Thapelo ya boikanyo
Pesalema ya ga Dafite; Mikitame, ya jale fa Bafilisitia ba mo tshwara mo Gathe. Pina ya moopedi yo mogolo; e laeletswe Jonatha-elema-rehokime.
1Modimo, a ko o nne
boutlwelobotlhoko mo go nna;
gonne motho o rata a bo a ka
nkometsa; o a mpatika ka go tlhola
a tlhabana ka letsatsi lotlhe.
2Baba ba me ba rata ba ka bo ba
nkometsa ka letsatsi lotlhe;
gonne ba bantsi ba ba tlhabanang
le nna ka bopelompe.
3Mo motlheng o ke boifang ka one,
ke tlaa ikanya mo go wena.
4Mo Modimong
ke tlaa baka lefoko la one;
ke ikantse mo go one Modimo,
ga nketla ke boifa;
kana yo o nama o ka ntirang?
5Ba tlhola ba sokamisa mafoko a me
letsatsi lotlhe;
megopolo yotlhe ya bone
e nkemeletse go ntirela bosula.
6Ba a iphutha, ba a iphitlha,
ba lata motlhala wa me,
fela jaaka ba ntse
ba laletse mowa wa me.
7A ba tlaa falola ka boikepo?
Modimo diga ditšhaba mo bogaleng.
8Dikgarakgatshego tsa me o a di bala.
A ko o tsenye dikeledi tsa me
tsotlhe mo modutwaneng wa gago;
a ga di mo lokwalong lwa gago?
9Ke gone baba ba me
ba tlaa boang ka morago
mo letsatsing le ke bitsang ka lone;
mo ke a go itse,
fa Modimo o le ntlheng ya me.
10Mo Modimong ke tlaa baka lefoko
la one; mo go Jehofa
ke tlaa baka lefoko la gagwe.
11Ke ikantse mo go one Modimo,
ga nketla ke boifa,
kana motho o ka ntirang?
12Maikano a gago Modimo
a mo go nna;
ke tlaa go ntshetsa ditshupelo
tsa go leboga.
13Gonne o golotse mowa wa me
mo losong; a ga o a thiba
dinao tsa me mo go kgotšweng?
Gore ke tle ke nne ke tsamaye
fa pele ga Modimo
mo leseding la batshedi.
