SIRAKA 20

₁Go na le komanyo e e dirwang ka nako e e seng ya yone, le gone go na le motho yo o didimetseng mme a le botlhajana.

₂Kana go botoka jang go omanya go na le go ngala.

₃Motho yo o dumelang gore o dirile molato o falola kotlhao.

₄Motho yo o dirisang dikgoka mo ditshekong o tshwana le moopafadiwa yo o eletsang go senya kgarebane.

₅Go teng motho yo e a reng a didimetse go akanngwe gore o botlhale, fa yo mongwe ene a tlaa itlhoisa batho ka go balabala.

₆Go teng motho yo o didimalang ka ntlha ya gore ga a na karabo, fa yo mongwe a didimala ka gore o itse nako e a ka buang ka yone.

₇Motho yo o botlhale o didimala go fitlhelela nako e e mo siametseng e fitlha, fela sematla se se balabalang fela se tlhola se sa itse nako e e se siametseng.

₈Motho yo o buang bobe o tlaa itlhoisa batho, mme sebui se se itlhomileng se se ithayang se re se “reaitse” le sone se tlaa ikidisa batho.

₉Motho mongwe o tle a bone gore go tlhoka lesego go a mmoloka, mme lesego le dira gore a latlhegelwe.

₁₀Go na le mpho e e sa go busetseng sepe, mme go na le mpho e e tlaa go busetsang go menaganye.

₁₁Go na le tlotlo e e isang kwa go kokobediweng, mme go na le batho ba e a reng le fa ba ntse ba le mo maemong a a kwa tlase ba nne ba tsholetse ditlhogo tsa bone fela ba tlotlegile.

₁₂Go na le motho yo o ka rekang dilo tse dintsi ka tlhwatlhwa e e kwa tlase, mme le fa go ntse jalo a duela gasupa go feta.

₁₃Motho yo o botlhale o ithatisa batho ka mafoko a gagwe fela botsalano jo bo feteletseng jwa seeleele bo itshenyegela fela.

₁₄Mpho ya motho yo o sematla ga e na go go thusa sepe, o lebeletse gore O mmusetse go menaganye gasupa.

₁₅O fa go le gonnye mme o omana thata, o bula molomo wa gagwe jaaka mogoweletsi wa motse. O adima gompieno, ka moso o batla tuelo; motho yo o ntseng jalo o tlhoegile thata.

₁₆Sematla se tlaa bua jaana se re, “Ga ke na ditsala, ga nke ke lebogelwa ditiro tsa me tse di molemo; botlhe ba ba jang dijo tsa me ba bua bosula.”

₁₇Kana ba bantsi jang ba ba e tleng ba mo tshege, le gone gantsi jang!

₁₈Go relela mo maribelong go botoka go na le go relela ga loleme, go wa ga baikepi go ba tshoganyetsa ka one mokgwa o.

₁₉Motho yo o maitseo a magwata o tšhwana le polelo e e bolelwang e sa tšhwanela go bolelwa, e batho ba ba sa itseng sepe ba tlholang ba e bolela.

₂₀Seane fa se buiwa ke sematla se a ganwa, ka a se bua ka nako e e sa se tšhwanelang.

₂₁Motho o ka nna a thibelwa ke lehuma go leofa mme ka mokgwa oo, ya re a ikhutsitse a se ka a tšhwenngwa ke kutlobotlhoko epe.

₂₂Motho fa a ka ipolaya fela ka ntlha ya ditlhong, o a bo a ipolaela kgopolo ya sematla sengwe.

₂₃Motho o ka re ka ntlha ya ditlhong a solofetsa tsala, mme a e dira mmaba fela go sa tlhokafale.

₂₄Go aka ke sebalo se se maswe mo mothong, mme go tlhola go le mo molomong wa batho ba ba sa itseng sepe.

₂₅Legodu le bile le botoka go na le motho yo o tlholang a akile fela, fela boobabedi ba ya tshenyegong.

₂₆Go aka ke mokgwa o o maswe, ke gone ka mo moaki a tlholang a tlontlologile fela.

₂₇Motho yo o botlhale o itlhalosa mo maemong ka mafoko a gagwe, motho yo o botlhajana o itumedisa magosana.

₂₈Motho yo o lemang mmu o tlaa roba thobo e e tletseng, mme yo o itumedisang magosana o tlaa ipapalela boitšhwarelo jwa ditlolo tsa gagwe.

₂₉Dineo le dimpho di ka foufatsa batho ba ba botlhale ka bosi mme di thibela dikomanyo jaaka semutlhamolomo, mme di thibela le ditshebi gape.

₃₀Mosola wa botlhale jo bo fitlhilweng le letlotlo le le iseng le bonwe ke eng?

₃₁Go botoka motho yo o fitlhang bomatla jwa gagwe go na le motho yo o fitlhang botlhale jwa gagwe.