SIRAKHA 26

₁Mashudu munna

wa mufumakadzi muvhuya,

maḓuvha a vhutshilo hawe a ḓo lapfiswa luvhili.

₂Mufumakadzi a fulufhedzeaho u takadza munna wawe,

u ḓo tshila nga mulalo, a lalama.

₃Musadzisadzi ndi one mashudu;

u ṋewa ane a ofha Muṋe washu.

₄Arali vho pfuma kana vhe vhashai,

mbilu dzavho dzo rula,

zwifhaṱuwo zwavho zwi dzula zwo takala.

₅Hu na zwiraru zwine nda zwi tetemela,

tsha vhuṋa ndi a tshi ofha:

Ndi u iselwa phungo nga muḓi woṱhe,

ndi u thathedzwa nga gogo,

ndi u pomokiwa zwi si zwone;

ndi khwiṋe wo ḓifela!

₆Hone musadzi a no vhivha muṅwe u u ḽisa mbilu, wa ṱungufhala,

vhoṱhe vha pfa vhuṱungu ha ṱhamu ya lulimi lwavho.

₇Mufumakadzi muvhi ndi dzhogo i gogonaho;

u mu laya zwi nga u fara phephenu nga tshanḓa.

₈Mufumakadzi a no kambiwa,

muṅwe na muṅwe a nga mu fhelela mbilu,

ha shoni.

₉Mufumakadzi o bvaho mvumbo u vhonala nga tshiṱale tshawe

na tsie dzawe dzi kungaho vhanna.

₁₀ṅwananyana wa tshipimbi u dzule wo mu vhea ḽiṱo,

a sa ḓo wana kubuli a ita zwine a funa.

₁₁Mu sedzese arali e na tshiṱale;

u songo kanuka arali a u shonisa.

₁₂U nga mutshimbili a na ḓora

a tshi sokou vula mulomo

a nwa maḓi afhio na afhio ane a a wana;

u sokou dzula fhasi

phanḓa ha dennde iṅwe na iṅwe,

a vula mukutu wawe,

musevhe muṅwe na muṅwe wa dzhena.

₁₃Musadzi a huliseaho u takadza munna wawe,

ṱhalukanyo yawe i khwaṱhisa munna wawe.

₁₄Musadzi a si na luambo

ndi tshifhiwa tsha Muṋe washu,

u ḓifara hawe ndi ha mutengo muhulu.

₁₅Mufumakadzi a sa ḓihudzi ndi mashudushudu,

a hu na mutengo

u no eḓana na u fulufhedzea hawe.

₁₆Lunako lwa mufumakadzi muvhuya

muṱani wo dzudzanywaho zwavhuḓi

lu nga ḓuvha ḽi tshi tsha

ḽa vhonetshela thavha dza Muṋe washu.

₁₇Musadzi wa tshifhaṱuwo tsho nakaho o vhumbeaho zwavhuḓi,

u nga luvhone lwo vhewaho kha tshivheambone tshikhethwa.

₁₈Milenzhe yo vhumbeaho zwavhuḓi na ṋayo dzi sa dzinginyei

zwi nga phuphu dza musuku dzi nṱha ha muteo wa siliva.

₁₉Hu na zwivhili zwine zwa nndyisa mbilu

tsha vhuraru tshi a ntsinyusa:

Ndi muhali wa nndwa a tshi ṋoka nga vhushai,

na munna wa vhuṱali a tshi nyadziwa,

na muvhuya a tshi shanduka a vha muvhi;

onoyo, Muṋe washu u ḓo mu ṱuṱulela pfumo.

₂₀Mushavhi u sa khakha zwi mu konḓela hani!

Muvhambadzi a nga si pfi ha tshinyi.