam phakathi kwam;

Ndithèthe, úkrakra umphefumlo wam;

₂Ndíthi kuThixo, Musa ukundigweba;

Ndazíse ukuba ubambene nam ngani na?

₃Kulungile na kuwe ukuba ucudise,

Ukuba ucekise ukuxelenga kwezandla zakho,

Ulibengezelele iqhinga labangendawo?

₄Ùnamehlo enyama na?

Ùbona ngokubona komntu na?

₅Injengemihla yomntu na imihla yakho,

Iminyaka yakho injengemihla yomfo na;

₆Ukuba nje ubufune ubugwenxa bam,

Usingxoke isono sam,

₇Usazi nje ukuba andingongendawo,

Nokuba akukho unokuhlangula esandleni sakho?

₈Izandla zakho zindiyilile, zandenza

Ndonke, ngeenxa zonke; ùyandiginya noko.

₉Khawukhumbule, ukuba undenzé ngokodongwe;

Ke undibuyisa undise eluthulini!

₁₀Akundithululanga na njengamasi,

Wandivuthisa njengengqaka?

₁₁Wandambesa ngolùsu nenyama,

Wandiphingela ngamathambo nemisipha.

₁₂Ùndenzele ubomi nenceba,

Nokuvelela kwakho kwawugcina umoya wam.

₁₃Ezi zinto ke wazigusha entliziyweni yakho;

Ndiyazi ukuba ubunale ndawo yokuthi:

₁₄Ukuba ndithe ndona, wòndibamba undilinde,

Ungandenzi msulwa ebugwenxeni bam.

₁₅Ukuba ndithe ndaba ngongendawo, athi ke mna!

Ukuba ndithe ndaba lilungisa, ndingàyiphakamisi intloko yam:

Ndihlúthi kukucukucezwa,

Nakukubona iintsizi zam.

₁₆Nokuba ithe yaziphakamisa intloko yam, wòndizingela njengengonyama,

Úbuye wenze ngokubalulekileyo kum;

₁₇Úhlaziye amangqina akho phambi kwam;

Úyandise ingqumbo yakho kum,

Ibe kukukhululana kwemikhosi eza kum.

₁₈Ibiyini na ke ukuba undikhuphe esizalweni?

Ngendaphuma umphefumlo, andabonwa liso,

₁₉Ndanga andibangakho,

Ngendasuswa esizalweni, ndasiwa engcwabeni.

₂₀Àyimbalwa na imihla yam? Makayeke,

Adede kum, ndikhe ndincumeze kancinane,

₂₁Phambi kokuba ndihambe, ndingabi sabuya,

Ndiye ezweni lobumnyama nelethunzi lokufa,

₂₂Ezweni elisongelwe bubumnyama njengesithokothoko,

Lethunzi lokufa nelesidubedube,

Elinkazimlo injengesithokothoko.