BARUKU 3

₁“Morena yo o thatayotlhe, Modimo wa Iseraele, moya o o mo pitlaganong, pelo e e tšhwenyegileng e a go tlhaeletsa jaanong: ₂A O ko O reetse, mme O tlhomoge pelo, Morena, gonne re leofile fa pele ga gago. ₃O ntse mo setilong sa gago sa bogosi ka bosakhutleng, fa rona re nnetse go nyelela. ₄Morena yo o thatayotlhe, Modimo wa Iseraele, a O ko O utlwe thapelo ya bašwi ba Iseraele, ya bana ba batho ba ba neng ba go leofela mme ba se ka ba reetsa lentšwe la Morena Modimo wa bone, e leng selo se se dirileng gore re bo re wetšwe ke bomadimabe jo. ₅A ko O se ka wa gakologelwa ditiro tse di bosula tsa bagologolo ba rona, O mpe O gakologelwe thata ya gago le leina la gago. ₆O Morena Modimo wa rona ruri mme re tlhologeletšwe go go boka, Morena, ₇gonne ke wena O tsentseng tlotlo ya gago mo dipelong tsa rona go re etleeletsa go bitsa leina la gago. Re tlhologeletšwe go go boka mo re thopetšweng teng mo, gonne re ntshitse ditshekamelo tse di bosula tsa bagologolo ba rona ba ba neng ba go leofela mo dipelong tsa rona. ₈A ko O re lebe gompieno, re sa ntse re le mo telekong jaana mo O re phatlaladitseng teng jaaka sengwe se se hutsegileng, se se hutsitšweng, se se latlhilweng, re otlhaelwa ditiro tse di bosula tsa bagologolo ba rona ba ba neng ba hularetse Morena Modimo wa rona.”

₉Iseraele, reetsa ditao tse di tshedisang, O utlwe, mme O ithute gore kitso e raya eng.

₁₀Ke ka ntlha yang, Oh Iseraele, ke ka ntlha yang, O le mo lefatsheng la baba ba gago jaana, O ntse O tsofalela mo lefatsheng le sele jaana, O lešwefadiwa le bašwi jaana, ₁₁O balelwa le ba ba mo bobipong jaana?

₁₂O hularetse motšwedi wa botlhale.

₁₃Fa O ka bo O ne wa tsamaya mo tseleng ya Modimo, O ka bo O agile mo kagisong ka bosakhutleng.

₁₄O ithute mo botlhale bo leng teng, mo thata e leng teng, mo tlhaloganyo e leng teng, gore O tle O bo O lemoge mo boleele jwa malatsi bo leng teng, le botshelo, mo lesedi la matlho le leng teng, le kagiso.

₁₅Ke mang yo o bonyeng felo ga jone? Ke mang yo o tsenyeng mo matlong a jone a matlotlo?

₁₆Magosana a ditšhaba a kae, le ba ba kileng ba busa diphologolo tsa naga mo lefatsheng?

₁₇Ba kae ba ba kileng ba laola dinonyane tsa loapi, le ba ba kileng ba ikgobokanyetsa selefera le gouta tse batho ba di ikantseng, ba leruo la bone le neng le se na tekanyo; ₁₈ba kae ba ba kileng ba bontsha botswerere jo bogolo mo go diriseng selefera mo e leng gore ditiro tsa bone tsa maatlametlo di gakgamatsa tota?

₁₉Ba nyeletse, ba fologetse kwa bobipong, go tlhagile ba bangwe go tsaya manno a bone.

₂₀Baša ba bonye lesedi la letsatsi, ba aga mo lefatsheng; fela tsela ya kitso ga ba ise ba e ithute, kgotsa ba tlhaloganye mebila ya jone kgotsa ba bo tlamparele.

₂₁Bana ba bone ba ne ba lelerela kgakala le tsela ya jone.

₂₂Ga bo ise bo ke bo utlwalelwe mo Kanana, kgotsa bo bonwe mo Temane; ₂₃bana ba Hagare ba ba senkang tlhaloganyo mo lefatsheng, babapatsi ba Merrane le Temane, batlhaba-dikinane le babatli-tlhaloganyo ga ba ise ba bo ba ithute tsela ya Botlhale, kgotsa ba akanye ka mebila ya jone.

₂₄Oh Iseraele, kana ntlo ya Modimo e kgolo jang! Kana kgaolo e o nang nayo e atlhame jang!

₂₅E kgolo e bile ga e na melelwane; E telele e bile ga e na tekanyo.

₂₆Bomokaloba ba ne ba tsalelwa mo go yone, ba ba neng ba tumile bogologolo, ba le bagolo mo seemong, e le bomaitseanape mo ntweng, ₂₇Modimo ga o a ka wa ba tlhopha, kgotsa wa ba bontsha tsela ya kitso.

₂₈Jalo he, ba ne ba nyelela ka ba ne ba se na botlhale, ba nyelela ka ntlha ya bomatla jwa bone.

₂₉Ke mang yo o kileng a tlhatlogela kwa legodimong a ya go bo tsaya, mme a fologa najo kwa marung?

₃₀Ke mang yo o kileng a kgabaganya lewatle mme a bo fitlhela, mme a bo ananya ka gouta e ntlentle?

₃₁Ga go na ope yo o itseng tsela e e yang kwa go jone, ga go na ope yo o ka senolang tsela e bo e tsamayang.

₃₂Fela One o o itseng dilo tsotlhe o a bo itse, o bo bonye ka tlhaloganyo ya one.

₃₃One o o tlhomileng lefatshe ka bosakhutleng, Wa le tlatsa ka diphologolo tse di maoto mane; One o o romelang lesedi mme le tsamaye, o le bitse gape mme le o utlwe ka poifo; ₃₄dinaledi di phatsima ka boitumelo ka dinako tse di di beetšweng;

₃₅fa o di bitsa, di araba di re, “Ke rona bano!” di phatsimela mmopi wa tsone ka boitumelo.

₃₆Ke one o e leng Modimo wa rona, ga go na ope yo o ka itšhwantshanyang nao.

₃₇O tlhalogantse tsela yotlhe ya kitso, wa e neela Jakobe motlhanka wa one, le Iseraele yo o mo ratang.

₃₈Ka mokgwa oo wa dira gore bo bonale mo lefatsheng, mme bo tshele mo gare ga batho.