1 MAKABISE 4

₁Gorgiase o ne a tsaya batlhabani-batsamai ba le 5 000 le batlhabani-bapalami ba ba tlhophilweng ba le 1 000, mme mophato o wa ntwa wa bolola bosigo, ₂ka maikaelelo a go tlhasela bothibelelo jwa Bajuta le go ba gatla ba sa ntse ba itebetse. O ne a bontshiwa tsela ke banna ba ba neng ba tšwa Motsaneng wa Phemelo. ₃Judase a utlwa ka selo se, mme le ene a bolola ka batlhabani ba gagwe go ya go tlhasela mephato ya kgosi kwa Emause, ₄makoko a ntwa a sa ntse a ntshitswe mo bothibelelong. ₅Ke gone ka moo, e rileng Goregiase a fitlha kwa bothibelelong jwa ga Judase a fitlhela go se na le fa e le ope teng. Mme a simolola go batla Bajuta mo dithabeng a ntse a re, “Ba a re tshaba.”

₆Ya re fa tsatsi le tlhaba Judase a bo a le mo leboeng ka banna ba le 3 000, le mororo ba ne ba se na dibolao le ditšhaka tse ba ka bong ba ne ba eleditse go nna natso. ₇Ba ne ba ka bona, jaanong, bothibelelo jwa baheitane bo thatafaditšwe ka dithekeletso, bo dikaganyeditšwe ke batlhabani-bapalami, ba bonala e le banna ba ba neng ba tlhaloganya tsa ntwa sentle. ₈Judase a raya banna ba gagwe a re “Lo se ka lwa ba lwa boifa bontsi jwa bone, kgotsa ya re ba tlhasela lwa gonyela. ₉Gakologelwang jaaka bagologolo ba rona ba ne ba gololwa kwa lewatleng le Lehibidu fa Faro a ne a ba kobakobile ka mophato wa gagwe. ₁₀Jaanong a re kopeng One wa Legodimo go re tlhomogela pelo le go gakologelwa kgolagano e o neng wa e dira le bagologolo ba rona, mme o pitle lekoko le, la ntwa le re lebaganyeng nalo gompieno le. ₁₁Ke gone ditšhaba tsotlhe di tlaa itseng tota gore o teng One o o bolokang o bo o golola Iseraele.”

₁₂Batswa-kwa ba, ba tlhatlosa matlho, mme ya re ba bona Bajuta ba tla ba ba phageletse, ₁₃ba betsega mo bothibelelong go ya go tlhabana. Ke fa banna ba ga Judase ba letsa phala, ₁₄ba tlhabana nabo. Baheitane ba alolwa mme ba siela ntlheng ya leboa. ₁₅Mme botlhe ba ba neng ba sa ntse ba gasagasame ba ne ba bolawa ka tšhaka. Ba nna ba ba kobakoba go fitlhelela ba bo ba fitlha kwa Gesere le kwa dipoeng tsa Idumaea, Asotuse le Jamnia. Mmaba a latlhegelwa ke banna ba ka ne ba le 3 000.

₁₆Judase le banna ba gagwe ba tlogela go ba latelela mme ba boela kwa morago. ₁₇A bo a raya batho a re, “Tlhokomologang dithopo, gonne re sa ntse re tšhwanetse go tlhabana gape. ₁₈Goregiase le mephato ya gagwe ba sa ntse ba le mo dithabeng mo gaufi le rona. A e re pele lo emelaneng le baba ba rona mme lo tlhabane nabo; ke gone lo itse go tla go itseela dithopo tse dintsi fela ka mo lo ratang ka teng.” ₁₉Ya re fela jaaka Judase a fetsa go bua batlhabani-ditlhola ba baba ba tlhaga mo mhapheng wa thaba. ₂₀Batlhabani-ditlhola ba, ya re ba lemoga gore makoko a bone a alotšwe le gore bothibelelo bo fisitswe, ka mosi o o sa ntse o bonala sentle, o ne wa ba bolelela se se neng se diragetse, ₂₁ba tshoga thata fa ba bona selo se. Mme ya re ba bona mephato ya Bajuta mo leboeng e eme e tlhometse, e ipaakanyeditse ntwa, ₂₂ba siela botlhe kwa kgaolong ya Mafilisitia. ₂₃Jaanong Judase a boa a ya go thopa bothibelelo. Ba itseela namane e tona ya gouta le selefera, le dikhai tse dipududu le tse di mmala o bohibidu jo bo mokgona, le dilo tse dingwe di le dintsi tsa botlhokwa. ₂₄Ya re ba boa ba opela dipako, ba boka One wa Legodimo ba re “Gonne o molemo, mme boutlwelobotlhoko jwa one ga bo fele.” ₂₅Letsatsi leo e ne e le letsatsi la kgololo e kgolo mo Iseraele.

