1 VHAMAKHABI 4

₁Zwino Gorogiasi a dzhia vhanna vha zwigidi zwiṱanu (5 000) vha tshimbilaho nga milenzhe, a nanga vhanameli vha dzibere vha tshigidi (1 000), tshigwada itsho tsha takuwa vhusiku ₂uri tshi yo tshoṱhela mishasha ya Majuda, vhanna vhaṅwe vha no bva vhuimavhahali vha mu sumba nḓila. ₃Judasi a zwi pfa, ene muṋe a bva na vhahali vhawe u yo dia mmbi ya khosi i re Emausi ₄musi mmbi iyo i tshee yo balangana i kule na mishasha. ₅Vhusiku Gorogiasi a ya mishashani ya Judasi, a si wane muthu. Zwenezwo a thoma u vha londa dzithavhani a tshi khou ri, “Vha khou ri shavha.”

₆Hone mapfuvhi a tshi tswuka Judasi a bvelela mudavhini e na vhanna vha zwigidi zwiraru (3 000), vha si na zwipileli na mapanga zwine vha lila. ₇Vha vhona mmbi ya vhannḓa khulu yo tsireledzwaho, vho tangwa nga vhanameli vha dzibere na vhahali vhomakone. ₈Judasi a vhudza vhahali vhawe a ri, “Ni songo ofha ni tshi vhona u anda havho kana na tetemela mudio wavho. ₉Elelwani zwe vhokhotsi ashu vha tshidzwa Lwanzheni lwa Dziṱhanga, musi Farao a tshi vha tevhela e na mmbi yawe. ₁₀Zwino nga ri ṱavhele Mudzimu mukosi ri na fulufhelo ḽa uri u ḓo ri lamulela a tshi elelwa mulanga we a vhofha na vhokhotsi ashu, a lozwa mmbi iyi i re phanḓa hashu ṋamusi. ₁₁Vhannḓa vhoṱhe vha ḓo zwi ḓivha uri u hone ane a rengulula Vhaisraele a vha tshidza.”

₁₂Musi vhatsinda vha tshi sedza, vha vhona vha tshi khou ḓa vho vha livha, ₁₃vha bva mishashani yavho u yo lwa. Hone vhahali vha Judasi vha lidza phalaphala. ₁₄Nndwa ya ṱangana, vhannḓa vha kundwa, vha shavhela mudavhini. ₁₅Vha murahu vhoṱhe vha rungwa vha rambalala, vha pandamedzwa u vhuya u swika Gezere na midavhini ya Idumia, u swika Ashidodo na Jamunia. Ha vhulahwa vha zwigidi zwiraru (3 000).

₁₆Musi Judasi na mmbi yawe vha tshi vhuya u pandamedza vhanna avho, ₁₇a vhudza vhathu a ri, “Ni songo vha na tseḓa ya zwine na nga ṱangula, ri kha ḓi ya nndwani; ₁₈Gorogiasi na mmbi yawe vha tsini na riṋe hafho thavhani. Zwino imani ni khwaṱhe ni lwe na maswina ashu, ni a kunde. Ngavhuya ni ḓo kona u dzhia zwe na thuba no takala.”

₁₉Zwenezwo Judasi a tshi tou fhedza u amba, ha bvelela tshigwada tshi tshi bva thavhani. ₂₀Vha vhona uri mmbi yavho i khou shavha, na mishasha yavho yo fhiswa. Vho vhona zwe zwa itea nga u duba ha vhutsi. ₂₁Vha tshi zwi vhona vha tshenuwa zwihulu; vha tshi vhona na mmbi ya Judasi i mudavhini yo ḓilugisela u vha dia, ₂₂vhoṱhe vha shavhela shangoni ḽa Vhafilista.

₂₃Ndi hone Judasi a tshi huma a yo ṱangula mishasha, vhahali vhawe vha kuvhanganya musuku munzhi na siliva na masila a muvhala wa denga na muridili, na lupfumo luhulu. ₂₄Musi vha tshi huma, vho vha vha tshi khou imba nyimbo, vha tshi renda Mudzimu vha tshi ri, “U na vhuthu, lufuno lwawe a lu shanduki.” ₂₅Ngauralo Vhaisraele vha vha vho lamulelwa ḓuvha iḽo.

