1 MAKABISE 3

₁Ke fa morwawe Judase yo o neng a bidiwa Makabeuse a tsaya maemo a gagwe a go laola. ₂Bomorwarraagwe botlhe, le botlhe ba ba neng ba ntse ba itshwaragantse le rraagwe ba mo thusa. Mme ka boitumelo ba lwela Iseraele.

₃A anamisa go tuma ga batho ba ga gabo, A apara letlatla la sehuba la phemelo jaaka dimo, a bo a ikgatlha ka dibetsa tsa gagwe tsa ntwa. A tlhomaganya dintwa, a ntse a di lwa tsotlhe. A sireletsa bontsi ka tšhaka. ₄O ne a tšhwana le tau mo ditirong tsa gagwe tsa bonatla le bopelokgale; a tšhwana le tawana e e dumelang mojo wa yone. ₅O ne a senka a bo a latelela baitimokanyi, botlhe ba ba neng ba tšhwenya batho ba gaabo a ba fisa. ₆Baitimokanyi ba ne ba tlhakanngwa tlhogo ke go mmoifa, baleofi botlhe ba akabala, mme kgololo ya fitlha e le ene a eteletseng pele. ₇O ne a utlwisa dikgosi di le dintsi botlhoko, mme a itumedisa Jakobe ka ditiro tsa gagwe. O gakologelwa ka pako ka metlha yotlhe. ₈O ne a ralala metse ya Juta; ba ba se nang tumelo a ba ripitla, kgalefo a e kgaphela kgakala le Iseraele. ₉Leina la gagwe le ne la utlwala kwa mafelelong a lefatshe, mme a tsolopanya ba ba neng ba tloga ba nyelela.

₁₀Fela Apolloniuse o ne a kokoanya baheitane le lekoko le legolo le le neng le tšwa kwa Samaria go tlhabana le Iseraele. ₁₁Ya re Judase a utlwa selo se, a mo thologela, a mo alola mme a mmolaya. Ba le bantsi ba wa ba ntshitswe dintho, fa ba ba neng ba sala bone ba ne ba inaya naga. ₁₂Dithopo tsa bone tsa phamolwa, lerumo la ga Apolloniuse lone la tsewa ke Judase yo o neng a lwa ka lone mo botshelong jwa gagwe jotlhe.

₁₃E rile Serone, molaodi wa makoko a ntwa a Maasiria a utlwa gore Judase o dirile setlhopha sa batlhabani se se tlhakanyeng le sa badumedi le dinatla tsa batlhabani, ₁₄a re, “Ke tlaa dira gore ke itsege mme ke tlotlwe mo pusong fa ke tlhabana le Judase le bathusinyana bale ba gagwe ba ba nnetseng go nyatsa ditaelo tsa kgosi.” ₁₅Ke gone ka moo a neng a bolola gape, a thusiwa ke namane e tona ya sla gopa sa batlhabani ba baheitane go ipusolosetsa mo Baiseraeleng. ₁₆E rile fela a tloga a fitlha fa phataneng ya Beth-horone Judase a bo a ikopakopanya nae ka setlhotšhwana sa banna. ₁₇Fela ya re fela banna ba, ba bona lekoko le le kanakana le tla le ba phageletse, ba raya Judase ba re, “Tota re ka tlhabana jang le batho ba bantsintsi jaana, rona re le setlhotšhwana fela jaana? le gone, tota, re setse re lapile, ka e bile re sa ja sepe gompieno.”

₁₈Judase a araba ka go re, “Go motlhofo gore setlhopha se segolo se alolwe ke setlhotšhwana fela; e bile tota fa pele ga Legodimo ga go na pharologanyo epe fa gare ga go boloka ka batho ba le bantsi kgotsa ka setlhophanyana fela, ₁₉ka gore phenyo ga e tšwe mo bogolong jwa natla ya batlhabani. Thata e tšwa kwa Legodimong. ₂₀Ba tla go tlhabana le rona ka makgakga a a feteletseng le boikepo, ba tsile go re bolaya rona le basadi ba rona le bana ba rona, le go re ripitla. ₂₁Fela re lwela botshelo jwa rona le melao ya rona. ₂₂Mme One o tlaa ba pitla fa pele ga matlho a rona. Lo se ka lwa ba tshaba.”

