U‐Yisaya 15

₁UMGWEBO nge‐Mowabi.

Ngenyaniso ngobusuku bokucitakaliswa, i‐Hari yase‐Mowabi ibujisiwe; ngenyaniso ngobusuku bokucitakaliswa, i‐Kire yase‐Mowabi ibujisiwe. ₂Benyukele etempileni, nase‐Dibone, ezindaweni ezipakamileyo, ukuya kulila; pezu kwe‐Nebo napezu kwe‐Medeba o‐Mowabi bayenza isijwili: kuzo zonke intloko zabo kuko ubunqai; zonke indevu zinqunyulwe. ₃Ezitarateni zabo babinqile ngentlakantlaka; pezu kwezindlu zabo, nasezindaweni ezibanzi zabo, bayenza isijwili bonke, besihla belila. ₄I‐Heshebone iyakala, kwa ne‐Elehale; kude kwase‐Yahetsa liviwe ilizwi labo; ngako oko abaxo̔bileyo bakwa‐Mowabi bayadanduluka: umpefumlo wake uyatutumela pakati kwake. ₅Intliziyo yam iyakala ngenxa ye‐Mowabi; abasabi bayo bayasabela e‐Tsohare, njengetokazi eliminyaka mitatu; ngokuba benyuka ngeqina lase‐Luhiti, belila; ngokuba endleleni yase‐Horonayime bevusa isikalo sentshabalalo. ₆Ngokuba amanzi ase‐Nimra eyingcitakalo; ngokuba inca ibunile, utyani bupelile, uhlaza lungaseko. ₇Ngako oko ubuninzi babuqwebileyo, nembekelo yabo, bobututela pesheya kwomlanjana weminculuba. ₈Ngokuba isikalo sizungulezela imida yase‐Mowabi; kude kube se‐Egelayime ukulila kwayo, ewe, kude kube se‐Bere‐elime ukulila kwayo. ₉Nangona amanzi ase‐Dimone azele ligazi, ndiya kupinda noko ukubeka pezu kwe‐Dimone ingozi; ndiya kuzisa pezu kwabasindileyo base‐Mowabi ingonyama, kwa pezu kwabaseleyo elizweni.