₂₆Hone vhatsinda vho ponyokaho vha ya vha vhudza Lisiasi zwoṱhe zwo iteaho. ₂₇A tshi zwi pfa zwa mu dina, a kulea nungo, ngauri zwe zwa itea kha ḽa Israele a si zwe a zwi funa, a zwo ngo itea nga he khosi ya vha vhudza.

₂₈Zwino ṅwaha u tevhelaho Lisiasi a kuvhanganya vhanna vho nanguludzwaho vha zwigidi zwa mahumi maṱana na ḽithihi (60 000) na vhanameli vha dzibere vha zwigidi zwiṱanu (5 000), uri vha kunde Majuda tshoṱhe. ₂₉Vha swika Idumia, vha ṱoka mishasha Bethe Tsuru, Judasi a ṱangana navho e na vhanna vha zwigidi zwafumi (10 000). ₃₀Judasi a tshi vhona mmbi iyo khulu a rabela a ri, “Nga hu rendwe Iwe, Mutshidzi wa Israele; wo kula nungo dza muhali wa maanḓa nga tshanḓa tsha Dafita mulanda wau, mishasha ya Vhafilista wa i kumedza Jonathani murwa wa Saulo na muhwali wa zwipileli zwawe. ₃₁Mmbi iyi i kumedze vhathu vhau Vhaisraele; ita uri vha shonele mmbi dzavho na vhanameli vhavho vha dzibere. ₃₂Vha dzhenise nyofho, vha kule nungo, ita uri vha tetemele vha tshi vhona u lozwiwa havho. ₃₃Vha rambaladze nga banga ḽa vhane vha u funa, uri vhoṱhe vhane vha ḓivha dzina ḽau vha u rende nga nyimbo.”

₃₄Ndi hone vha tshi thoma u lwa, ha rambalala vhanna vha maḓana maṱanu (500) vha mmbi ya Lisiasi vha tshi khou lwa. ₃₅Musi Lisiasi a tshi vhona mmbi yawe i tshi thoma u kundwa, a vhona ya Judasi i na tshivhindi, vhahali vhawe vhó ḓiimisela u tshila kana u fa vha sa ofhi, a humela Antiokia, a dovha a rendela vhahali uri a vhuelele Judia e na mmbi khulusa.

₃₆Ndi hone Judasi na vhana vha khotsi awe vha tshi ri, “Vhunga zwino ro kunda maswina ashu, nga ri gonye ri yo kumulula thembele, ri dovhe ri i kumedze Mudzimu.” ₃₇Zwenezwo mmbi yoṱhe ya kuvhangana, ya gonya Thavhani ya Tsioni. ₃₈Vha wana thembele i si na muthu, aḽiṱari yo kumadzwa, gethe dzo fhiswa, miṱani ho mela tsheṋe unga ḓakani kana thavhani, nnḓu dza vhaphrista dzo thuthwa. ₃₉Ndi hone vha tshi kherukanya zwiambaro zwavho, vha vusa tshililo tshihulu, vha ḓishela milora ṱhohoni, ₄₀vha shuvhama. Phalaphala dza lila, vha ṱavhela Mudzimu mukosi.

