FILIMONI 1

₁Ndi nṋe Paulo we nda hoṋelwa dzhele nge nda vha wa Khristo Yesu, ndi khou ṅwala ndi na Timoti wa hashu.

Ndi ṅwalela inwi Filimoni khonani yashu ane ra shuma roṱhe, ₂na khaladzi ashu Afia na Akhiphosi ḽiswole nga riṋe ḽa Khristo, khathihi na tshivhidzo tshi kuvhanganaho henefho nḓuni yaṋu. Ndi a ni resha ndi ri: ₃Ngavhe Mudzimu Khotsi ashu na Muṋe washu Yesu Khristo vha tshi ni itela vhuthu na vha na mulalo.

₄Misi yoṱhe ndi tshi rabela ndi livhuha Mudzimu wanga ndi tshi ni elelwa, ₅nge nda pfa uri vhakhethwa vhoṱhe vha Mudzimu a ni vha funi zwone na uri Muṋe washu Yesu a no ngo mu fulufhela zwone. ₆Ri vha lutendo luthihi; zwino thabelo yanga ndi ya uri ngavhe ni tshi ṱalukanya zwivhuya zwoṱhe zwine ra nga itela Khristo, na kona u ita zwenezwo. ₇Murathu wanga, lufuno lwaṋu lwo ntakadza lwa dovha lwa nṱuṱuwedza nga maanḓa. Zwe na ita zwo tou rudza mbilu dza vhakhethwa vha Mudzimu.

₈Ndi zwine naho nga Khristo ndi na maanḓa a u ni vhudza zwine na fanela u ita, nda si ralo. ₉Tshine nda ita ndi u tou ni kwengweledza ngauri ri a funana. Hafhu zwino ni khou kwengweledzwa nga nṋe Paulo mukalaha ane a khou amba o hoṋelwa dzhele nge nda vha wa Khristo Yesu. ₁₀Ndi khou pfumelela Onesimasi ṅwananga we nda mu beba fhano dzhele. ₁₁Naho kale o vha a si na tshine a ni shumela, zwino o no vha na tshine a ri shumela roṱhe nṋe na inwi.

₁₂Ndi zwine nda ri a humele ngeo kha inwi; hone u ṱuwa hawe ndi tshifa ho ṱuwa mbilu yanga. ₁₃Ndo vha ndi tshi funa uri a ḓi dzula na nṋe fhano a tshi nyitela zwe nda vha ndo fanela u itelwa nga inwi zwino ndi tshee ndo hoṋelwa fhano dzhele nge nda ḓivhadza mafhungo maḓifha. ₁₄Naho zwo ralo ndo vha ndi sa funi u ita tshithu arali ni sa pfani natsho, ndi zwine nda si fune ni tshi ntonda nga u tou kombetshedzwa, ndi ṱoḓa ni tshi zwi ita nga u funa haṋu. ₁₅Khamusi ndi zwe na vhona Onesimasi o thoma u ni ṱutshela tshifhinganyana, uri ni vho ḓo kona u dzula nae lini na lini. ₁₆Hafhu zwino a ri tsha mu sedza sa phuli, ha tsha nga phuli, o no tou vha murathu mufunwa. Hone kha nṋe a thi tsha amba, sa muthu na sa mutendi o no tou vha murathu wanga vhukuma. Huno inwi u kundwa ngani-ha u vha murathu waṋu-vho?

₁₇Zwino arali nṋe ni tshi vhona ndi mutendi nga inwi, mu ṱanganedzeni-ha ni nge ni khou ṱanganedza nṋe. ₁₈Arali o vhuya a ni khakhela kana a pamba tshiṅwe kha inwi a zwi dini, ndi ḓo ni lifhela. ₁₉Hafha zwino ndi tou ṅwala nga tshanḓa tshanga hetshi, ndi tou rali: nṋe paulo ndi ḓo ni lifhela.

Hafhu ndi vhona zwi songo vhuya zwa fanela ndi tshi ni humbudza uri zwenezwo zwine na vha zwone no itwa nga nṋe.

₂₀Ndi zwone wa hashu, itani zwine nda ni humbela sa Mukhriste nga nṋe; rudzani mbilu yanga nge ra vha vha Khristo roṱhe.

₂₁Ndi ṅwala ndi na fulufhelo ḽa uri ni ḓo zwi pfesesa. Vhukuma ndi a ḓivha uri ni ḓo ita na zwi fhiraho izwo. ₂₂Ḽiṅwe ndi ḽa uri ni vhe ni tshi nndugisela vhudzulo henengeo, ngauri ndi fulufhela uri Mudzimu u ḓo pfa thabelo dzaṋu a dovha a ntswikisa henengeo nga vhuthu hawe.

₂₃Ephafrasi uyu we nda hoṋelwa nae dzhele nge ra vha vha Khristo Yesu u ri ni vhe hone. ₂₄Na havha vhaṅwe vhane ra shumisana navho vha ralo. Vhenevho ndi Markosi na Aristhakhosi na Demasi na Lukasi.

₂₅Ngavhe Muṋe washu Yesu Khristo a tshi ni itela vhuthu noṱhe.