SIRAKHA 25

₁Nṋe ndi takadzwa

nga zwithu zwiraru,

zwine zwa takadza Muṋe washu na vhathu:

Ndi u anḓana ha vhana vha munna,

na u konana ha vhadzulelani,

na u funana ha munna na mufumakadzi.

₂Ndi vhenga vhathu vha tshakha tharu,

vhukuma ndi ri vha songo vhuya vha vha hone:

Mushai a no ḓihudza,

mupfumi wa mazwifhi,

na tsilu ḽi sa fhiri musadzi naho ḽo no kalaha.

₃Arali wo kundwa u vhulunga vhuṱali hanani hau,

u ḓo vhu wana wo no vha wa maḓuvha naa?

₄Vho tshenaho ṱhoho ṱhalukanyo yo vha fanela hani;

na vho no vhaho vha maḓuvha vha na nyeletshedzo yavhuḓi.

₅Vhuṱali ha vho no vhaho vha maḓuvha vhu takadza hani,

na ndayo ya vhusedzi ha vhahulisea!

₆Muṅene wa vhakalaha ndi u vha na nḓivho,

u ofha Muṋe washu ndi hone vhugala havho.

₇Hu na vhaṱanu na vhaṋa vhane nda vhona vhe na mashudu,

wa vhufumi ndi ane nda mu bula:

Ndi munna a no takadzwa nga vhana vhawe,

na ane a tshila a vhona maswina awe a tshi kundiwa.

₈Mashudu munna

a no dzula na mufumakadzi wa ṱhalukanyo,

a sa ngi donngi yo paniwa na phulu.

Mashudu munna a sa tshinyi nga lulimi lwawe,

na a sa shumeli tshitshakaṱi tshine ene a fanela u tshi nyadza.

₉Mashudu we a wana ṱhalukanyo,

na a no amba na vhathu vha mu thetshelesaho.

₁₀Vhukuma a no wana vhuṱali ndi muhulwane,

hone a no ofha Muṋe washu u vha fhira vhoṱhe.

₁₁U ofha Muṋe washu hu fhira zwoṱhe;

a no kona zwenezwo u vhambedzwa na nnyi?

₁₃A hu na mbonzhe i vhavhaho sa ya mbilu;

a hu na fonyolodzi ḽi no nga ḽa musadzi.

₁₄A hu na khombo i no nga ye wa ṱulelwa nga ane a u vhenga;

a hu na ndifhedzo i vhavhaho sa ya swina.

₁₅A hu na vhuṱungu vhu no fhira ha ṋowa;

a hu na mbiti dzi fhiraho dza swina.

₁₆Ndi nga ḓidzulela zwanga na ḓiragoni kana ndau,

u fhira u dzula na musadzi wa fonyolodzi.

₁₇Fonyolodzi ḽi shandukisa tshifhaṱuwo tsha musadzi,

a vhonala o sinyalala unga biara.

₁₈Musi munna wawe o dzula zwiḽiwani na vhadzulelani vhawe,

u sokou dzula a tshi fhihamelwa nga dikitela.

₁₉A hu na fonyolodzi ḽi no nga ḽa musadzi;

nga a wane mukovhe wa mutshinyi!

₂₀Musadzi wa luambo a no dzula na munna o vuḓaho

zwi nga mukalaha

a tshi gonya tshivhanga tsha muṱavha.

₂₁U songo tswiwa mbilu nga lunako lwa musadzi;

u songo sokou funa musadzi ú si na nzhele.

₂₂Hune musadzi a ṱunḓela munna wawe u mu ḽela vhuhali,

a mu nyadza, a mu shonisa.

₂₃Musadzi wa fonyolodzi u dzula o rubulusa mulomo,

a tshi sinyalala, a tshi ḽa mbilu.

Musadzi a no ḽisa munna wawe mbilu ndi zwanḓa zwo netaho, ndi magona a lepalepaho.

₂₄Vhutshinyi ho thoma nga musadzi,

zwino roṱhe ri a fa nga mulandu wawe.

₂₅U songo litsha maḓi a tshi bvuḓa;

u songo litsha musadzi wa fonyolodzi a tshi semana nga u kona.

₂₆Arali a sa u thetshelesi, mu ṱale!