1Mme ke gone ka moo Morena a diragaditseng katlholo e a saleng a re atlhola ka yone, a atlhola baatlhodi ba rona ba ba neng ba busa Iseraele, dikgosi tsa rona le baeteledipele ba rona, banna ba Iseraele le Juta ka yone. 2Se a se diretseng Jerusalema ga se ise se ke se bonwe se lekana le sepe ka fa tlase ga legodimo lotlhe – mme tse tsotlhe di dumalana le se se kwadilweng mo Molaong wa ga Moše, 3gore rotlhe re tlaa bo re je nama ya bomorwaarona le ya bomorwadiarona. 4Go feta moo, o bile a re neela thateng ya dipuso tsotlhe tse di re dikologileng, gore re nyadiwe, re tilwe ke ditšhaba tsotlhe tse di gaufi le rona, tse a re gasagasitseng mo go tsone. 5Boemong jwa gore re nne barena, re iphitlhetse re le magolegwa, gonne re leofetse Morena Modimo wa rona ka go sa reetse lentšwe la one.
6Tshiamo ke ya Morena Modimo wa rona, mme ponalo ya ditlhong tse di re tlhabang gompieno ke ya rona, gape ke ya borraaronamogolwagolwana. 7Dikhutsafalo tsotlhe tse Morena a neng a re hutsa ka tsone di re wetse godimo jaanong. 8Mme le fa go ntse jalo ga re ise re be re leke go dira gore Morena a re rate ka go tlogela, mongwe le mongwe wa rona, se dipelo tsa rona tse di bosula di se re bolelelang. 9Ke gone ka moo Morena a neng a lebelela nako e e mo siametseng go re direla khutsafalo, gonne Morena o re duelela, ka mokgwa o o tšhwanelang, se re se dirang mo gare ga dilo tsotlhe tse a re laetseng go di dira. 10Mme rona ga re a ka ra reetsa lentšwe la gagwe le re bolelela gore re tshegetse melao e Morena o e re tlhometseng.
Thapelo
11Jaanong, Morena Modimo wa Iseraele, wena yo o neng wa ntsha batho ba gago mo lefatsheng la Egepeto ka seatla se se nonofileng, ka ditshupo le dikgakgamatso, ka thata, O tsholeditse letsogo, go itirela leina le le tlotlegang gompieno; 12re leofile, re tlhokile moya wa semodimo; Morena Modimo wa rona, re robile melao yotlhe ya gago. 13A O ko O tlose bogale jwa gago mo go rona, gonne ga re tlhole re le banene mo ditšhabeng tse O re phatlaladitseng mo go tsone. 14Oh Morena, a O ko O reetse thapelo ya rona, a O ko O reetse kopo ya rona; re namole ka ntlha ya tlotla ya gago, O re fe botsalano jwa gago gore batšhwari ba rona botlhe ba bo bone, 15gore lefatshe lotlhe le tle le bone fa O le Morena Modimo wa rona, gonne Iseraele le lotso lwa gagwe o tšhwailwe ka leina la gago.
16O ko O re lebe, Morena, O le kwa felong ga gago mo go boitshepo, mme O re akanyetse, re tseye tsia mme O re reetse. 17Leba rona, Morena, mme O akanye; gonne bašwi ba ba kwa bopibong, ba mewa ya bone e ntshitšweng mo mebeleng ya bone, ga se bone ba ba tlaa bakang ba bo ba tshegetsa se se tšhwanelang Morena. 18Motho yo o imetsweng ke kutlobotlhoko, yo o tsamayang a obegile, a thetheekela, yo matlho a gagwe a looto, yo moya wa gagwe o tšhwerweng ke tlala, ke ene yo o tla go bakang a bo a tshegetsa se se go tšhwanelang, Morena.
