DIPESALEME 119

₁Go sego bona ba ditsela tsa

bona di itekanetseng,

ba ba tsamayang ka fa molaong

wa Morena.

₂Go sego ba ba tlhokomelang

ditshupo tsa gagwe,

ba ba mmatlang ka pelo yotlhe,

₃ee, bona ba ba sa direng

tshiamololo,

mme ba tsamaya mo ditseleng

tsa gagwe.

₄Ditaolo tsa gago o di ntshitse

gore di tlhokomelwe ruri.

₅E kete ditsela tsa me

di ka bo di tlhomame

go tlhokomela melao ya gago.

₆Foo nka bo ke sa tlhajwe

ke ditlhong,

fa nka bo ke tlhokomela

ditaelo tsa gago tsotlhe.

₇Ke tla go leboga

ka boammaaruri jwa pelo,

fa ke ithuta dithulaganyo

tse di siameng tsa gago.

₈Melao ya gago

ke tla e ela tlhoko.

A o ko o se ka

wa ntlogelela ruri.

₉Lekau le ka boloka bophepa

jwa tsela ya lone jang?

Ka go e lebanya le Lefoko

la gago.

₁₀Ke go batla ka pelo yotlhe;

se ntese ka fapoga ditaelo

tsa gago.

₁₁Ke bolokile Lefoko la gago

mo pelong ya me

gore ke se ka ka go leofela.

₁₂A go bakwe wena, Morena,

nthuta melao ya gago.

₁₃Ditao tsotlhe tsa molomo wa gago

ke di boletse ka molomo.

₁₄Ke itumelela tsela

ya ditshupo tsa gago

bogolo go mefutafuta ya dikhumo.

₁₅Ke tla akanya ditaolo tsa gago

ke ele ditselana tsa gago tlhoko.

₁₆Ke tla natefelwa ke melao ya gago,

ga nkitla ke lebala Lefoko la gago.

₁₇Ntirele molemo ke le motlhanka

wa gago gore ke phele,

ke tle ke boloke Lefoko la gago.

₁₈Mpudulola matlho

gore ke itse go bona dikgakgamatso

mo molaong wa gago.

₁₉Ke moeng mo lefatsheng;

o se ka wa mphitlhela

ditaelo tsa gago.

₂₀Mowa wa me o nyoretswe

ditao tsa gago ka gale.

₂₁O bôpetse baikgogomosi,

ba ba hutsitsweng

ba ba fapogang ditaelo tsa gago.

₂₂Pitikolola kgobo le nyatsego

mo go nna;

gonne ke tshegeditse

ditshupo tsa gago.

₂₃Le fa dikgosi

di nnetse go ntogela maano,

motlhanka wa gago

ena o akanya melao ya gago.

₂₄Ee, ditshupo tsa gago

di monate mo go nna,

di a nkgakolola.

₂₅Mowa wa me o kgomaretse lorole.

A o ko o mphedise

ka fa Lefokong la gago.

₂₆Ke boletse ditsela tsa me,

mme wa nkutlwa.

A o ko o nthute melao ya gago.

₂₇Ntlhaloganyetse tsela

ya ditaolo tsa gago,

mme ke tla akanya

dikgakgamatso tsa gago.

₂₈Mowa wa me o ntsha dikeledi

ka ntlha ya bohutsana,

nnamolola ka fa Lefokong la gago.

₂₉Tsela ya maaka

e beele kgakala le nna,

o ntlhogonolofatse

ka molao wa gago.

₃₀Tsela ya boammaaruri

ke yona ke e itlhophetseng,

ka baya ditao tsa gago

fa pele ga me.

₃₁Ke ngaparetse ditshupo tsa gago,

Morena,

a ke se tlhajwe ke ditlhong.

₃₂Ke taboga mo tseleng

ya ditaelo tsa gago;

gonne o oketsa pelo ya me.

₃₃Morena,

nthute tsela ya melao ya gago,

mme ke tla e tseela ruri

go ya bokhutlong.

₃₄Nnaya tlhaloganyo,

ke tle ke boloke molao wa gago,

ke o tlhokomele ka pelo yotlhe.

₃₅Ntsamaise mo tseleng

ya ditaelo tsa gago;

gonne e a nkgatlha.

₃₆Sekegela pelo ya me

kwa ditshupong tsa gago,

mme e seng kwa boikhumisong.

₃₇Faposa matlho a me

gore a se ka a leba tsa boithamako,

o mphedise mo ditseleng tsa gago.

