YESAYA 3

₁Vhonani, Ene Muṋe wazwo,

Muṋe washu Mulangazwoṱhe,

u ḓo ṱuwa a tshi dzhiela Jerusalema

na Juda vhatiki na thikho,

zwoṱhe zwine zwa tika vhathu,

zwiḽiwa na maḓi,

vhahali na maswole,

₂vhahaṱuli na vhaporofita,

mingome na vhahulwane,

₃vharangaphanḓa vha mmbi na vhaswikeli,

vhanna vha khoro na vhatsila vhomakone na vhadzivheli vha maswina.

₄U ḓo ita uri vha vhuswe nga vhatukana

vha no sokou ita zwine vha funa.

₅Vhathu vha ḓo kandeledzana nga tshavho;

vhatukana vha ḓo hambekanya vhahulwane,

vhanyadziwa vha kaidzekanya vhaḓivhalea.

₆Musi wonoyo muthu u ḓo sokou farelela muṅwe wa muṱa wa hawe, a ri,

“Inwi ivhani murangaphanḓa washu,

hufha ni tshi kha ḓi vha na gabulelo;

fhedzani vilinga heḽi hu vhe na mulalo!”

₇Uyo a fhindula a ri,

“Nṋe ndi ṅanga naa?

Hufha nḓuni yanga hu tshi nḓala he tsiku;

ni nga nnyita murangaphanḓa waṋu hani?”

₈Jerusalema wo phusukana,

Juda ḽo wa.

Zwine vha amba na zwine vha ita zwi nyadzisa Muṋe washu,

zwi lwa na vhugala hawe.

₉Zwifhaṱuwo zwavho zwi vha vhea mulandu,

a vha tsha shona,

vha tou anḓadza vhuvhi havho unga vha Sodoma.

Vha ḓo zwi vhona,

vha khou ḓiṱulela!

₁₀Ḓivhani uri vha no thetshelesa Mudzimu

zwi ḓo vha nakela,

vha ḓo ḓiphiṋa nga zwe vha shuma.

₁₁Vhavhi vhone vha ḓo zwi vhona!

Zwe vha ita vhaṅwe zwi ḓo itwa vhone.

₁₂Vhathu vhanga vha kandeledzwa nga vhatukana,

vha vhuswa nga vhasadzi.

Inwi vhathu vhanga,

vharangaphanḓa vhaṋu vha a ni xedza,

vha ni pambusa nḓilani.

₁₃Muṋe washu o ḓiimisela u sengisa vhathu,

o ḓilugisela u haṱula dzitshakha.

₁₄Muṋe washu u khou isa vhahulwane

na vharangaphanḓa vha vhathu vhawe tsengoni.

A tshi vha pomoka u ri,

“No kandekanya tsimu yanga ya minḓirivhe;

nnḓu dzaṋu dzo ḓala thundu

ye na dzhiela vhashai.

₁₅Ni itelani

ni tshi kandeledza vhathu vhanga na tambudza vhashai?”

Hu amba Muṋe wa zwoṱhe,

Muṋe washu Mulangazwoṱhe.

“Edzonu vhona uri vhasadzi vha Tsioni

vha ḓihudza hani!

Vha tshimbila vho ṱoṱomosa mitsinga,

vha tshi sinyedza vhanna nga maṱo;

vha tshi tshimbila vha tou kandela tsini,

vha tshi tswikinya vhukunda.

₁₇Hone Nṋe Yahavee Muṋe wa zwoṱhe

ndi ḓo vha laṱisa –

ndi ḓo vha palula

vha sala vha si na mavhudzi,

nda vha ṱangula zwiambaro vhathu vha vhonela.”

₁₈Musi wonoyo Muṋe wa zwoṱhe u ḓo dzhiela vhasadzi vha Jerusalema

zwoṱhe zwine vha ḓiṱama ngazwo –

vhukunda ha milenzheni na nungu dza ṱhohoni

na vhulungu ha mukuloni,

₁₉na zwiṅina zwa nḓevheni,

na vhukunda ha zwanḓani.

U ḓo vha dzhiela miṅwenda ya u khurumela

₂₀na miṅadzi yavho,

na geḓane dza milenzheni,

na mabannda a khanani,

na khambana dza zwiḓolo zwi nukhelelaho,

na zwikungi,

₂₁na dzirinngi dza minwe,

na zwiṅina zwa ningoni,

₂₂na zwiambaro zwa minyanya,

na dzikhanzu, na dzitshali,

na zwipatshi,

₂₃na zwivhoni,

na zwiambaro zwa muḓali,

na dugu dza ṱhohoni,

na dza mukuloni.

₂₄A vha tsha ḓo vha na zwiḓolo zwi nukhelelaho,

vha vho ḓo tou nukha,

a vha tsha ḓo ambara mabannda,

vha vho ḓo vhoxwa nga dzithambo;

a vha tsha ḓo luka mavhudzi,

vha ḓo palulwa;

a vha tsha ḓo ambara dza maṱeleṱele,

vha ḓo ambara madzanganda;

a vha tsha ḓo vha na lunako,

phanḓa dzavho dzi ḓo fhiswa ha sala luswayo lu shonisaho!

₂₅Iwe Jerusalema,

vhanna vhau vha ḓo fhela nga pfumo,

vhahali vhau vha ḓo fela nndwani;

₂₆khoroni dzau

hu ḓo pfala mukosi na tshililo;

u ḓo nga musadzi ó sokou khotha,

ó ṱangulwa.