19Ga re a ikanya ditšhwanelo dipe tsa borraaronamogolwagolwana kgotsa tsa dikgosi tsa rona go baya kopo ya rona ka boikokobetso fa pele ga gago, Morena Modimo wa rona. 20Nnyaa, O re digetse bogale jwa gago le kgalefo ya gago, jaaka O sale O solofetsa ka batlhanka ba gago fa ba re, 21“Morena o bua jaana a re, ‘Obang melala ya lona, mme ikobeleng kgosi ya Babilone, mme lo tlaa nna lo nna mo lefatsheng le ke le neileng borraaronamogolwagolwana. 22Fela fa lo sa reetse lentšwe la Morena mme lo sa ikobele kgosi ya Babilone, 23ke gone ke tlaa khutlisang modumo wa go dira moletlo le wa boitumelo, le lentšwe la monyadi le lentšwe la monyadiwa, mo metseng ya Juta, le mo mebileng ya Jerusalema, gonne lefatshe lotlhe le nna sekaka, le se na baagi.’ ”
24Fela ra se ka ra reetsa lentswe la gago ra ikobela kgosi ya Babilone. Ke gone ka moo O neng wa diragatsa se O neng O se solofeditse ka batlhanka ba gago, baprofeta: gore marapo a dikgosi tsa rona le a borraaronamogolwagolwana a tlaa ntshiwa mo mafelong a one a boikhutso, a tšwatšwailwe. 25A ne a tota a latlhelwa kwa ntle, motshegare, a nna mo mogoteng, mme bosigo a nna mo serameng. Batho ba ne ba šwa mo tlalelong e e botlhoko, ba bolawa ke mopalo, tšhaka le leroborobo. 26Jalo he ka ntlha ya bosula jwa Ntlo ya Iseraele, le Ntlo ya Juta, O dirile Ntlo e, e e tshwailweng ka leina la gago, se e leng sone gompieno.
27Mme le fa go ntse jalo, Morena Modimo wa rona, O re tšhwere ka mokgwa o o tšhwanelang bomolemo jwa gago le bonolo jwa gago jo bo se nang tekanyo, 28fela jaaka O ne wa solofetsa ka motlhanka wa gago Moše, mogang O neng wa mmolelela go kwala Molao wa gago bomorwa Iseraele ba le teng, mme wa re: 29“Fa lo sa reetse lentšwe la me, boidiidi jo bogolo jo bo se nang palo jo jwa batho bo tlaa dirwa bobotlananyana jwa batho ba ba seng banene mo ditšhabeng tse ke tla ba phatlalaletsang mo go tsone. 30Ke itse sentle gore batho ba ga ba kitla ba reetsa, gonne ba tlhogo e thata mo go mašwe. Fela mo lefatsheng le ba tlaa bong ba thopetšwe kwa go lone ba tlaa rarabologelwa, 31mme ba dumele fa ke le Morena Modimo wa bone. Ke tlaa ba naya pelo e e siameng le tsebe e e reetsang. 32Ba tlaa nkopelela dipako mo lefatsheng le ba tlaa bong ba thopetšwe kwa go lone, ba gakologelwe leina la me. 33Ga ba na go tlhola ba nna tlhogo e thata, mme e tlaa re ba gakologelwa se se neng sa diragalela bagologolo ba bone ba ba neng ba leofa fa pele ga Morena, ba tlaa tlogela ditiro tsa bone tse di bosula. 34Ke gone ke tlaa ba busetsang mo lefatsheng le ke neng ka le solofetsa Abrahama, Isaka le Jakobe, ke ikana, mme ba tlaa nna barena mo go lone. Ke tlaa oketsa palo ya bone, mme ga ba kitla ba fokotsega. 35Le gone ke tlaa dira kgolagano e e sa feleng nabo; ke tlaa nna Modimo wa bone le bone ba tlaa nna batho ba me. Mme ga ke na go ba ke tlhola ke koba batho ba me Iseraele mo lefatsheng le ke le ba neileng.”
