Pesalema 55

₁Sekegela morapelo wa me tsebe

Modimo; o se ka wa iphitlhela

mokokotlelo wa me.

₂Nkela tlhoko, o nkarabe;

ke tlabatlaba mo go itokeng ga me,

ke a duma;

₃ka ntlha ya lentswe la mmaba,

ka ntlha ya patiko ya baikepi;

gonne ba latlhela boikepo

mo go nna,

ba mpogisa ka bogale.

₄Pelo ya me e tlhokofaditswe thata

mo teng ga me;

le ditheregiso tsa loso di nkwetse.

₅Go boifa le go roroma go tsile

mo go nna;

le go tshoga mo go be

go nkhurumeditse.

₆Ka ba ka tla ka re:

“Ija! Ke ka bo ke na le diphuka

jaaka lephoi!

Foo ke ne ke tlaa fofela koo,

ke tsamaya ke nna kwa boikhutsong.

₇Bonang,

jalo ke ne ke tlaa timelela kgakala,

ke ne ke tlaa nna nna

mo nageng. Sela.

₈Ke ne ke tlaa itlhaganelela

botshabelonyana,

ke tshaba matsubutsubu a phefo

le ledimo.”

₉Morena, senya,

o fatole loleme lwa bone;

gonne ke bonye go thubaka

le go lwa mo motseng.

₁₀Motshegare le bosigo

ba dikologa mo dithakong tsa one;

boikepo bo mo gare ga one

le bosenyi.

₁₁Tshiamololo e mo gare ga one;

patiko ga e tloge le boferefere

mo mebileng ya one.

₁₂Gonne yo o neng a nkgoba

e ne e se mmaba;

fa go ne go ntse jalo

nka bo ke go itshoketse,

le gone yo o neng a inkgodisetsa

e ne e se yo o nkilang,

fa go ne go ntse jalo

nka bo ke mo iphitlhetse;

₁₃mme e ne e le wena monna,

molekane wa me, kala ya me,

le tsala ya me e ke itsanyeng nayo.

₁₄Re ne re tle re gakololane mmogo

mo go monate,

ra tsamaya mo ntlong ya Modimo

re na le tshobokano ya batho.

₁₅A ba welwe ke loso ka tshoganetso,

a ba fologele mo moleteng

ba sa ntse ba utlwa;

gonne boikepo bo mo boagong jwa

bone mo gare ga bone.

₁₆Ka ga me, ke tlaa bitsa Modimo;

mme Jehofa o tlaa mpoloka.

₁₇Ke tlaa itoka, ke duma,

maitseboa le ka moso,

le motshegare,

mme o tlaa utlwa lentswe la me.

₁₈O golotse mowa wa me ka kagiso

mo tlhabanong e e neng e mphenya;

gonne ba ba lwang le nna

ba ne ba le bantsi.

₁₉Modimo o tlaa utlwa,

o ba o ba patika,

e bong one o o sa leng o nna

bogologolo, Sela,

ke go re, banna ba ba se nang

diphetogo, mme ba boifa Modimo.

₂₀Ba ba neng ba agisantse nae

monna yo, o ba ntsheditse mabogo

go tlhabana nabo;

o tlhapaditse kgolagano ya gagwe.

₂₁Legano la gagwe le ne le le borethe

jaaka mafura a serethe,

pelo ya gagwe yone e ne e le ntwa fela;

mafoko a gagwe a ne a gaisa

lookwane ka boleta,

le fa go ntse jalo e ne

e le ditšhaka fela tse di ekilweng.

₂₂Latlhela morwalo wa gago mo go

Jehofa,

mme o tlaa go kokotletsa;

ga a ketla a leseletsa mosiami gope

go tshikinngwa.

₂₃Mme wena, Modimo,

o tlaa ba folosetsa mo moleteng

wa tshenyegelo;

ba tsholola madi, le ba ba tsietsang,

ga ba ketla ba tshela ba swetsa

bontlha bongwe

jwa malatsi a bone;

mme nna ke tlaa ikanya mo go wena.