MORERI 12

₁O bo o gakologelwe Mmopi wa gago mo metlheng ya bokau jwa gago, metlha ya bosula e ise e be e tle, le dinyaga di ise di atamele, motlhang o tlaa buang, o re: “Ga ke na kgatlhego mo go tsone;” ₂letsatsi le ise le be le nne lefifi, le lesedi, le ngwedi, le dinaledi, le maru a ise a boe morago ga pula; ₃mo tsatsing le badisa ba ntlo ba tlaa tlakaselang ka lone, le banna ba ba thata ba ikoba, le ba ba silang ba khutla ka ba le babotlana, le ba ba lebang ka diiponi ba otofadiwa; ₄le mejako e tswalwa mo mebileng; mogang modumo wa go sila o kokobetseng, le motho a nanoga ka go lela ga nonyane, le barweetsana botlhe ba pina ba kokobediwa. ₅Ee, ba tlaa boifa se se godimo, le ditherego di tlaa bo di le mo tseleng; le setlhare sa thamane se tlaa thunya, le tsiane e nna mokgweleo le keletso e tlhaela; gonne motho o ya gaeng la gagwe le le sa khutleng, le baleledi ba tsamayatsamaya mo mebileng. ₆Mogala wa selefera o ise o bo o hunologe, le mogotšana wa gouta o ise o thubege, le nkgwana e ise e thubege kwa motsweding, le segeledi se ise se thubege kwa sedibeng; ₇mme lorole lwa boela mmung jaaka lo ne lo ntse, le mowa wa boela Modimong o o o abileng. ₈Boithamako jwa maithamako, go bua Moreri; gotlhe ke boithamako fela.

₉Gape, e re ka Moreri a ne a le botlhale, a fela a ruta batho kitso; ee, o ne a akanya, a batla, mme a rulaganya diane di le dintsi. ₁₀Moreri a leka go lemoga mafoko a a lebosegang, le sone se se kwadilweng ka thokgamo, e bong mafoko a boammaaruri. ₁₁Mafoko a ba ba botlhale a ntse jaaka ditlhabi, le jaaka dimapo tse di kokothegetseng sentle; mafoko a beng ba diphuthego a ntse jalo, a a ntshitsweng ke modisa a le mongwe fela.

₁₂Gape morwaaka, o ineele go gakololwa; ga go na bokhutlo jwa go dira dikwalo di le dintsi, le go akanya mo gogolo ke letsapa mo nameng.

₁₃Bokhutlo jwa mafoko ke jo; go utlwilwe gotlhe: Boifa Modimo, o bo o tshegetse ditaolo tsa one; gonne mo, ke tshwanelo yotlhe ya motho. ₁₄Gonne Modimo o tlaa isa tiro nngwe le nngwe mo tshekong, le sengwe le sengwe se se subegileng, le fa se le molemo kgotsa se le bosula.