Pesalema 84

₁Ana metlaagana ya gago

e mentlentle jang,

wena Jehofa wa masomosomo!

₂Mowa wa me o tlhologeletswe,

ee, o idibalela fela malwapa

a ga Jehofa;

pelo ya me le nama ya me

di kurueletsa Modimo

o o tshedileng.

₃Ee, thaga e iponetse ntlo,

le peolwane setlhaga,

fa e ka bayang mamphorwana

a yone gone,

e bong dibeso tsa gago,

Jehofa wa masomosomo,

Kgosi ya me, le Modimo wa me.

₄Go sego

ba ba agileng mo ntlong ya gago;

ba tlaa fela ba ntse ba go baka. Sela.

₅Go sego motho yo thata ya gagwe

e leng mo go wena;

yo ditsela tse di yang Sione

di leng mo pelong ya gagwe.

₆Ba e reng ba ralala mokgatšha

wa Maselelo,

ba o phunye metswedi;

ee, pula ya sephai e o khurumetse

ka masego.

₇Ba etla ba tlhomagantse

thata le thata;

mongwe le mongwe wa bone

o ya go bonala

fa pele ga Modimo mo Sione.

₈Jehofa Modimo wa masomosomo,

a ko o utlwe morapelo wa me;

baya tsebe Modimo wa ga Jakobe.

Sela.

₉Bona, Modimo thebe ya rona,

mme o lebe sefatlhogo sa motlodiwa

wa gago.

₁₀Gonne letsatsi le le lengwe fela

mo malwapeng a gago, le gaisa

malatsi a a makgolo a le some.

Ke rata ka nna molebedi wa kgoro

mo ntlong ya Modimo

bogolo go go aga

mo megopeng ya boikepo.

₁₁Gonne Jehofa Modimo

ke letsatsi le thebe;

o tlaa aba tshegofatso le kgalalelo;

ga go na sepe se se molemo

se o tlaa ganang ka sone mo go

ba ba tsamayang ka thokgamo.

₁₂Jehofa wa masomosomo,

go sego motho yo o ikantseng

mo go wena.