U‐Yisaya 16

₁Tumani imvana kumpati welizwe, kutabata e‐Sela kude kube sentlango, entabeni yentombi yase‐Ziyone. ₂Ngokuba kuya kuti, njengentaka ebadulayo, eku̔tshiweyo endlwini yayo, intombi zase‐Mowabi zoba njalo emazibukweni ase‐Arenone, zisiti: ₃Nikani icebo; yenzani ukwahlula; beka isitunzi sako njengobusuku pakati kwemini enkulu; fihla abagxotiweyo; osabileyo ungamtyili. ₄Mabapambukele kuwe abagxotiweyo base‐Mowabi; ube yindawo yokufihlela kubo ebusweni bomfaci: ngokuba umbandezeli eya kupela, ukufaca kuya kugqitywa, abo basinyatelayo bobujiswa elizweni. ₅Kukona iterone iya kuqiniswa ngobubele; kwakuya kuhlala pezu kwayo ngenyaniso, ententeni ka‐Davide, umgwebi, ofuna ubugwebo, onxamela ubulungisa.

₆Sivile ir̔atshi lika‐Mowabi, (uner̔atshi kakulu,) ukuzidla kwake, nokuqanqalaza kwake, nokukukumala kwake: ziyinto engendawo ilwimi zake. ₇Ngako oko i‐Mowabi yolilela i‐Mowabi, yona yonke iya kulila; ngenxa yemisekelo ye‐Kire‐haresete niya kuncwina, nikedamile kanye. ₈Ngokuba amasimi ase‐Heshebone ebunile; umti weveyine wase‐Sibama inkosi zezizwe zapule amasebe awo adumileyo; afikelela e‐Yahezere; alahlekela entlango; amahlumelo awo azandlele, agqitela elwandle. ₉Ngako oko ndiya kulilela umti weveyine wase‐Sibama ngokulila kwabase‐Yahezere; ndokunyela ngenyembezi zam, Heshebone, ne‐Elehale! ngokuba pezu kweziqa̔mo zehlobo zako napezu kwokuvuna kwako umemezo lwokulwa luwile. ₁₀Kususiwe uvuyo nomgcobo entsimini ecu̔mileyo; nasemiyezweni akuko ukucula, akuko ukudanduluka; umxovuli akaxovuleli iveyine ezincinezelweni; umemezo lwokuvuya ndilupelisile. ₁₁Ngako oko amatumbu am ohlokoma njengohadi ngenxa ye‐Mowabi, nombilini wam ngenxa ye‐Kire‐harese. ₁₂Kwakuya kuti, okuya abonakele u‐Mowabi, okuya uzidinisile pezu kwendawo epakamileyo, waza wangena endaweni eyingcwele yake ukutandaza, akayi kweyisa noko.

₁₃Eli lilizwi elitetiweyo nguyehova ngo‐Mowabi kudala; ₁₄kodwa kaloku uyehova utetile ngokuti: Pakati kweminyaka mitatu, njengeminyaka yomqashwa, ababungcwalisa bakwa‐Mowabi baya kudelwa, kunye nabo bonke abasihlwele esikulu; nesisalela sona soba sincinane kunene, singenamandla.