Thapelo ya ga Judithe
1Ke fa Judithe a itigela fatshe ka sefatlhogo a itshelaka tlhogo ka melora a bipolola letsela le le magwata le a neng a le apere ka fa teng, a tlhaeletsa Morena. Mo Jerusalema ka yone nako eo maswalo a maitsiboa e ne e tshujwa mo Tempeleng ya Modimo.
Judithe a re:
2“Morena Modimo wa ga rraetsho Simeone,
O ne wa mo naya sebetsa sa lerumo go ipusolosetsa mo bathong ba sele
ba ba neng ba hunolola moikgatlho wa kgarebane go e tlhabisa ditlhong
ba e tsola serope go e tlhakanya tlhogo
ba e lešwefatsa popelo go e tlontlolola
gonne le mororo O ne O rile ‘Selo se, se se ka sa bo sa dirwa’
bone ba ne ba se dira.
3Ka ntlha ya selo se O ne wa dira gore baeteledipele ba bone ba bolawe
bolao jwa bone, jo bo neng bo lešwefaditšwe ke bolotsana jo ba neng ba bo dirile, bo tshasegelwe ke madi;
O ne wa digela dikgosana fa fatshe le balala,
dikgosana le batlhanka ba tsone.
4O ne wa tlogela basadi ba bone gore go siiwe ka bone,
barwadiabone ba gapiwe,
dithoto tsa bone di thopiwe, tsa bana ba O neng O ba rata,
ba ba neng ba go direla ka tlhwaafalo,
ba sa batle madi a bone a lešwefadiwa, ba bo ba go bitsa gore O thuse.
Modimo, Modimo wa me,
A le nna yo ke leng motlholagadi, O nkutlwe jaanong;
5gonne O dirile nako e e fetileng,
le se se diragalang jaanong jaana, le se se tlaa latelang.
O rulagantse se se leng gone, le se se tlaa nnang gone;
O ne wa tlhomaganya se se neng sa nna gone.
6Dilo tse O neng O ikaeletse go di dira di ne tsa ema fa pele ga gago,
Tsa re, ‘Bona, re fano!’
Gonne ditsela tsa gago tsotlhe di baakanyediwa ruri,
le dikatlholo tsa gago di dirwa ka ponelo-pele.
7A O ko O bone Maasiria, a ikgantsha ka mophato wa one,
a itlotlomatsa ka dipitse tsa one le bapagami ba one,
a leletsa thata ya batlhabani-batsamai ba one mogolokwane,
A ikantse thebe le segai,
bora le kgojana e e konopang,
mme ga a itse gore ke wena Morena yo o phatlakanyang dintwa;
8ke wena fela yo leina la gago e leng Morena.
Fedisa dikgoka tsa one ka thata ya gago,
e re O galefile O kokobetse thata ya one.
Gonne a ikaeletse go itshekolola mafelo a gago a a boitshepo
go lešwefatsa motlaagana,
boitapolosetso jwa leina la gago le le tlotlegang,
a bo a digela lonaka lwa aletare ya gago fa fatshe ka tshipi.
9A ko O bone boikgogomoso jwa one,
Digela bogale jwa gago mo godimo ga ditlhogo tsa one;
a ko O neye seatla se sa motlholagadi bopelokgale jo se bo tlhokang.
10Ka bolotsana jwa molomo wa me
O ko O digele molala le morena fa fatshe,
O dige morena le motlhanka wa gagwe.
O ba kokobetse ka seatla sa mosadi.
11Thata ya gago ga e tšwe mo bontsing,
kgotsa nonofo ya gago mo banneng ba ba dikgoka;
ka O le Modimo wa ba ba ikokobeditseng,
mothusi wa ba ba gateletšweng,
seikokotlelo sa ba ba bokoa,
botshabelo jwa balatlhegi,
mmoloki wa ba ba nyemileng moko.
12Tsweetswee, tsweetswee, Modimo wa ga rre,
Modimo wa bošwa jwa ga Iseraele,
Morena wa legodimo le lefatshe,
Motlhodi wa metsi,
Kgosi ya dibopiwa tsotlhe, a ko O utlwe thapelo ya me.
13A ko O nneye loleme lo lo boretšhana go utlwisa botlhoko le go bolaya botlhe ba ba logileng maano a a setlhogo
kgatlhanong le kgolagano ya gago,
kgatlhanong le felo ga gago fa go boitshepo,
kgatlhanong le Thaba ya Sione,
kgatlhanong le ntlo ya bomorwao.
14O ko O bontshe setšhaba sengwe le sengwe le morafe mongwe le mongwe,
gore ke wena Modimo, Modimo o o nang le thata yotlhe le nonofo yotlhe,
le gore ke wena fela o leng mosireletsi wa setšhaba sa Iseraele.”
