NZUMBULULO 6

₁Nda vhona Ngwana i tshi vhofholola ḽiṅwe ḽa aḽa mapfundo maṱanu na mavhili. Nda pfa tshiṅwe tsha zwiḽa zwivhumbwa zwi tshilaho zwiṋa tshi tshi vhidzelela nga ipfi ḽi no tou bvuma tshi tshi ri, “Kha i ḓe!” ₂Ndi tshi lavhelesa henefho nda vhona bere tshena yo namelwa nga muthu o faraho vhura, a ṋewa khare ya u kunda uri hoṱhe hune a ya a kunde, a si vhuye a kundwa na luthihi.

₃Ndi hone Ngwana i tshi dovha u pfuṋulula ḽiṅwe pfundo, nda pfa tshivhumbwa tshi tshilaho tsha vhuvhili tshi tshi ri, “Kha i ḓe!” ₄Ndi hone bere iṅwe yo tswukaho sa mulilo i tshi tutu. O i namelaho o ṋewa banga ḽihulu, a ṋewa maanḓa a u fhelisa mulalo fhano shangoni, vhathu vha vhulahane.

₅Musi a tshi pfuṋulula pfundo ḽa vhuraru nda pfa tshivhumbwa tshi tshilaho tsha vhuraru tshi tshi ri, “Kha i ḓe!” Ndi tshi lavhelesa nda vhona bere ntswu, o i namelaho ó fara tshikalo. ₆Nda pfa tshi ambaho sa ipfi tshi tshi ṱaha vhukati ha zwiḽa zwivhumbwa zwi tshilaho zwiṋa tshi tshi ri, “Muholo woṱhe wa munna wa ḓuvha ḽithihi u vho ḓo renga koṱikoṱi ya goroi fhedzi, kana koṱikoṱi tharu dza baḽi; mapfura a nyolivi na waini ni songo zwi tambisa!”

₇Musi a tshi pfuṋulula pfundo ḽa vhuṋa nda pfa ipfi ḽa tshivhumbwa tshi tshilaho tsha vhuṋa tshi tshi ri, “Kha i ḓe!” ₈Ndi tshi lavhelesa nda vhona ḽiṅwe ḽibere ḽa muvhala museṱha wo haluluwaho. O i namelaho o vha a tshi pfi Lufu, a tevhelwa nga Vhudzulavhafu. Vhenevho vha ṋewa maanḓa a u vhusa tshithihi kha zwipiḓa zwiṋa zwa ḽifhasi, vha tendelwa u vhulaha vhathu nga banga na nga nḓala na nga dwadze, na nga zwivhanda zwa ḓaka.

₉A tshi pfuṋulula pfundo ḽa vhuṱanu nda vhona ngei ṱaḓulu fhasi ha aḽiṱari hu na mimuya ya vhe vha vhulahelwa u ḓi ṱanzilela ipfi ḽa Mudzimu, vha vha tshiṱhavhelo, ₁₀vhone vha tshi khou ṱavha mukosi vha tshi ri, “Muṋe wa zwoṱhe, mukhethwa a fulufhedzeaho, zwi ḓo fhela lini? Vhaḽa vhathu vha re shangoni vhe vha ri vhulaha u ḓo vha haṱula lini wa lifhedzela malofha ashu?” ₁₁Muṅwe na muṅwe wavho a ambadzwa nguvho tshena, vha pfi vha vhe vho lindela tshifhinganyana, uri hu thome hu khunyelele tshivhalo tsha vhalanda na vhatendi ngavho vha no ḓo vhulawa sa vhone.

₁₂Nda vhona Ngwana i tshi pfuṋulula pfundo ḽa 6, ha mbo vuwa mudzinginyo muhulu wa shango, ḓuvha ḽa swifhala ḽa nga sila ḽitswu ḽi hwasaho, ṅwedzi wa tswuka sa malofha, ₁₃ṋaledzi dza wela fhasi, dza nga mahuyu o dzinginyiswaho nga ḓumbu a tshi wela fhasi, ₁₄ḽiṱaḓulu ḽa nyamalala sa pesa ḽa bugu ḽi tshi petwa, thavha dzoṱhe na zwiṱangadzime zwa sudzuluswa vhudzuloni hazwo. ₁₅Zwenezwo ndi hone mahosi a ḽifhasi na magota na vhalangammbi na vhapfumi na vhaḓivhalea na phuli dzoṱhe na vhaḓilangi, vha tshi dzumbama mapakoni na nngwani dza dzithavha, ₁₆vha vhidzelela dzithavha na dzinngwa vha ri, “Ri weleni ni ri tibe uri ri dzumbame hoyo o dzulaho kha khuluṋoni a si tsha ri vhona, na ṱhamu ya Ngwana i si ri wele. ₁₇Ḓuvha ḽavho ḽihulu ḽa khaṱhulo ḽo swika; ḽi nga konḓelelwa nga nnyi?”