TITOSI 3

₁Humbudzani vhathu uri vha luvhe vhavhusi na vhahulwane, vha vha thetshelese vho ḓiimisela u ita zwivhuya nga nḓila dzoṱhe. ₂Ni vha vhudze vha si vhuye vha isela vhaṅwe phungo, tshavho hu vhe u dzula nga mulalo na vhulenda vha tshi itela vhathu vhoṱhe vhuthu vha sa ṱaluli.

₃Na riṋe ro vhuya ra vha matsilu, ri sa pfi, ró xela; ro vha ri phuli dza nyemulo na miḓifho ya tshakha dzoṱhe, ri tshi dzulela u ita vhunwa na vivho, ri vhathu vha nengisaho, vha dzulaho nga u vhengana. ₄Hone musi vhuthu na lufuno lwa Mudzimu Mutshidzi washu zwo no dzumbuluwa, ₅o ri tshidza. Ho ngo ri tshidza nge ra ita zwivhuya, ndi tshilidzi tshawe. O zwi ita nga u ri ṱanzwa vhutshinyi a tshi ri beba nga huswa, na nga Muya Mukhethwa ane a ri ṋea vhutshilo vhuswa. ₆Mudzimu o shululela Muya Mukhethwa kha riṋe lu si na vhukono nga Yesu Khristo Mutshidzi washu, ₇uri ri pfi vhavhuya zwi tshi bva kha tshilidzi tshawe, ri vhe maḽaifa awe ri lavhelele vhutshilo vhu sa gumi.

₈Hayo ndi mafhungo ane ra fanela u a fulufhela. Ndi zwine nda tama ni tshi a ḓivhadza vhathu no tou khwaṱhisa, uri vha fulufhelaho Mudzimu vha ḓiimisele u dzula vha tshi ita mishumo mivhuya. Hezwo ndi zwone zwavhuḓi zwi farisaho vhathu. ₉Hone ni furalele khani dza vhutsilu na ngano dza u dubekanya madzina a vhomakhulukuku na u ṱaṱa khani na u lwela Mulayo. Hezwo a zwi farisi tshithu, ndi u sokou fhedza tshifhinga. ₁₀Mufhiriṱanyi arali no mu kaidza na dovha a si pfe ni mbo ḓi khaukana nae, ₁₁ngauri ni a ḓivha uri o raloho o bva nḓilani, u a tshinya, ha vha u ḓilaṱa hawe.

₁₂Musi ndi tshi ruma Arthemasi kana Thikhikhosi ngeo ni linge nga nungo dzoṱhe uri ri ṱangane Nikopolisi; ndi hone he nda humbula u fhedza vhuno vhuriha ndi hone. ₁₃Ni linge nga nungo dzoṱhe u farisa Zenasi uḽa ramilayo na Apolosi uri vha mbo ḓi thoma nyendo dzavho vha si na tshine vha shaya. ₁₄Vhathu vha hashu vha fanela u guda u dzula vha tshi ita zwivhuya, uri vha kone u tikedza vha shayaho, vha si sokou tshila vha sa aṋwi mitshelo.

₁₅Vhoṱhe vhane nda vha navho fhano vha ri ni vhe hone. Vha re khonani dzashu henengeo nge ra tenda zwithihi vha vhe hone.

Ngavhe Mudzimu a tshi ni itela vhuthu noṱhe.