SEFELA SA DIFELA 1

₂A a nkatle ka dikatlo

tsa molomo wa gagwe;

gonne lorato lwa gago lo molemo

bogolo go bojalwa jwa mofine.

₃Ditlolo tsa gago

di na le monko o o monate;

leina la gago le ntse jaaka setlolo

se se itshelwang; ke gone ka moo

makgarebane a go ratang.

₄Nkgoga,

re tlaa siana re go setse morago;

kgosi e nkisitse

mo matlwaneng a yone;

re tlaa itumela re ipela mo go wena,

re tlaa umaka lorato lwa gago

bogolo go bojalwa jwa mofine;

ba go rata ka tshiamo.

₅Ke montsho, mme ke montle,

lona bomorwadia Jerusalema,

jaaka megope ya Ketare,

jaaka disiro tse di lepelelang

tsa ga Solomone.

₆Lo se ka lwa nteba,

ka gobo ke le montsho,

ka gobo letsatsi le mpabotse.

Bomorwa mme ba ne ba

nkgakaletse, ba ntira molebedi

wa masimo a mafine;

mme e leng tshimo ya me ya mafine

ga ke a e lebela.

₇Mpolelela,

wena yo mowa wa me o go ratang,

kwa o hudisang letsomane la gago

gone,

kwa o le bothisang gone

go le motshegare;

gonne ke tlaa bo ke nnelang

jaaka mongwe yo o kailang

mo matsomaneng

a bankane ba gago?

₈Fa o sa itse,

wena yo montlentle bogolo

mo basading,

tswa le motlhala wa matsomane,

mme o hudise dipotsane tsa gago

fa megopeng ya badisa.

₉Moratwa wa me,

ke go tshwantshitse le pitse

mo dikareng tsa ga Faro.

₁₀Marama a gago a mantle

ka metshopho ya moriri,

le thamo ya gago

ka majana a a tlhokegang

a a fololetsweng.

₁₁Re tlaa go direla metsila ya gouta

e na le kgotlwana tsa selefera.

₁₂E rile kgosi e dutse

fa bojelong jwa yone,

bolao jwa me jwa nareto

jwa utlwatsa monko wa jone.

₁₃Mo go nna moratwa wa me

o ntse jaaka ngatana ya mera,

e e lalang fa gare ga mabele ame.

₁₄Mo go nna moratwa wa me

o ntse jaaka lerose la dithunya tsa

motlhatswameno

mo masimong a mafine a Enegedi.

₁₅Bona, o montle, moratwa wa me;

bona, o montle;

matlho a gago a ntse jaaka matseba.

₁₆Bona o montle, moratwa wa me,

ee, o natefo;

bolao jwa rona bo bile bo botala.

₁₇Mesipuri ya ntlo ya rona

ke masetara,

le ditlhomeso tsa rona ke marukuru.