₃₈Dirafaletsa motlhanka wa gago

tsholofetso ya gago

e e lebanyeng ba ba go boifang.

₃₉Tlosa mo go nna

kgobo e ke e tshabang;

gonne dikatlholo tsa gago di siame.

₄₀Ruri ke tlhologeletswe

ditaolo tsa gago.

Mphedise ka tshiamo ya gago.

₄₁A mapelotlhomogi a gago

a ntirafalele, Morena,

e bong pholoso ya gago

ka fa Lefokong la gago,

₄₂gore ke tle ke fetole ene

yo o nkgobang;

gonne ke ikanya Lefoko la gago.

₄₃Mme Lefoko la nnete o se ka wa le

tlosetsa ruri mo molomong wa me;

gonne ke lebeletse

dikatlholo tsa gago.

₄₄Foo ke tla nna ke tlhokomela

molao wa gago

ka gale le ka bosakhutleng.

₄₅Ke rata go sepela fa go atlhameng;

gonne ke batla ditaolo tsa gago.

₄₆Ke tla bua ka ga ditshupo tsa gago

fa pele ga dikgosi,

ke sa tlhajwe ke ditlhong.

₄₇Ke natefelwa ke ditaelo tsa gago

tse ke di ratang.

₄₈Ke tla tsholeletsa mabogo

kwa ditaelong tsa gago

tse ke di ratang,

ke akanya melao ya gago.

₄₉Gopola Lefoko le o le buileng

le motlhanka wa gago,

wa re ke se le lebale.

₅₀Ke yona kgomotso ya me

mo pogisegong ya me,

fa tsholofetso ya gago e mphedisa.

₅₁Baikgogomosi ba ntshotlile thata;

mme ga ke a ka ka fapoga

molao wa gago.

₅₂Ke ne ka gakologelwa dikatlholo

tsa gago tsa bogologolo,

Morena, ka ikgomotsa.

₅₃Ke ne ka tuka bogale

ka ntlha ya baikepi

ba ba tlogelang molao wa gago.

₅₄Melao ya gago

e mphetogetse difela

mo ntlong ya me ya boeng.

₅₅Ke lala ke gakologelwa

leina la gago, Morena,

ke tlhokomela molao wa gago.

₅₆Ga nna kabelo ya me,

ka ke tlhokometse ditaolo tsa gago.

₅₇Morena ke kabelo ya me;

ke rile,

ke tla tlhokomela mafoko a gago.

₅₈Ke ne ke lelela sefatlhegong

sa gago ka pelo yotlhe;

ntlhomogele pelo

ka fa tsholofetsong ya gago.

₅₉Ke akantse metsamao ya me,

ka busetsa dinao tsa me

kwa ditshupong tsa gago.

₆₀Ka itlhaganela, ka se ka ka diega

go tlhokomela ditaelo tsa gago.

₆₁Megala ya baikepi e ntharile;

mme ga ke a ka ka lebala

molao wa gago.

₆₂Ke tsoga gare ga bosigo go go

galaletsa ka ntlha ya dikatlholo

tse di siameng tsa gago.

₆₃Ke monkane wa botlhe

ba ba go boifang,

le wa bona ba ba tlhokomelang

ditaolo tsa gago.

₆₄Morena, lefatshe le tletse

bopelonomi jwa gago.

Nthute melao ya gago.

₆₅Morena, o diretse

motlhanka wa gago molemo

ka fa Lefokong la gago.

₆₆Nthute bopelotheri le kutlwisiso

le kitso,

gonne ke dumela ditaelo tsa gago.

₆₇E rile ke ise ke kokobediwe,

ka timela;

mme jaanong ke tlhokometse

polelo ya gago.

₆₈O molemo, o bile o dira molemo;

nthute melao ya gago.

₆₉Baikgogomosi ba mpharile

ka maaka;

mme nna ke tlhokomela

ditaolo tsa gago ka pelo yotlhe.

₇₀Dipelo tsa bona di nonne,

ga di utlwe sepe;

mme nna ke kgatlhwa ke molao

wa gago.

₇₁Go ne go le molemo mo go nna

go kokobediwa

gore ke ithute melao ya gago.

₇₂Molao wa molomo wa gago,

mo go nna o gaisa dikete tsa gouta

le selefera.

₇₃Diatla tsa gago di mpopile

tsa mpaakanya.

Ntlhalefise gore ke ithute

ditaelo tsa gago.

₇₄Ba ba go boifang ba a mpona,

ba a itumela,

ka ke lebeletse Lefoko la gago.