₂₆Batšwa-kwa bangwe ba ba neng ba falotse ba ne ba ya go bolelela Lisiase sengwe le sengwe se se neng se diragetse. ₂₇Dikgang tse tsa mo tshosa thata a bo a sala a akabetse gonne dilo mo Iseraele di ne di sa tsamaya ka mo a neng a ikaeletse ka teng, mme se se neng se diragetse se ne se fapaanye thata le se kgosi e neng e se laetse.

₂₈Ngwaga e e latelang o ne a kokoanya makoko a a tlhophilweng a le 60 000 le batlhabani-bapalami ba le 5 000 a ikaeletse go tlobelela Bajuta. ₂₉Ba tsena mo Idumea mme ba dira botlhabanelo jwa bone kwa Bethesure, mo Judase a neng a kopana nabo ka banna ba le 10 000. ₃₀Ya re a bona batlhabani ba bone ba nonofile, a rapela jaana: “O a bakega, wena Mmoloki wa Iseraele, wena yo o neng wa thubaka thata ya mmampudi wa Mafilisitia ka seatla sa motlhanka wa gago Dafita, mme wa digela bothibelelo jwa bone mo diatleng tsa ga Jonathane, morwa Saule, le lekau la gagwe le le tsholang dibolao. ₃₁Ka one mokgwa oo, a ko O pitle batho ba ba re bololetseng ba, ba pitle ka diatla tsa batho ba gago, Iseraele, O dire gore ba tlhabisiwe ditlhong ke mephato ya bone le batlhabani-bapalami ba bone. ₃₂Ba dire maboi, ba kgobe marapo, a e re ba fenngwa ba tsewe ke sedidi. ₃₃Ba fenye ka tšhaka ya ba O ba ratang mme botlhe ba ba itseng leina la gago ba tla go boka ka kopelo.”

₃₄Mephato e mebedi e ya tshwaragana, mme ga wa banna ba le 5 000 ba makoko a ga Lisiase mo kampanong e. ₃₅Ya re Lisiase a bona batlhabani ba gagwe ba unyalala, e bile batlhabani ba makoko a ga Judase ba kgothetse mme ba ipaakanyeditse go tshela kgotsa go šwa jaaka batlhabani ba tšhwanetse, a tabogela kwa Antioka. A feta a thaopa batlhabani teng go tla go tlhasela Juta gape ka natla e kgolo go feta pele.

₃₆Ke fa Judase le bomorwarraagwe ba re, “Ka jaana ke mo re fentse baba ba rona, a re yeng go phepafatsa Felo ga Boitshepo, re go neele Modimo.” ₃₇Ba bo ba rulaganya lekoko lotlhe la ntwa, ba ya kwa Thabeng ya Sione. ₃₈Ya re ba fitlha teng ba fitlhela Felo ga Boitshepo go rile ngololo! Aletara e itshepolotswe, kgoro di fisitšwe, go ntse ditlhaga-tlhaga e bile e kete ke mo sekgweng fela kgotsa mo godimo ga thaba. Matlo a polokelo e le matlotla fela. ₃₉Ba ikgagola diaparo, ba hutsafala mo go mašwe. Ba ikgasa lerole mo tlhogong.

