DIPESALEME 118

₁Lebogang Morena,

gonne o molemo;

gonne bopelotlhomogi jwa gagwe

ke jo bo sa khutleng.

₂A Iseraele a bue a re:

“Ee, bopelotlhomogi jwa gagwe

ke jo bo sa khutleng.”

₃A boora Arone ba bue ba re:

“Ee, bopelotlhomogi jwa gagwe

ke jo bo sa khutleng.”

₄A ba ba boifang Morena

ba bue ba re:

“Ee, bopelotlhomogi jwa gagwe

ke jo bo sa khutleng.”

₅Ke ne ka bitsa Morena

ke le mo pitlaganong;

Morena a nkaraba,

a mpaya mo go atlhameng.

₆Morena o ntlheng ya me,

ga nkitla ke boifa;

kana motho a ka ntirang?

₇Morena o ntlheng ya me,

ke mothusi wa me;

mme nna ba ba ntlhoileng

ke tla ba tlhaetsa matlho.

₈Go nna mo tshireletsong

ya Morena

go gaisa go ikanya batho.

₉Go nna mo tshireletsong

ya Morena

go gaisa go ikanya batlotlegi.

₁₀Baheitane botlhe

ba ne ba ntsentse gare;

mme ke ba remagantse

ka leina la Morena.

₁₁Ba ne ba mpotile ntlheng tsotlhe;

ee, ba ntikanyeditse;

mme ke ba remagantse

ka leina la Morena.

₁₂Ba ne ba ntikanyeditse

jaaka dintsi tsa dinotshe,

ba tuka jaaka molelo wa mitlwa;

mme ke ba remagantse

ka leina la Morena.

₁₃Ke ne ka kgaramediwa thata

gore ke we,

mme Morena a nthusa.

₁₄Morena ke thata ya me

le sefela sa me sa pako,

o diregile pholoso ya me.

₁₅Lentswe la tuduetso le la pholoso

le mo matlong a basiami.

“Letsogo la Morena le le jang

le dira ditiro tsa bonatla.

₁₆Letsogo la Morena le le jang

le a godisa;

letsogo la Morena le le jang

le dira ditiro tsa bonatla.”

₁₇Ga ke ne ke swa, mme ke tla phela,

ke bolela ditiro tsa Morena.

₁₈Morena o nkwatlhaile segolo,

mme ga a ka a nneela mo losong.

₁₉Mpuleleng dikgoro tsa tshiamo,

ke tle ke tsene ka tsona,

ke leboge Morena.

₂₀Kgoro ya Morena ke e;

basiami ba tla tsena ka yona.

₂₁Ke tla go leboga,

ka gonne o nkutlwile,

wa nna pholoso ya me.

₂₂Lentswe le le latlhilweng ke baagi

le diregile letlapa la sekhutlo.

₂₃Se ke se se dirilweng ke Morena;

mme ke kgakgamatso mo matlhong

a rona.

₂₄Letsatsi le,

ke le le dirilweng ke Morena;

a re ipeleng, re itumele ka lone.

₂₅Ao Morena, a ko o thuse!

Ao Morena, a ko o tsweletse pele!

₂₆A go bakwe yo o tlang

ka leina la Morena;

re lo tshegofatsa,

re le mo Ntlong ya Morena.

₂₇Morena ke Modimo,

mme o re neile lesedi.

Bofang seruiwa sa tlhabelo

ya moletlo

ka dikgole gore se fitlhe

fa dinakeng tsa aletare.

₂₈O Modimo wa me, ke tla go baka;

o Modimo wa me, ke tla go godisa.

₂₉Lebogang Morena,

gonne o molemo;

le bopelotlhomogi jwa gagwe

ke jo bo sa khutleng.