₇₅Morena, ke a itse,

fa dikatlholo tsa gago di siame,

mme o nkwatlhaile ka boikanyo.

₇₆Tswetswe a bopelontle jwa gago

bo nkgomotse,

ka fa o solofeditseng

motlhanka wa gago ka teng.

₇₇A mautlwelo-botlhoko a gago

a mpharafare gore ke phele

gonne molao wa gago

ke boitumelo jwa me.

₇₈A baikgogomosi

ba tlhajwe ke ditlhong,

ka ba ntshiamololetse

ba se na lebaka;

mme nna ke tla akanya

ditaolo tsa gago.

₇₉A bona ba ba go boifang

ba boele kwa go nna,

le bona ba ba itseng ditshupo

tsa gago.

₈₀A pelo ya me e nne mo melaong

ya gago, e itekanetse,

gore ke se ka ka tlhajwa

ke ditlhong.

₈₁Mowa wa me o nyoretswe

pholoso ya gago;

ke lebeletse Lefoko la gago.

₈₂Matlho a me a tlhoafaletse

polelo ya gago a re:

“O tla nkgomotsa leng?”

₈₃Gonne le fa ke ntse jaaka lekuka

mo musing,

ga ke a ka ka lebala melao ya gago.

₈₄Malatsi a motlhanka wa gago

a kae?

Ba ba ntlhomereng

o tla ba atlhola leng?

₈₅Baikgantshi ba nkepetse mamena,

ba ba seng ka fa molaong wa gago.

₈₆Ditaelo tsotlhe tsa gago

di boammaaruri.

Ba mpogisa ka bomo; nthuse.

₈₇Ba batlile go nnyeletsa

mo lefatsheng;

mme nna ga ke a ka ka tlogela

ditaolo tsa gago.

₈₈A o ko o mphedise

ka fa bopelonoming jwa gago

gore ke tlhokomele tshupo

ya molomo wa gago.

₈₉Morena, Lefoko la gago

le eme ka tlhomamo

mo legodimong ka bosakhutleng.

₉₀Boikanyego jwa gago

ke jwa losika longwe le longwe;

o tlhomamisitse lefatshe,

mme le ntse le eme.

₉₁Le kajeno di sa ntse di eme

ka fa dithulaganyong tsa gago;

gonne dilo tsotlhe di a go direla.

₉₂Fa molao wa gago

e ka bo e ne e se boitumelo jwa me,

foo nka bo ke latlhegile

mo tlhorisegong ya me.

₉₃Ga nkitla ke lebala ditaolo tsa gago

ka gope;

gonne o mphedisitse ka tsona.

₉₄Ke wa gago, nthuse;

gonne ke batla ditaolo tsa gago.

₉₅Baikepi ba ntaletse go nnyeletsa.

Ditshupo tsa gago

ke a di tlhokomela.

₉₆Ke bonye bokhutlo jwa tsotlhe

tse di itekanetseng,

mme taelo ya gago

ga e na mafelelo.

₉₇Molao wa gago

ke o rata thata jang!

Ke o akanya letsatsi lotlhe.

₉₈Taelo ya gago e ntlhalefisa

go gaisa baba ba me;

gonne ke ya me ka bosakhutleng.

₉₉Ke tlhalefile

go gaisa baruti ba me botlhe;

gonne ditshupo tsa gago

ke tsona tse ke di akanyang.

₁₀₀Ke phala bagolo ka tlhaloganyo;

gonne ke tlhokometse

ditaolo tsa gago.

₁₀₁Ke thibile dinao tsa me mo tseleng

nngwe le nngwe e e bosula

gore ke tlhokomele Lefoko la gago.

₁₀₂Ga ke a ka ka fapoga

ditao tsa gago;

gonne o nthutile.

₁₀₃Ditsholofetso tsa gago

di monate jang

mo magalapeng a me;

di botshe go gaisa mafura

a dinotshe

mo molomong wa me!

₁₀₄Ke bona tlhaloganyo

ka ditaolo tsa gago;

ke ka ntlha ya moo ke tlhoileng

tsela nngwe le nngwe ya maaka.

₁₀₅Lefoko la gago ke lobone

lwa dinao tsa me,

le lesedi la tsela ya me.

₁₀₆Ke ikanne, ka ba ka dirafatsa

go tlhokomela dithulaganyo

tse di siameng tsa gago.

₁₀₇Ke obegile thata.

Morena, mphedise

ka fa Lefokong la gago.

₁₀₈Morena, a o ko o natefelwe ke tse

molomo wa me o di go ntshetsang

ka bopelotshweu,

mme o nthute

tse di ntshwanetseng.

