SIRAKA 11

₁Botlhale jwa mohumanegi bo tlaa nna bo tsholeditse tlhogo ya gagwe. mme bo mmeye mo gare ga bagolwane ₂O se ka wa bokela motho bontle jwa gagwe, kgotsa wa sinalela yo mongwe ka ntlha ya popego ya gagwe.

₃Notshe e nnyennyane mo dibopiweng tse di fofang. Fela se se tšwang mo go yone se monate go feta monate wa dilo tse dingwe.

₄O se ka wa ipoka ka mokgabo wa gago, kgotsa wa ikgodisa mo letsatsing le O tlotliwang ka lone, gonne ditiro tsa Morena di gakgamatsa ka bontle, le mororo di fitlhetšwe batho.

₅Dikgosi tse dintsi di kile tsa nnisiwa fa fatshe, mme motho yo go neng go se ope yo o mo akanyeditseng a rwala serwalo sa bogosi.

₆Bagapa-maikutlo ba le bantsi ba kile ba šwabisiwa gotlhelele, mme batho ba maemo ba fenngwa ke ba bangwe.

₇O se ka wa ne O bona molato, O ise O tlhotlhomise sentle; akanya pele, e be e le gone O kgalemelang.

₈O arabe O sena go utlwa sentle, le gone O se ka wa tsena motho mo ganong.

₉O se ka wa ganetsana ka selo se se sa go ameng, kgotsa wa tsenatsena mo dikgogaganong tsa baleofi.

₁₀Morwaaka, O se ka wa itšhwenya ka dilo tse dintsi, go dira ditiro tse dintsi go tlaa go bogisa. O ka itlhaganela jaaka O ka kgona, fela ga O kitla O goroga. Le gone ga O kitla O falola ka go sia.

₁₁Motho o a tle a dire ka natla, a tseye matsapa a gatele pele, fela a iphitlhele a ntse a gaisiwa.

₁₂Yo mongwe ke mothonyana wa batho fela, yo o tlhokang go thusiwa, yo o mo lehumeng le le boitshegang, fela Morena o mo leba ka tsalano, o mo emisa ka dinao, o a mo tsholetsa, a mo ntsha maemong a a kwa tlase ao a gagwe, ₁₃O mo thusa go tsamaya a kgothetse, mo go a bong go gakgamatse batho ba bantsi.

₁₄Bomolemo le bosula, botshelo le loso, lehuma le khumo, dilo tse tsotlhe di tšwa mo Moreneng.

₁₅Botlhale, tlhaloganyo, le kitso ya Molao, dilo tse tsotlhe di tšwa mo Moreneng, lorato le go dira ditiro tse di molemo le tsone di tšwa mo go ene.

₁₆Boeleele le lefifi tsone di ne tsa bopelwa baleofi, ba ba itumelelang bosula ba golela mo go jone.

₁₇Neo ya Modimo e nnela ruri mo basiaming, mme go rata ga one go naya botshelo jo bontle ka bosafeleng.

₁₈Motho mongwe o huma ka go ikokoanyetsa dilo le ka bopelotshetlha mme tuelo e a duelwang ka yone ke e: ₁₉fa a re, “Ke bonye boikhutso, jaanong nka ja dilo tsa me monate,” mme a sa itse gore o saletšwe ke nako e e kaee a bo a di tlogelela ba bangwe, a šwa.

₂₀Itshokele tiro e O tšhwanetseng go e dira, O itumelele go e dira, O bo O tsofalele mo go direng tiro ya gago.

₂₁O se ka wa gakgamalela go kgona ditiro ga moleofi; wena ikanye Morena, O dire tiro e O tšhwanetseng go e dira, gonne go bonolo mo Moreneng gore a humise mohumanegi ka ponyo ya leitlho le ka tshoganyetso.

₂₂Mosiami o duelwa ka tshegofatso fa Morena, mme ka ponyo ya leitlho Modimo o tlhagisa tshegofatso ya gagwe.

₂₃O se ka wa bo wa re, “Ke tlhokang, maungo a me ke eng mo nakong e e tlang?”

₂₄Le gone O se ka wa re, “Ke itsholetse, ditatlhegelo tsa me e ka nna eng mo nakong e e tlang?”

₂₅Ka nako ya letlepu, ditatlhegelo di a lebalwa, ka nako ya tatlhegelo, ga go na ope yo o gakologelwang letlepu.

₂₆Le fa go ntse jalo go bonolo mo Moreneng go duela motho ka letsatsi le a šwang ka lone, ka mo boitshwaro jwa gagwe bo tšhwanelwang ka teng.

₂₇Pitlagano ya nakonyana fela e ka lebatsa boitumelo; ka nako ya bofelo ya motho ditiro tsa gagwe di tla senoga.

₂₈O se ka wa re motho o sego pele ga a šwa. Motho o tla itsiwe fela ka nako ya go fela ga gagwe.

₂₉O se ka wa tsisa mongwe le mongwe mo gae, gonne dirai tsa molotsana di dintsi.

₃₀Pelo ya moikgantshi e tšhwana le seoka-lesogo se le mo serotong; O laletse go wa ga gago jaaka senokwane.

₃₁Mosebi o sokamisetsa tshiamo mo bosuleng, o lešwefatsa se se tšhwanetseng go bokiwa.

₃₂Magala a a tukang a tšwa mo tlhasenyaneng ya molelo; moleofi o laletse nako e e mo siametseng gore a bolaye.

₃₃O itlhokomele mo molotsaneng le mo maanonyaneng a gagwe a a bosula, e se re kgotsa a go tlontlololela ruri.

₃₄Fa O tsenya moeng mo lwapeng lwa gago, o tlaa go tšhwenya, a bo a go fapaanye le ba lolwapa lwa gago.