JUDITHE 10

₁Judithe o ne a bitsa Modimo wa Iseraele jaana. E rile a sena go fetsa go rapela, ₂a rapamologa mo a neng a rapame teng, a bitsa mohula wa gagwe mme a fologela mo matlwaneng a a neng a tle a a dirise mo malatsing a Sabata le a meletlo. ₃Moo, a feta a apola letsela le le magwata le a neng a le apere, mme ya re a sena go apola diaparo tsa gagwe tsa botlholagadi, a tlhapa mmele, a itshasa ditlolo tse di nkgang monate tsa tlhwatlhwa e e kwa godimo, a ipaakanya moriri sentle, a o thatha ka tukwi, a bo a apara mosese o a neng a tle a o apare ka malatsi a boitumelo fa monna wa gagwe Manesse a sa ntse a tshela. ₄A rwala borampheetšhane, a apara bompuane, a rwala maseka, mehitshana, manyenana, le majana a mantle a a tsabakelang a gagwe otlhe, a itira montle mo e leng gore o ne a kgatlha leitlho la monna mongwe le mongwe yo o neng a mmona. ₅Ke fa a naya mohula wa gagwe sejana se veine le sego sa mafura, a tlatsa kgetsi ka dipabi, ka lešwabi la maungo le borotho jo bo apeegileng sentle, mme e rile a sena go phuthela mofago otlhe a o mo neela le one. ₆Ba bo ba tšwa, ba ya ntlheng ya kgoro ya Bethulia. Foo, ba fitlhela Usia a letile a na le bagolwane ba babedi ba motse, bo-Kaberise le Karemise. ₇Ya re ba bona Judithe, sefatlhogo sa gagwe se fetogile le diaparo tsa gagwe di farologanye, ba tlhakanngwa tlhogo ke bontle jwa gagwe. Ba mo raya ba re,

₉Judithe a obamela Modimo, mme a re, “A lo ko lo direng gore ke bulelwe kgoro ya motse gore ke ke ke ye go dira jaaka lo eletsa.” Ba dira jaaka a ne a kopile mme ba laela makawana go mmulela kgoro. ₁₀Ya re se se sena go dirwa, Judithe a feta a patilwe ke mohula wa gagwe. Banna ba motse bone ba sala ba mo lebeletse a ntse a fologa thaba, a kgabaganya kgophu, go fitlhelela ba bo ba sa tlhole ba ka mmona.

₁₁Ke fa e re basadi ba ba ntse ba tlhamaletse jaana ba kgabaganya kgophu, lekoko la masole a a lebelelang a Maasiria le ba kgatlhantsha, ₁₂le re le sena go phamola Judithe le simolola go mmotsa le re, “O ka fa letlhakoreng lefe? O tšwa kae? O ya kae?” A fetola a re, “Ke ngwana wa Bahebera fela ke dule mo go bone ke tshaba, gonne ga go kgakala lo ba kometsa. ₁₃Ke ya go bona Holofernese, molaodi wa mophato wa lona, go ya go mo naya kitsiso ya boammaaruri. Ke tlaa mo kaela tsela e a ka e tsayang fa a batla go gapa dithotana kwa ntle ga go latlhegelwa ke monna le fa a le mongwefela kgotsa botshelo bo le bongwefela.”

₁₄Fa banna ba ba ntse ba reeditse se a neng a se bua, ba ne ba mo kaloletse matlho ba akabaditšwe ke go bona mosadi yo montle jaana. ₁₅Ba mo raya ba re, “Go fologa fela jaana ka bowena go tla go bona morena wa rona go tlaa go boloka! Go botoka gore O itlhaganelele kwa tanteng ya gagwe, bangwe ba banna ba rona ba tlaa go pata, ba go ise kwa go ene. ₁₆Fa O sena go fitlha fela fa pele ga gagwe O se ka wa bo wa tshaba. O mmolelele se O ntseng O se re bolelela mme o tlaa go tšhwara sentle.” ₁₇Ke fa ba tlhopha ba le lekgolo ba bone gore ba pate ene le mohula wa gagwe, mme ba ba isa kwa tanteng ya ga Holofernese.

₁₈Dikgang tsa gore o e tla di ne di setse di itsege mo ditanteng tsotlhe, mme batho botlhe mo bothibelelong ba kgoberega. Ya re a sa ntse a le ka fa ntle ga tante ya ga Holofernese, a letile gore a bolelwe, batho ba bantsi ba simolola go mo kgobokanela. ₁₉Ba kgatlhiwa ke bontle jwa gagwe thata, ba bo ba kgatlhegela Baiseraele ka ntlha ya gagwe. Ba nna ba re, “Ke mang yo o ka nyatsang batho ba ba nang le basadi ba ba ntseng jaana? Go botoka gore go se ka ga bo ga tlogelwa monna ope wa bone a tshela; gonne fa re ka ba tlogela ba ka tloga ba busa lefatshe lotlhe!”

₂₀Ke fa lekoko le le lebelelang Holofernese, le le le mo thusang le tšwa le tsenya Judithe mo teng ga tante. ₂₁Holofernese o ne a ikhutsitse mo bolaong jwa gagwe a le ka fa tlase ga sekhukhu se se mmala o bobududu jo bo mokgona, se tometšwe majana a mantlentle a botlhokwa a matalana le gouta le majana a tlhwatlhwa e e kwa godimo. ₂₂Ya re banna ba mo mmolelela a tla fa pele ga tante, go tshotšwe dipone tsa selefera fa pele ga gagwe. ₂₃Judithe ya re fa a tlhaga fa pele ga molaodi le mothusi wa gagwe, bontle jwa gagwe jwa ba akabatsa botlhe. A wa ka mpa a mo tlotla, fela batlhanka ba gagwe ba mo tsholetsa.