₁₀₉Bophelo jwa me

bo mo dipharagobeng ka gale;

mme molao wa gago ona

ga ke a ka ka o lebala.

₁₁₀Baikepi ba nthaisitse ka serai;

mme ga ke a ka ka fapoga

ditaolo tsa gago.

₁₁₁Ditshupo tsa gago ke boswa

jwa me ka bosakhutleng;

gonne tsona ke boitumelo

jwa pelo ya me.

₁₁₂Pelo ya me e palelela

mo go diriseng melao ya gago

ka gale go ya bosakhutleng.

₁₁₃Ba ba pelo-pedi ke ba tlhoile,

mme molao wa gago ona

ke a o rata.

₁₁₄O tshireletso ya me le thebe ya me;

ke lebeletse Lefoko la gago.

₁₁₅Tlogang fa go nna,

basulafatsi ke lona,

gore ke tlhokomele

ditaelo tsa Modimo wa me.

₁₁₆Ntshegetsa ka fa tsholofetsong

ya gago gore ke phele;

se ntlhabise ditlhong

ka ntlha ya tsholofelo ya me.

₁₁₇Ntshegetsa gore ke phologe,

mme ke tla itumelela

melao ya gago ka gale.

₁₁₈Botlhe ba ba fapogang

melao ya gago o a ba latlha;

gonne tsietso ya bona

ke maaka fela.

₁₁₉Baikepi botlhe ba lefatshe

o ba kokola jaaka manyela;

ke ka moo ke ratang

ditshupo tsa gago.

₁₂₀Mmele wa me o roromisiwa

ke go go tshaba;

ke boifa dikatlholo tsa gago.

₁₂₁Ke dirile ka molao le tshiamo.

O se ka wa ntlogelela

bapatiki ba me.

₁₂₂Emela motlhanka wa gago

gore a phele sentle;

a ba ba matepe ba se nkgatelele.

₁₂₃Matlho a me

a eleditse pholoso ya gago

le tsholofetso e e siameng ya gago.

₁₂₄Direla motlhanka wa gago

ka fa bopelonoming jwa gago,

o nthute melao ya gago.

₁₂₅Ke motlhanka wa gago;

ntlhalefise gore ke lemoge

ditshupo tsa gago.

₁₂₆Ke nako ya Morena

ya go itshupa ka tiro;

ba robagantse molao wa gago.

₁₂₇Ke ka ntlha ya moo

ke ratang ditaelo tsa gago

go feta gouta

le gouta e e sa pekwang.

₁₂₈Ke ka ntlha ya moo ke kayang

ditaolo tsotlhe tsa gago tshiamo;

mme ke tlhoile tsela nngwe

le nngwe ya maaka.

₁₂₉Ditshupo tsa gago di a gakgamatsa;

ke ka ntlha ya moo,

fa mowa wa me o di boloka.

₁₃₀Tlhaloso ya mafoko a gago

e a sedimosa,

e tlhalefisa ba ba se nang kitso.

₁₃₁Ke kopolola molomo, ke kgalegile;

gonne ke tlhologeletswe

ditaelo tsa gago.

₁₃₂Retologela kwa go nna,

o ntlhomogele pelo

jaaka go tshwanetse

ba ba ratang leina la gago.

₁₃₃Tiisa dikgato tsa me,

ke tle ke sepele ka fa Lefokong

la gago;

mme a ke se laolwe

ke boikepo bope.

₁₃₄Nkgolole mo patikong ya batho,

ke tle ke ele ditaolo tsa gago

tlhoko.

₁₃₅Phatsimisetsa motlhanka wa gago

sefatlhego sa gago,

o nthute melao ya gago.

₁₃₆Matlho a me a ela dinokana

tsa metsi,

ka ba sa dirise molao wa gago.

₁₃₇O tshiamo, Morena,

le dikatlholo tsa gago ke tsa nnete.

₁₃₈O laetse ditshupo tsa gago

ka tshiamo le ka boikanyego

jo bogolo.

₁₃₉Ke jelwe ke tlhoafalo ya me,

ka baganetsi ba me ba lebetse

mafoko a gago.

₁₄₀Lefoko la gago le itshekile thata;

mme motlhanka wa gago

o a le rata.

₁₄₁Ke monnye, ke bile ke a nyatsega;

mme ditaolo tsa gago

ga ke di lebale.

₁₄₂Tshiamo ya gago ke tshiamo

e e sa khutleng,

molao wa gago ke boammaaruri.

