1 VHAMAKHABI 3

₁Ndi hone murwa wawe Judasi, we a vha a tshi pfi Makhabiosi, a tshi ima vhuimoni hawe a vha mulangammbi. ₂Vhakomana na vharathu vha Judasi na vhoṱhe vhe vha baḓekana na khotsi awe vha tshi mu tikedza, vha ḓi lwa nndwa dza Israele vho takala.

₁₀Zwino Apholoniosi a kuvhanganya vhannḓa, khathihi na mmbi khulu i no bva Samaria, uri vha yo lwa na Vhaisraele. ₁₁Musi Judasi a tshi zwi pfa, a bva a yo ṱangana nae, a mu kunda a mu vhulaha. Vhanzhi vha rambalala vhe dzikhuvhabvu, vhaṅwe vha shavha. ₁₂Thundu dzavho dza dzhiwa, banga ḽa Apholoniosi ḽa dzhiwa nga Judasi, a ḓi lwa ngaḽo misi yoṱhe.

₁₃Hone Seroni, mulangammbi wa Siria, a pfa uri Judasi o kuvhanganya vhathu vhanzhi, ḽi guvhangano ḽa vhanna vha fulufhedzeaho vho ḓiluguselaho nndwa. ₁₄Zwino Seroni a ri, “Ndi ḓo ḓiitela dzina nda vha na bvumo muvhusoni nga u kunda Judasi na vhatikedzi vhawe vhe vha nyadza mulayo wa khosi.” ₁₅Mmbi khulu ya vhanna vha no nyadza Mudzimu ya dovha ya gonya nae u yo mu farisa u lifhedza Vhaisraele. ₁₆Musi a tshi swika hune a gonyela Bethe Horoni, Judasi a bva u yo ṱangana nae e na vhanna vha si gathi. ₁₇Hone musi vha tshi vhona mmbi i tshi khou ḓa u imedzana navho, vha vhudza Judasi vha ri, “Riṋe ri si gathi ro rali ri nga kona hani u lwa na gogo ḽingafha ḽa maanḓa? Hafhu riṋe a ri na nungo ṋamusi, nge ra vha ri tshi khou ḓidzima zwiḽiwa.” ₁₈Hone Judasi a ri, “Zwi a itea uri vha re vhanzhi vha kundwe nga vha si gathi. Maṱoni a Mudzimu a hu na phambano kha u lamulelwa nga vhanzhi kana nga vha si gathi. ₁₉Ndi uri u kunda nndwani a zwi itiswi nga vhuhulu ha mmbi, zwi itiswa nga nungo dzi bvaho ṱaḓulu. ₂₀Vha khou ḓa u lwa na riṋe nga maṱaṱa na lunyadzo uri vha ri lozwe na vhafumakadzi vhashu na vhana vha kone u ri ṱangula. ₂₁Hone riṋe ri khou lwela vhutshilo hashu na milayo yashu. ₂₂Mudzimu Ene muṋe u ḓo vha kuya phanḓa hashu, zwenezwo ni songo vha ofha.” ₂₃Musi a tshi fhedza u amba, a mbo ḓi wela Seroni na mmbi yawe kathihi fhedzi a tou vha kuya. ₂₄Judasi a shakulisa Seroni mutheuni wa Bethe Horoni u ya mudavhini, ha rambalala vhanna vha havho vhane vha nga swika maḓana maṱanu na mararu (800), vhaṅwe vha shavhela shangoni ḽa Vhafilista. ₂₅Zwenezwo Judasi na vhana vha khotsi awe vha thoma u ofhiwa, vhannḓa vho vha tangaho vha farwa nga nyofho. ₂₆Bvumo ḽa Judasi ḽa swika nḓevheni dza khosi, vhannḓa vhoṱhe vha anea magovholano a Judasi.

₂₇Musi Anthiokhosi a tshi pfa zwo iteaho, a sinyuwa a ṋea mulayo wa uri mmbi dzoṱhe dza muvhuso wawe dzi kuvhangane, ya vha mmbi khulu. ₂₈A vula zwisiku zwawe zwa mali, a ṋea vhahali vhawe malamba a ṅwaha woṱhe, a vha laya uri vha ḓilugisele tshifhio na tshifhio. ₂₉Ndi hone a tshi wana uri u ralo zwo fhedza mali tshisikuni tshawe, hafhu mali ya mithelo ya shango yo vha i si gathi, nga mulandu wa mifhirifhiri na u tambula he a hu vhanga afho shangoni nga u thutha milayo ye ya vha i tshi khou shuma u bva kale. ₃₀Anthiokhosi a ofha uri tsha mulovha tsha vhuya a nga si vhe na zwo eḓanaho tshinyalelo dzawe, ngauri o vha a tshi ḓi ṋea vhathu zwifhiwa a sa londi, a sa ngi mahosi o mu rangaho phanḓa. ₃₁A hanganea a vhuya a elekanya u ya Pheresia u kuvhanganya mithelo madzinguni ayo uri a vhe na mali nnzhi. ₃₂Anthiokhosi a sia Lisiasi, muḓivhalea wa malofha a vhuhosini, a tshi langa mafhungo a khosi u bva mulamboni wa Yufuratha u swika masakhani a Egipita. ₃₃Lisiasi a hweswa mushumo wa u londola murwa wa Anthiokhosi u swika a tshi vhuya. ₃₄A mu kumedza hafu ya dzimmbi na dzinḓou, a mu laya zwoṱhe zwine a fanela u ita, zwa vha dzulaho Judia na Jerusalema, ₃₅Lisiasi a laiwa uri a rume mmbi i yo lwa navho i vha kuye, i fhedze maanḓa a Vhaisraele na tsalela dza Jerusalema, vha si tsha humbulwa afho shangoni, ₃₆shangoni ḽavho ḽoṱhe a dzudze vhatsinda, a vha kovhele zwisi nga u ita madeṅwa.