₄₀Ke fa Judase a laela banna ba gagwe gore ba tlhabane le mophato o o neng o beilwe mo Motsaneng wa Phemelo go fitlhelela a fetsa go phepafatsa Felo ga Boitshepo. ₄₂Fa a tloga foo, a bo a tlhopha baprista ba ba neng ba se na molato ope mo go tshegetseng Molao, ₄₃gore ba phepafatse Felo ga Boitshepo mme ba tlose maje a a neng a lešwefaditšwe ba a ise golo gongwe fa go sa itshekang. ₄₄Ba rerisana ka aletara ya tshupelo e e fisiwang e e neng e itshepolotšwe gore tota e ka tweng. ₄₅Mme ba bona go le botoka gore ba e tlhatlhamolole, e se re kgotsa ba kgobiwa ka yone, ka gonne baheitane ba ne ba e lešwefaditse. Ke gone ka moo ba neng ba e tlhatlhamolola. ₄₆Ba bo ba baya maje golo gongwe fa go a siametseng mo godimo ga lekgabana la Tempele go fitlhelela moprofeta mongwe a tla go bolela gore a ka tweng. ₄₇Ba tsaya maje a a sa betlwang, jaaka Molao o ne o laela, ba aga aletara e ntšha e e neng e tšhwana le e kgologolo. ₄₈Ba tlhabolola Felo fa go Boitshepo, le ntlo mo teng. Ba phepafatsa malwapa. ₄₉Ba dira dijana tse di boitshepo tse dintšha. Ba tsenya setlhomo sa lobone, aletara ya maswalo le tafole mo Tempeleng. ₅₀Ba tshuba maswalo mo godimo ga aletara. Mme ba tshuba dipone tse di mo godimo ga setlhomo. Tsa tuka mo Tempeleng. ₅₁Ba tshitshega dilofo tsa borotho mo tafoleng. Ba pega disiro. Ba feleletsa ditiro tse ba neng ba di simolotse.

₅₂Ya re kgwedi ya bo-9 ebong Chiselefe e tlhola malatsi a le 25 mo ngwageng ya bo-148, ba phakela, ₅₃mme ba ntshetsa tshupelo e e laotsweng mo aletareng e ntšha ya tshupelo e e fisiwang yotlhe e ba neng ba e agile. ₅₄Aletara ya neelwa Modimo, go lela dikatara, diharepa le diphaphatšhana mo go yone nako ya ngwaga e baheitane ba kile ba e itshepolola. ₅₅Batho botlhe ba inamalatsa fa fatshe, ba obamela, ba bokela godimo One o o neng o ba thusitse go kgona go le kanakana.

₅₆Malatsi a le 8 ba ja moletlo wa go neelwa Modimo Aletara, ka boitumelo ba ntsha ditshupelo tsa phiso, ditshupelo tsa kagiso le tsa tebogo. ₅₇Ba kgabisa fa pele ga Tempele ka dikgarenyana le dikolonyana tsa gouta. Ba baakanya dikgoro le matlo a polokelo, ba a tsenya dipati. ₅₈Boipelo jwa Batho e ne e le jo bo kgaphaselang, ebile kgobo ya baheitane e dule mo go bone. ₅₉Judase le bomorwaraagwe le phuthego yotlhe ya Iseraele ba ba ba dira molao gore malatsi a go neelwa Modimo ga aletara a jelwe moletlo ngwaga nngwe le nngwe ka nako e e siameng. Mme moletlo o o tseye malatsi a le 8 go simologa ka kgwedi ya Chiselefe e tlhola malatsi a le 25, go itumelwa, go ipelwa.

₆₀Jaanong ba simolola go thekeletsa Thaba ya Sione ka dipota tse di goletseng kwa godimo tse di nang le dikago tse di thata tse di godileng tsa phemelo. Ba dira jalo go thibela baheitane gore ba se ka ba tla go e šobotlaka jaaka ba ne ba kile ba dira. ₆₁Judase a baya lekoko la batlhabani gore ba lebelele thaba. A bo a thatafatsa Bethsure, go naya batho kago ya phemelo kgatlhanong le Idumaea.