₂₃E rile a sena go bua, a kgwelogela Serone le mophato wa gagwe mme a ba pitlaganyetsa. ₂₄Judase a mo kobakoba go fologa phatana ya Beth-horone go fitlhelela kwa leboeng. Ga wa banna ba ka ne ba le 800 ba bone, fa ba bangwe bone ba ne ba tshabela kwa lefatsheng la Mafilisitia. ₂₅Judase le bomorwarraagwe ba simolola go boifiwa, mme batho ba ba neng ba le gaufi nabo ba tlala letshogo. ₂₆Leina la gagwe la ba la utlwiwa le ke kgosi tota mme mo setšhabeng sengwe le sengwe go ne go buiwa ka Judase le dintwa tsa gagwe.

₂₇Dikgang tsa ditiragalo tse tsa galefisa Antiokuse thata, mme a laela gore mephato yotlhe ya puso ya gagwe e tsolopanngwe, e baakanyediwe tlhabano, e nne lekoko la ntwa le le nonofileng. ₂₈A bula polokelo ya dikhumo tsa gagwe, mme a abela makoko a gagwe a batlhabani tuelo ya ngwaga, a ba bolelela gore ba ipaakanyetse sengwe le sengwe se se neng se ka nna sa ba diragalela. ₂₉Ke fa a lemoga gore madi mo polokelong ya gagwe a a tlhaela, le gore madi a lekgetho le le tšwang mo kgaolong a fokotsegile, a fokoditswe ke dikgogakgogano le dipetso tse di neng di wetse lefatshe ka ntlha ya gore o ne a tlositse melao e e neng e ntse e le teng bogologolo. ₃₀A simolola go tshoga, jaaka go ne go kile ga diragala gantsinyana pele, ka a ne a belaela gore ga a kitla a kgona go duelela ditshenyegelo tsa gagwe a bo a ntsha dimpho tse dintsintsi jaaka a ne a ntse a tlwaetse go dira pele go feta dikgosi tse di neng di busitse pele ga gagwe. ₃₁Ya re a akabetse thata jaana a ikaelela go etela Peresia, go ya go kgethisa dikgaolo tsa koo, e le gore a tle a dire motlobo o o boketšana wa madi.

₃₂Lisiase yo e neng e le monna yo o tlotlegang wa losika lwa segosi e ne ya nna ene o salang a tšhwareletse kgosi go busa mo kgaolong e e fa gare ga noka ya Eufratese le molelwane wa Egepeto. ₃₃Le gone o ne a tlaa sala a ruta morwayone, Antiokuse, go fitlhelela a bo a boa. ₃₄Antiokuse a mo rebolela bontlhabongwe jwa makoko a batlhabani ba gagwe, le ditlou, a bo a mo laela gore o batla gore go dirwe eng, bogologolo jang mabapi le baagi ba Juta le Jerusalema, ₃₅ba a neng a ikaeletse go ba tlhasela ka lekoko, go pitla le go thuba thata ya Iseraele le masalela a a neng a sa ntse a le mo Jerusalema le go dira gore ba se ka ba bo ba tlhola ba gakologelwa mo kgaolong eo, ₃₆le go baya bana ba batswa-kwa mo dikarolong tsotlhe tsa kgaolo ya bone, a bo a aba lefatshe la bone ka go direla tengwa. ₃₇Kgosi ya tsaya bontlhabongwe jo bo neng bo setse jwa makoko, mme ya bolola mo Antioko, motsemogolo wa puso ya gagwe, mo ngwageng wa bo-147. A kgabaganya noka ya Eufratese, a ralala dikgaolo tse di kwa godimo.

₃₈Lisia o ne a itlhophela Petolemi morwa Dorimenese, le Nikanore le Goregiase, banna ba ba gapang maikutlo ba ba neng ba tšwa mo ditsaleng tsa Kgosi, ₃₉mme a ba laodisa batlhabani-batsamai ba le 40 000 le batlhabani-bapalami ba le 7 000, ba a neng a ba romela ro ya go tlhasela lefatshe la Juta le go le gipitla jaaka kgosi e ne e laetse. ₄₀Mophato otlhe wa batlhabani wa bolola mme wa fitlha gaufi le Emause mo Dipoaneng, mo ba neng ba thibelela gone. ₄₁Ya re barekisi ba kgaolo eo, ba utlwa gore ke bomang, ba tla kwa bothibelelong, ba tsisa namane e tona ya gouta le selefera, le dikeetane, ba ikaeletse go reka Baiseraele e le balala. Ba ne ba na le setlhopha sa batho ba ba neng ba tšwa Idumea le Filisitia.

