Pesalema 83

₁Modimo, o se ka wa didimala

fela; o se ka wa ikitsa go bua;

se nne fela, Modimo.

₂Gonne bona,

baba ba gago ba dira pheretlho;

le ba ba go tlhoileng

ba tsholeditse tlhogo.

₃Ba logela batho ba gago kgakololano

ya boferefere; ba gakololanela

ba gago ba ba subegileng.

₄Ba rile: “Tlang, a re ba kgaoleng

go tlhola e le morafe;

gore leina la Iseraele

le se tlhole le gopolwa gope.”

₅Gonne ba gakololanye

ka tumalano e le nngwe fela;

e le wena yo ba go golaganelang;

₆megope ya Etome, ya Baišemaele;

Moabe le Bahagare;

₇Gebale, Amone le Amaleke;

Filisitia o na le banni ba Ture;

₈Asiria le ene o ikopantse nabo;

ba thusitse bana ba ga Lote. Sela.

₉Ba direle jaaka o diretse Midiane;

le jaaka Sisere, le jaaka Jabine,

fa nokeng ya Kišone;

₁₀ba ba nyeletseng kwa Entore;

ba ba ba nna jaaka

letshotelo la tshimo.

₁₁Dira bagolwane ba bone

gore ba nne jaaka Orebe le Seebe;

ee, dikgosana tsotlhe tsa bone

di nne jaaka Seba le Salemuna;

₁₂ba ba kileng ba re:

“A re itseeleng maago a Modimo

go a rua.”

₁₃Modimo wa me,

ba dire gore ba nne jaaka lorole

lo lo sokeletsegang;

jaaka phofedi fa pele ga phefo.

₁₄Jaaka molelo o o lakailang sekgwa,

le jaaka kgabo ya molelo

e e tshubelang dithaba;

₁₅ba khukhele jalo ka ledimo le legolo

la gago le le boitshegang;

o ba boifise ka matsubutsubu

a gago.

₁₆A difatlhogo tsa bone

di tladiwe tshosobagano;

gore ba tle ba batle

leina la gago, Jehofa.

₁₇A ba tlhajwe ke ditlhong,

ba tseanngwe ka bosakhutleng;

ee, ba swabisiwe ba nyelele;

₁₈gore ba tle ba itse fa wena wesi;

yo leina la gago e leng Jehofa,

o le Mogodimodimo,

o okame lefatshe lotlhe.