Umshumayeli 1

₁AMAZWI omshumayeli, unyana ka‐Davide, ukumkani e‐Yerusaleme.

₂Okungendawo kwokungendawo, utsho umshumayeli, okungendawo kwokungendawo; konke kokungendawo. ₃Unenzuzo yanina umntu ngawo wonke umzamo wake azama ngawo ngapantsi kwelanga? ₄Esinye isizukulwana siyemka, nesinye isizukulwana siyeza; kodwa umhlaba umi kude kube ngunapakade. ₅Ilanga nalo liyapuma, ilanga kanjalo liyatshona, linxamela endaweni yalo apo lipuma kona. ₆Umoya uya ngasesuyide, uyajikela ngasenode; uyamana uzunguleza, uze umoya ubuyele kuzo injikelezelo zawo. ₇Yonke imilambo iya elwandle; ulwandle aluzele noko; londawo imilambo iya kuyo, ibuya iye kona kanjako. ₈Onke amazwi anokudinwa; uti umntu akohlwe kuwateta; iliso alincanyiswa kukubona, nendlebe ayizaliswa kukuva. ₉Lonto ebise iko, yileyo esaya kubako; naleyo ese yenziwe, yileyo esaya kwenziwa: akuko nanto entsha ngapantsi kwelanga. ₁₀Kuko into na ekungatiwa ngayo: Bona ke, yinto entsha le? Ibise iko kade, ngamaxesha akudala abepambili kuti. ₁₁Akuko inkunjulwa yezinto zamatanci; kanjalo nezinto zasemva eziza kubako, akuyi kubako inkunjulwa yazo pakati kwabo abaya kuza mva.

₁₂MNA, mshumayeli, bendingukumkani pezu kwo‐Sirayeli e‐Yerusaleme. ₁₃Ndaza ndanikela intliziyo yam ukufuna nokupanda ngobulumko konke okwenziwayo ngapantsi kwezulu: lomsebenzi onzima utixo uwunikile konyana babantu, ukuba bazisebenzise ngawo.

₁₄Ndagqala yonke imisebenzi eyenziwayo ngapantsi kwelanga; kekaloku bona ke, yonke ikokungendawo nokukatazeka kwomoya. ₁₅Okugotyiweyo akungelungiswe; nokuswelekileyo akungebalwe.

₁₆Ndateta nentliziyo yam, ndisiti: Mna, bona ke, ndandisile kakulu ubulumko ngapezu kwabo bonke abebeko pambili kum pezu kwe‐Yerusaleme; ewe, intliziyo yam ikolisile ukugqala ubulumko nokwazi. ₁₇Ndaza ndanikela intliziyo yam ukwazi ubulumko, nokwazi ubugeza nobudenge: ndaqonda ukuba oku nako kukukatazeka kwomoya. ₁₈Ngokuba ebuninzini bobulumko kuko ubuninzi benkatazo; nalowo owandisayo ukwazi, uyandisa ubuhlungu.