Ditiro le molao wa Modimo ka ga tsa tlholego le lefoko
Pesalema ya ga Dafite. Ya moopedi yo mogolo.
1Magodimo a bolela kgalalelo
ya Modimo; phuthologo le yone
e supa tiro ya diatla tsa one.
2Letsatsi le tlhomaganya puo
le letsatsi le lengwe,
bosigo bo tlhomaganya tshupo
ya kitso le bosigo jo bongwe.
3Ga go na puo le fa e le loleme;
lentswe la one
ga le ka ke la utlwiwa.
4Thapo ya one e e lekanyang
e ile go ralala lefatshe lotlhe,
le mafoko a one
a ile kwa bokhutlong jwa lefatshe.
O tlhometse letsatsi motlaagana
mo go one.
5Le ntse jaaka monyadi
fa a tswa mo borobalong jwa gagwe,
le ba le itumela jaaka monna
yo o thata
fa a siana mo tshianong ya gagwe.
6Go tswa ga lone go simologe
kwa bokhutlong jwa legodimo,
go dikologa ga lone
go ye kwa dikhutlong tsa gone;
mme ga go na sepe
se se fitlhegetseng
mogote wa lone.
7Molao wa ga Jehofa o itekanetse,
o rudisa mowa;
tshupo ya ga Jehofa e tlhomamo,
e tlhalefisa ba ba sa tlhalefang.
8Ditao tsa ga Jehofa di siame,
di itumedisa pelo;
taolo ya ga Jehofa e itshekile,
e tsenya matlho lesedi.
9Poifo ya ga Jehofa e ntle,
e ntse ka bosakhutleng;
dikatlholo tsa ga Jehofa
di boammaaruri,
di siame fela gotlhe.
10Di eletsega bogolo go gouta,
ee, bogolo go gouta e ntsi,
e e bontle bogolo; di bile di botshe
bogolo go dinotshe,
le bogolo go lomepa lwa dinotshe.
11Le gone gape motlhanka wa gago
o tlhagisiwa ke tsone;
mo go di tshegetseng
go tuelo e kgolo.
12E mang yo o ka lemogang
ditimelo tsa gagwe?
A ko o ntlose melato
e e fitlhegileng.
13O bo o kganele motlhanka wa gago
mo maleong a boitaletso;
a a se nne le taolo mo go nna;
foo ke tlaa nna boitekanelo,
ke tlaa bo ke se molato
wa tlolo e kgolo.
14A mafoko a molomo wa me,
le go akanya ga pelo ya me,
go nne tebosego
mo ponong ya gago, Jehofa,
lefika la me le morekolodi wa me.
