SIRAKA 19

₁Fa O tshela jalo ga O kitla O huma; motho yo o nyatsang dilo tse dinnye o nna a nwela ka senya.

₂Bojalwa le basadi ba senya motho yo o nang le tlhaloganyo; motho yo o itlhakatlhakanyang le diaka o latlhegelwa ke ditlhong.

₃O tlaa nna bošwa jwa dithethe le diboko, mme motho yo o se nang ditlhong le ene o tlaa latlhegelwa ke botshelo jwa gagwe.

₄Motho yo ikanyakanyang ba bangwe o bontsha gore ga aa tlala sentle; fa a dira sebe o a bo a iphosetsa ka boene.

₅Motho yo o itumelelang bosula o tlaa bonwa molato.

₆Fa motho a tlhoa ditshebo o tila bosula.

₇E se ka ya re O bolelelwa selo, le wena O bo O ya go se bolela, mme ga O kitla O tlhagelwa ke bosula bope.

₈O se ka wa se bolelela le fa e le tsala kgotsa mmaba, O se ka wa bo wa se senola, fa e se gore O leofa ka go sa se senole.

₉Gonne batho ba a bo ba tloga ba go utlwa, ba bo ba go belaela; mme fa nako e ntse e ya O bo O tlhoiwa.

₁₀A o utlwile sengwe? A se šwele mo go wena, O se ka wa tshaba! Ga se na go go phatloganya!

₁₁Seeleele fa se boleletšwe sengwe se utlwa ditlhabi tsa pelegi, fela jaaka mosadi yo o belegang, ₁₂Dikgannyana tse di itsiweng ke seeleele di mo kokonela fela jaaka motsu o totomeditšweng nameng ya serope.

₁₃O ipoletse tsala, gongwe ga e ise e ke e dire sepe, mme fa e le gore e dirile sengwe e se ka ya se dira gape.

₁₄Ipoletse mokaulengwe wa gago, o ka ne a sa bua le fa e le sepe, mme fa a buile sengwe a se ka a se bua gape.

₁₅Ipoletse tsala ya gago, gonne gantsi se O se utlwileng e a bo e le tshebo ya kakelo fela. Ke gone ka moo O se ka wa nna wa dumela sengwe le sengwe se O se utlwang.

₁₆Motho go gongwe o bua phoso, fela a ne a sa ikaelela go e bua; le gone ke mang wa rona yo o iseng a ke a leofe ka puo?

₁₇O ipoletse mokaulengwe wa gago pele ga O mmopela, mme O letle molao wa Mogodimodimo yo o sa galefeng, gore o dire tiro ya one.

₁₈Poifo ya Morena ke tshimologo ya bopelonomi mme botlhale gape bo re bapalela lorato lwa gagwe.

₁₉Kitso ya melao ya Morena ke thuto e e tshedisang; botlhe ba ba dirang se se mo itumedisang ba fula maungo a bosašweng.

₂₀Botlhale jotlhe ke go boifa Morena, mme go nna botlhale ke go diragatsa molao.

₂₁Motlhanka yo o rayang mongwagwe a re, “Ga nkitla ke dira se O se batlang”, le fa e re morago a se dira, o kgopisa yo o mo otlang.

₂₂Fela go nna le thuto ya bosula ga se botlhale, mme ga go na katlholo e e botlhajana mo kgakololong ya baleofi.

₂₃Go na le tlhalefonyana nngwe e e bosula; mongwe le mongwe yo o se nang botlhale ke sematla.

₂₄Go botoka go nna le tlhaloganyo e nnye fela O tletse poifo, go na le go nna le botlhajana jo bontsi mme O tlola Molao.

₂₅Go na le tlhalefo nngwe e e manontlhotlho, fela e e tsalang tshiamololo; go na le batho ba a tle ba dirise bopelotšhweu mašwe fela gore ba tle ba beye kgetsi ya bone sentle.

₂₆Motho yo mongwe o ka tsamaya e kete o ikobile ka kutlobotlhoko, mo teng ga gagwe go se na sepe fa e se bolotsana fela.

₂₇O iphitlha sefatlhogo a bo a ipaya jaaka e kete ke susu, fela fa O itebala o go ja ntsoma.

₂₈Motho yo o ka nna a gopola gore ga a na thata ya go leofa fela fa nako e e mo siametseng e tlhaga o dira phoso.

₂₉Motho o itsiwe ka tebego ya gagwe; motho yo o akanyang O mmona fela mo sefatlhogong.

₃₀Diaparo tsa motho di ka go bolelela gore tiro ya gagwe ke eng, mme motsamao wa motho o ka nna wa go bolelela se a leng sone.