₃₇Khosi ya dzhia iṅwe hafu ya mmbi ya takuwa Antiokia, musanda wayo, nga ṅwaha wa ḓana na mahumi maṋa na miṱanu na mivhili (147), ya wela mulambo wa Yufuratha, ya buḓekanya mashango a dzithavhani.

₃₈Lisiasi o nanga Tholemiosi murwa wa Dorimenese, na Nikhanoro na Gorogiasi, vhanna vha konaho kha khonani dza khosi, ₃₉vhenevho a vha ruma na vhanna vha zwigidi zwa mahumi maṋa (40 000) na vhanameli vha dzibere vha zwigidi zwiṱanu na zwivhili (7 000) u yo dia shango ḽa Juda, vha ḽi tshinyadze vha tshi tevhedza zwe khosi ya amba. ₄₀Vha takuwa na mmbi dzavho dzoṱhe, vha swika vha ṱoka mishasha yavho tsini na Emausi mudavhini. ₄₁Musi vhashavhi vha iḽo shango vha tshi pfa zwa bvumo ḽavho, vha ḓisa maseṱha a si na vhukono na musuku, na mbofho dza milenzhe, u itela u renga Vhaisraele uri vha vhe phuli dzavho. Ha ḓa na mmbi i bvaho Idumia na Filistia ya ḓibaḓekanya navho.

₄₂Judasi na vhana vha khotsi awe vha vhona zwo vhifha izwo mmbi dzo ṱoka mishasha shangoni ḽavho, vha tshi ḓivha mulayo wa khosi wa uri vhathu vha lozwiwe, vha swielwe tshoṱhe. ₄₃Ndi hone vha tshi vhudzana vha ri, “Nga ri tsireledze vhathu vha hashu vha si lozwiwe, ri lwele vhathu vha hashu na thembele!”

₄₄Tshivhidzo tsha kuvhangana u ḓilugisela nndwa na u rabela vha tshi humbela u khathutshelwa na u pfelwa vhuṱungu.

₄₆Ndi zwe vha kuvhangana vha livha Mitsipha u livhana na Jerusalema, nge kale afho Mitsipha ha vha hu na fhethu hune Vhaisraele vha rabela hone. ₄₇Musi wonoyo vha ḓidzima zwiḽiwa, vha ambara madzanganda, vha ḓishela milora ṱhohoni vha kherukanya zwiambaro zwavho. ₄₈Vha ṱharamudza bugu ya mulayo, vha londolosa a vhannḓa vha tshi vhudzisa midzimu yavho ya zwifanyiso. ₄₉Vha ḓa na khanzu dza vhaphrista na mitshelo ya u ranga na zwafumi, vha ramba vhanaziri vhe vha vha vho no khunyeledza tshifhinga tshavho tsha miano. ₅₀Zwino vha ṱavhela Mudzimu mukosi vha ri,

₅₄Ndi hone vha tshi lidza phalaphala, vha ṱavha mukosi muhulu. ₅₅Ngavhuya Judasi a vhea vharangaphanḓa vha vhathu, vhane vha langa vhathu vha tshigidi na vha ḓana na vha mahumi maṱanu na vha fumi. ₅₆Judasi a ri vhane vha khou fhaṱa dzinnḓu kana vha no sela muvhingo kana vha no khou lima masimu a minḓirivhe, na vhane vha ofha, vha humele mahayani avho, hu tshi tevhedzwa mulayo. ₅₇Ndi hone mmbi i tshi bva, vha yo ṱoka mishasha Tshipembe ha Emausi. ₅₈Judasi a ri, “Ḓiṱameni, ni vhe na tshivhindi; nga matsheloni ni ḓilugisele u lwa na vhannḓa vho kuvhanganelaho u lwa na riṋe uri vha ri lozwe na thembele yashu. ₅₉Ndi khwiṋe ri tshi fela nndwani u fhira u sokou ṱanzwa maṱo ra lavhelesa lushaka lwa hashu lu tshi lozwiwa na thembele yashu. Zwine Mudzimu a zwi funa, u ḓo zwi ita.”