SIRAKA 12

₁Fa O dira bomolemo bongwe O itse gore O bo direla mang, mme ditiro tsa gago tse di molemo ga di na go itshenyegela fela.

₂O direle mosiami bomolemo, mme O tlaa duelwa, fa O sa duelwe ke ene, ruri Mogodimodimo ene o tlaa go duela.

₃Ga go na bomolemo bope jo bo tlaa diragalelang motho yo o ganelelang mo bosuleng, kgotsa yo o ganang go atšwa ba bangwe.

₄O fe mosiami, fela O se ka wa bo wa thusa moleofi.

₅O direle moikokobetsi bomolemo, fela O se ka wa bo wa fa moikepi sepe. O mo time dijo, O se ka wa bo wa mo ngathela, e se re kgotsa tsa mo nonotsha go go feta, O bo O tloge O duelwe ka bosula go menaganye gantsi, ka ntlha ya bomolemo jotlhe jo O bo mo diretseng.

₆Gonne Mogodimodimo ka boene o tlhoile baleofi, mme o tlaa otlhaya baikepi.

₇O fe mosiami, fela O se ka wa bo wa thusa moleofi.

₈Mo letlepung ga O kake wa bo wa itse tsala ya boammaaruri, le gone mo pitlaganong ga O kake wa tlhoka go lemoga mmaba.

₉Fa motho a tshela sentle baba ba gagwe ba utlwa botlhoko, mme fa a le mo mathateng, le tsala ya gagwe tota e a mo katoga.

₁₀O se ka wa bo wa ikanya mmaba, gonne bosula jwa gagwe bo tshasa lešwe fela jaaka ruse ya kgotlho.

₁₁Le fa a ka bo a ikokobetsa jang, a tla a obame, a gagaba, O ikgape, O itise mo go ene. O mo tseye fela jaaka e kete O phimola seipone, mme O tla lemoga gore boitšhwaro jwa gagwe ga bo kitla bo nnela ruri.

₁₂O se ka wa mmapisa nao, e se re kgotsa a go diga a bo a tsaya maemo a gago. O se ka wa mmaya kafa letsogong le le siameng la gago, e se re kgotsa a tloga a leka go go tseela maemo, mme ya re kgabagare wa lemoga gore ke ne ke bua boammaaruri, wa ba wa utlwa manokonoko a se ke se go boleletseng.

₁₃Ke mang yo o ka tlhomogelang motho yo o tlakisang dinoga, fa a longwa ke noga pelo kgotsa yo o ikanegelang dibatana tsa naga?

₁₄Jalo he, ga go na ope yo o tlaa tlhomogelang motho yo o itsalanyang le moleofi pelo, a bo a tlhakanela nae dibe tsa gagwe.

₁₅O tlaa sala le wena lobakanyana fela, mme fa O ka ba wa reketla, ga a kitla a itshoka.

₁₆Mmaba o ka nna loleme lo lo borethe, mme mo pelong ya gagwe a ntse a ikaeletse go go digela mo khuting. Mmaba o ka nna a na le dikeledi mo matlhong, fela fa a ka bona nako e e mo siametseng le go tsholola madi tota ga go kitla go mo kgorisa.

₁₇Fa O welwa ke bomadimabe, O tla mmona a eme fa pele ga gago, mme e tlaa re a ipaya e kete o a go thusa, a go kgope.

₁₈O tlaa komakoma ka tlhogo, a ope diatla, a sebake, a go sinalle.