₄₁Judasi a nanga vhanna vha no ḓo tshoṱhela vha re vhuimavhahali, ngeno ene a tshi khou kumulula thembele. ₄₂A nanga vhaphrista vha sa solisei, vho ḓikumedzaho mulayo; ₄₃vhenevho vha kumulula hukhethwa, vha kungulusa matombo o hu kumadzaho vha a isa fhethu ho kumalaho. ₄₄Vha funzedzana zwine zwa fanela u itwa nga aḽiṱari ya zwiṱhavhelo zwi fhiswaho ye ya vha yo kumadzwa. ₄₅Vha ḓelwa nga muhumbulo wa u i thutha, uri vha si ḓo dzula vho niwa nga ṱhoni ha pfi vhannḓa vho i kumadza. Ndi hone vha tshi i thutha. ₄₆Vha vhulunga matombo ayo fhethu ho fanelaho tshivhangani tsha thembele, ha vhuya ha ḓa muporofita a vha vhudza uri vha iteni ngao. ₄₇Zwino vha dzhia matombo a songo vhaḓiwaho, vha tshi tevhedza mulayo, vha fhaṱa aḽiṱari ntswa i no nga iḽa ya u thoma. ₄₈Vha ita na u vusa thembele na ngomu ha nnḓu ya Mudzimu, vha kumulula miṱa. ₄₉Vha ita midzio mikhethwa miswa, vha ḓisa tshivheambone na zwioro zwa aḽiṱari na ḓafula ḽa mikonde ya tshinkwa, vha zwi dzhenisa nḓuni ya Mudzimu. ₅₀Ndi hone vha tshi dubisa zwioro aḽiṱarini, vha funga mbone kha tshivheambone, dza vhonetshela thembele. ₅₁Vha ita na u vhea mikonde ya tshinkwa kha ḓafula, vha fhahea mbemba dza vhupila. Ha vha hu hone vho vuledza mushumo woṱhe.

₅₂Nga matshelo nga ḓuvha ḽa mahumi mavhili na vhuṱanu (25) ḽa ṅwedzi wa vhuṱanu na vhuṋa, une wa vha ṅwedzi wa Khisilevi, nga ṅwaha wa ḓana na mahumi maṋa na miṱanu na miraru (148), ₅₃vho vuwa vha ṋekedza zwiṱhavhelo nṱha ha aḽiṱari yeneyo ntswa ya zwiṱhavhelo zwi fhiswaho ye vha i fhaṱa, hu tshi tevhedzwa mulayo. ₅₄Hu tshi fhela ṅwaha, nga ḓuvha ḽeneḽo ḽe vhannḓa vha i kumadza, nga ḓuvha ḽeneḽo ya kumedzwa Mudzimu hu tshi imbwa nyimbo, ha lidzwa haripa na zwiṱiringo na tshele. ₅₅Vhathu vhoṱhe vha shuvhama fhasi, vha luvha vha renda Mudzimu o itaho uri zwi vha nakele.

₅₆Vha fhedza maḓuvha maṱanu na mararu (8) vha tshi khou pembelela u kumedzwa ha aḽiṱari, vha ṋekedza zwiṱhavhelo zwi fhiswaho vho takala, vha ṋekedza na zwiṱhavhelo zwa u lamulelwa na thendo. ₅₇Vha nakisa luvhondo lwa Vhubvaḓuvha lwa thembele nga u vhumbelela khare dza musuku na zwiṱangu; vha vusa dzigethe na nnḓu dza vhaphrista vha dzi kwea mahothi. ₅₈Vhathu vha takala zwihulu musi vho no bviswa ṱhoni dzo vhangwaho nga vhannḓa. ₅₉Ndi hone Judasi na vhana vha khotsi awe vha tshi ḓivhadza uri ṅwaha muṅwe na muṅwe maḓuvha a u hangula aḽiṱari a vhe a vhuṱambo, hu fhele maḓuvha maṱanu na mararu u bva nga ḓuvha ḽa mahumi mavhili na vhuṱanu (25) ḽa ṅwedzi wa Khisilevi hu tshi pembelwa, ḽi dakalo.

₆₀Misi iyo vha fhaṱa mitsheṱo milapfu u ya nṱha, na zwiingamo zwa u khwaṱha u mona na Thavha ya Tsioni, u itela u thivhela vhannḓa uri vha si dovhe u ḓa vha i kandekanya. ₆₁Judasi a ita na u vhea mmbi henefho ya u i linda, a khwaṱhisa na muḓi wa Bethe Tsuru uri na u livhana na Idumia vhathu vha vhe na vhushavhelo ho khwaṱhaho.