YESAYA 4

₂Musi wonoyo Ḓadzwane ḽa Muṋe washu ḽi ḓo simuwa, ḽa vha lunako na vhugala ha tsalela dza Israele, vha takala vha zuwa khaṋo i no ḓo bveledzwa nga shango. ₃Muṅwe na muṅwe ane a ḓo vha o sala Tsioni, we Mudzimu a mu nanga uri a sale Jerusalema a si fe, u ḓo pfi mukhethwa. ₄Ndi uri Muṋe wa zwoṱhe u ḓo ṱanzwa vhuaḓa ha vhasadzi vha Tsioni na mulandu wa malofha e a shululwa henefho Jerusalema, a zwi ita nga khaṱhulo na nga mulilo. ₅Muṋe washu u ḓo takusa gole masiari, ḽa alama thavha yoṱhe ya Tsioni, na kha tshivhidzo tshaho, vhusiku a ḓisa vhutsi, a vha vhonetshela nga khavhu ya mulilo. Vhugala ha Mudzimu vhu ḓo alama muḓi woṱhe ha u tsireledza, ₆ha vha murunzi wawo masiari uri u si swe nga ḓuvha, ha vha vhushavhelo hune vha dzumbama maḓumbu na mvula.