₄₂Judase le bomorwarraagwe ba lemoga gore go a dubega, le gore mephato ya ntwa e thibeletse mo kgaolong ya bone. Le gone ba ne ba ntse ba itse gore kgosi e ne e laetse gore batho ba, ba felelediwe. ₄₃Ke gone ka moo, ba neng ba raana ba re, “A re tsoseng matlotla a ba ga rona, re ba lweleng, re bo re lwele felo ga rona ga Boitshepo.” ₄₄Ba phutha batho ba bone, ba ipaakanyetsa ntwa. Ba rapela, ba kopa bopelotlhomogi le boutlwelobotlhoko.

₄₅Jerusalema o ne a sala a tšhwana le sekaka fela, go se na le fa e le motho mo go ene wa bana ba gagwe botlhe, go se na le fa e le ope yo o mo tsenang kgotsa yo o mo tšwang. Felo ga Boitshepo go šobotlakwa fela, batšwa-kwa ba tletse ka Motsana wa Phemelo, o jaanong e leng bonno jwa boheitane, Jakobe a sa tlhole a ipela, phala le harepa di rile tuu!

₄₆Ya re ba sena go ikokoanya, ba ya Misipa, go bapa le Jerusalema, gonne Misipa o ne a sa bolo go nna a itsege e le felo fa Baiseraele ba neng ba a tle ba rapelele gone. ₄₇Tsatsi leo, ba tlhola ba itimile dijo, ba apere letsela la kgetsi, ba ikgasitse ditlhogo ka melora, ba bile ba ikgagoletse diaparo. ₄₈Ba bula Lokwalo lwa Molao go kopa lesedi ka ga dilo tse baheitane bone ba neng ba kopa lesedi ka ga tsone mo ditšhwantshong, medimo ya bone ya disetwa. ₄₉Ba bo ba tsisa diaparo tsa baprista, mabutšwa-pele le dineo tsa bolesome mme ba tsoseletsa Manasirita a a neng a setse a feditse nako ya one ya maikano. ₅₀Ke fa ba tlhaeletsa legodimo ba goa ba re, “Re tlaa dirang ka batho ba? Re tlaa ba isa kae? ₅₁Malapa a gago a a boitshepo a šobotlakilwe fela, a lešwefadiwa, baprista ba gago mo go tlontlololweng ga bone ba a lela. ₅₂Jaanong baheitane ba tšhwaraganetse go re bolaya; O itse se ba ikaeletseng go se re dira. ₅₃Re ka emelana nabo jang O sa tle go re thusa?” ₅₄Ba bo ba letsa diphala ba dira namane e tona ya modumo.

₅₅Judase a tloga a tlhophela batho baeteledi-pele, go laola banna ba le 1 000 ba le 100, kgotsa ba le 10. ₅₆A bo a bolelela botlhe ba ba neng ba aga matlo, kgotsa ba ba neng ba tloga ba nyalwa, kgotsa ba ba neng ba lema ditshingwana tsa meretlwa, kgotsa ba ba neng ba itshogetse fela, gore mongwe le mongwe wa bone a ye gae, jaaka Molao o ne o letla. ₅₇Ke fa lekoko la ntwa le bolola le feta le thibelela ntlheng ya borwa jwa Emause. ₅₈Judase a bo a ba raya a re, “Lo nne lo tlhometse. lo kgothale, lo ipaakanyetse go tsoga lo tlhabana le baheitane ba ba ikokoanyeditseng go re bolaya ba, ba bo ba senya felo ga rona ga Boitshepo. ₅₉Go botoka gore re mpe re šwe re tlhabana go na le gore re lebelele fela setšhaba sa rona se nyelela, le Mafelo a rona a a Boitshepo a senyakwa fela. ₆₀Mme o o kwa legodimong one o tlaa dira fela jaaka o batla.”