JUDASI 1

₁Ndi nṋe Judasi muḓinḓa wa Yesu Khristo. Ndi murathu wa Jakopo. Ndi ṅwalela inwi no vhidzwaho, ni funwaho nga Mudzimu Khotsi, na vhulungwa nga Yesu Khristo.

₂Ndi a ni resha ndi ri: ngavhe Mudzimu a tshi ni itela vhuthu na vha na mulalo na lufuno nga vhuḓalo.

₃Vhafunwa, ndo vha ndo tama zwihulu u ni ṅwalela nga zwa u tshidzwa hashu roṱhe. Hone zwino ndi vhona zwi tshi ṱoḓea uri ndi ni ṅwalele ndi tshi ni ṱuṱuwedza uri ni dzule ni tshi lwa nga nungo dzoṱhe ni tshi lwela lutendo lwonoluḽa lwe Mudzimu a kumedza vhakhethwa vhawe luthihi fhedzi zwa mbo ḓi vha zwo khunyelela. ₄Ndi uri ndo vhona vhaṅwe vhathu vho no susumela vhukati haṋu. Ndi vhathu vhavhi vhe vha dzula vho haṱulelwa ṱhamu kale na kale. Vha tshila vho tou ḓikumedza zwa vhuḓabaḓaba vha tshi ri, “Tenda Mudzimu a tshi ḓo ri khathutshela.” Ngauralo vha landula Muṋe washu Yesu Khristo, Ene Khosi e eṱhe.

₅Nangwe zwi zwithu zwine na zwi ḓivha zwoṱhe, litshani ndi ni humbudze uri naho Muṋe washu o tshidza lushaka shangoni ḽa Egipita, o ḓi lozwa vhe vha si mu fulufhele. ₆Na vharuṅwa vhe vha sa fushee nga vhuimo havho, vha pfuluwa vhudzuloni havho, Mudzimu o vha vhofha nga geḓane dzi sa ṱhukhuwi, zwino vho lindiwa dindini ḽa swiswi vho lindela ḓuvha ḽihulu ḽa khaṱhulo. ₇Zwo ḓi ralo Sodoma na Gomora na miḓi yo vhandekanaho nayo. Na vhone vho ita-vho zwa vhenevho vharuṅwa, vha ita vhupombwe vhu nengisaho na vhupaṱi vhu sa tendelani na tsiko ya muthu. Ndi zwine zwino vha tambudzwa muliloni u sa dzimi uri vha vhe tsumbo kha vhaṅwe.

₈Na kha vhenevho vhanna zwo tou ralo na ṋamusi: miloro yavho i ita uri vha dzhenise mivhili yavho kha zwa dzitshika vha vho nyadza vhuhulu ha Mudzimu na u sema vhahulwane vha ngei ṱaḓulu. ₉Na Mikaele muruṅwa muhulwane, a tshi khou pikisana na diabolo zwiḽa vha tshi lwela tshitumbu tsha Mushe, hufha a songo vhuya a swika he a nyefula diabolo kana a mu haṱula; tshe a amba o tou ri, “Muṋe washu u ḓo u rwa.” ₁₀Hone havho vha sokou nyefula zwithu zwine vha si vhuye vha zwi ḓivha; vha langwa nga zwi re malofhani, sa phukha dzi si na ṱhalukanyo; ndi zwone zwi no vha lozwa. ₁₁Vha ḓo zwi vhona vhenevho vhathu: vho fara nḓila yeneiḽa ya Kaini; vha fhura vhathu sa Biliamu vha tshi ri vha ḓo wana malamba ngazwo; vho shandukela Mudzimu sa Kora, zwino vha vho lovha nga zwenezwo. ₁₂Musi ni tshi ḽa navho sa vhatendi, vhone vha mbumbunda vha sa shoni. A vha londi zwa vhaṅwe, vha londa zwavho fhedzi. Vha fana na lutombo lwa tshilaledzi lu re fhasi ha maḓi lu pwashaho zwikepe. Vha nga makole a si na mvula a balanganywaho nga maḓumbu. Vha nga miri ine na nga tshifhinga tsha u aṋwa ya sa aṋwe mitshelo, yo no tupulwaho, yo no faho tshoṱhe. ₁₃Vha nga magabelo a ofhisaho a lwanzhe a fhufhumaho zwiito zwavho zwi shonisaho. Vha nga ṋaledzi dzi tendelekaho lutomboni. Mudzimu o dzula o vha lugisela swiswi ḽi sa gumi ḽo tou ri bodo.

₁₄Ndi Enokho, uḽa wa murafho wa 7 u bva kha Adamu, we a vha porofita a ri, “Muṋe washu o ḓa na zwigidigidi zwa vharuṅwa vhawe vhakhethwa ₁₅uri a vha haṱule vhoṱhe a rovhedze vhavhi vhoṱhe a tshi vha rwela mishumo yavho yoṱhe mivhi ye vha ita nga vhuvhi havho, na oṱhe mavhi e vhatshinyi vhavhi vha sema Mudzimu ngao.”

₁₆Ndi vhadzia-u-gungula na u vhilaela. Vha langwa nga nyemulo dzavho fhedzi; vha dzulela u zuwa, na u hoya vhathu uri vha pfume ngazwo.

₁₇Hone inwi vhafunwa, elelwani maipfi e a dzula o ambiwa nga vhaapostola vha Muṋe washu Yesu Khristo. ₁₈A thi ri vho ḓi amba vha ri, “Misi ya vhufhelo hu ḓo ḓa vhathu vhane vha ḓo tshila vha tshi langwa nga nyemulo dzavho mmbi; vhenevho vha ḓo ni goḓa.”

₁₉Avho ndi vhaluṱanyi; a vha na Muya Mukhethwa, vha langiwa nga tsiko yavho fhedzi. ₂₀Hone inwi vhafunwa, ḓialuseni kha lutendo lwaṋu lukhethwakhethwa, ni ḓi rabela nga maanḓa a Muya Mukhethwa. ₂₁Ni dzule ni kha lufuno lwa Mudzimu, no lavhelela tshilidzi tsha Muṋe washu Yesu Khristo uri ni wane vhutshilo vhu sa gumi. ₂₂Vhane vha kha ḓi timatima ni vha itele tshilidzi, ₂₃hone vhaṅwe ni tshi vha tshidza ni tou nga ni khou vha ṋula muliloni. Ha vha na vhaṅwe hafhu vhane na fanela u vha fara nga mbilutshilidzi, ni tshi tata; ni vhenge na zwiambaro zwe vha kumadza nga nyemulo dzavho.

₂₄Thendo dzashu nga dzi swikiswe ha Mudzimu nga Yesu Khristo Muṋe washu. Mudzimu u kona u ni vhulunga uri ni si khukhulwe a vhuye a ni imise phanḓa hawe na vhona vhugala hawe ni vhathu vha sa solisei, ni tshi pembela nga dakalo. ₂₅Ndi Ene Mudzimu e eṱhe; ndi Ene Mutshidzi washu nga Yesu Khristo Muṋe washu. Vhugala ndi hawe, na vhuhulu, na maanḓa, tsha kale na kale shango ḽi sa athu vha hone, na zwino, na lini na lini! Amen.