₁₄₃Tlalelo le pitlaganyo di nkwetse,

mme ditaelo tsa gago

di njesa monate.

₁₄₄Ditshupo tsa gago ke tsa tshiamo

ka bosakhutleng.

Ntlhalefise gore ke phele.

₁₄₅Ke rapetse ka pelo yotlhe ka re:

Nkutlwe, Morena;

ke tla tlhokomela melao ya gago.

₁₄₆Ke goetse go wena ka re:

Nthusa mme ke tla ela ditshupo

tsa gago tlhoko.

₁₄₇Ke rakile mahube a moso,

ka goela thuso;

ke lebeletse mafoko a gago.

₁₄₈Matlho a me a rakile nako ya ditiso

tsa bosigo

gore ke akanye polelo ya gago.

₁₄₉Utlwa lentswe la me

ka fa bopelonoming jwa gago;

Morena, mphedise

ka fa tshiamisong ya gago.

₁₅₀Ba ba ntlhomereng ka bolotsana

ba atametse,

bona ba ba kgakala

le molao wa gago.

₁₅₁Wena, Morena, o gaufi,

ditaelo tsa gago tsotlhe

ke tsa boammaaruri.

₁₅₂Ga ke bolo go itse

ka ditshupo tsa gago

gore o di tlhomamiseditse

go ya bosakhutleng.

₁₅₃Leba tlhorisego ya me, o nthuse;

gonne ga ke lebale molao wa gago.

₁₅₄Nkemele mo tshekong ya me,

o nkgolole,

o mphedise ka fa tsholofetsong

ya gago.

₁₅₅Pholoso e kgakala le baikepi;

gonne ga ba batle melao ya gago.

₁₅₆Morena, mautlwelo-botlhoko

a gago a magolo.

Mphedise ka fa ditshiamisong

tsa gago.

₁₅₇Ba ba ntlhomereng

le baganetsi ba me ba bantsi;

le fa go ntse jalo ga ke fapoge

ditshupo tsa gago.

₁₅₈E a re fa ke bona

ba ba sa ikanyegeng, ba ntene,

ka ba sa tlhokomele polelo ya gago.

₁₅₉Bona, ke rata ditaolo tsa gago;

Morena, o mphedise

ka fa bopelonoming jwa gago.

₁₆₀Kakaretso ya Lefoko la gago

ke boammaaruri;

dithulaganyo tsotlhe tse di siameng

tsa gago ke tse di sa khutleng.

₁₆₁Babusi ba ntlhomere ka bomo,

mme pelo ya me e boifa

mafoko a gago fela.

₁₆₂Ke itumelela polelo ya gago

jaaka mongwe yo o bonang

thopo e kgolo.

₁₆₃Maaka ke a tlhoile, ke a a sisimoga;

mme molao wa gago ke a o rata.

₁₆₄Ke go baka gasupa ka letsatsi

ka ntlha ya ditshiamiso

tse di siameng tsa gago.

₁₆₅Ba ba ratang molao wa gago

ba na le kagiso e kgolo;

ga ba na se se ba kgopisang.

₁₆₆Ke solofetse pholoso ya gago,

Morena,

ke dirile ka fa ditaelong tsa gago.

₁₆₇Mowa wa me o tlhokometse

ditshupo tsa gago,

mme ke di rata thata.

₁₆₈Ke tlhokometse ditaolo tsa gago

le ditshupo tsa gago;

gonne ditsela tsa me tsotlhe

di fa pele ga gago.

₁₆₉Morena, a selelo sa me

se atamele fa pele ga gago;

ntlhalefise ka fa Lefokong la gago.

₁₇₀A mekokotlelo ya me

e fitlhe fa pele ga gago;

mpholose ka fa polelong ya gago.

₁₇₁Molomo wa me o tla opela

ka ga Lefoko la gago;

gonne ditaelo tsa gago tsotlhe

di siame.

₁₇₂Loleme lwa me lo tla opela

ka ga Lefoko la gago;

gonne ditaelo tsa gago tsotlhe

di siame.

₁₇₃A letsogo la gago le nthuse;

gonne ke itlhaoletse

ditaolo tsa gago.

₁₇₄Morena, ke tlhologeletswe

pholoso ya gago;

molao wa gago o njesa monate.

₁₇₅A mowa wa me o phele

gore o go bake,

mme a ditshiamiso tsa gago

di nthuse.

₁₇₆Ke latlhegile jaaka nku

e e timetseng;

a o ko o batle motlhanka wa gago;

gonne ditaelo tsa gago

ga ke di lebale.