Pesalema 18

₁Ke a go rata Jehofa,

thata ya me.

₂Jehofa ke lefika la me,

le kago ya me ya phemelo,

le mogolodi wa me;

Modimo wa me,

lefika la me le le thata,

ke tlaa ikanya mo go one;

thebe ya me,

le lonaka lwa poloko ya me,

le kago ya me e e godileng

ya tlhabanelo.

₃Ke tlaa bitsa Jehofa

yo o tshwanetsweng ke go bakwa;

jalo ke tlaa bolokwa

mo babeng ba me.

₄Dikgole tsa loso

di ne di ntsentse gare,

le merwalela ya boikepo ya mpoifisa.

₅Dikgole tsa Bobipo di ne di ntharile;

dirai tsa loso tsa nkwela.

₆Mo pitlaganong ya me

ka bitsa Jehofa,

ka goela Modimong wa me;

a utlwa lentswe la me

a le mo tempeleng ya gagwe

e e boitshepo,

selelo sa me fa pele ga gagwe

sa mo tsena ka ditsebe.

₇Foo lefatshe la reketla la roroma,

metheo ya dithaba le yone ya suta

ya reketla,

ka gobo a le bogale thata.

₈Ga kua mosi

o tswa dinkong tsa gagwe,

molelo o o tswang mo molomong wa

gagwe wa laila;

magala a tshubiwa ke one.

₉Magodimo le one

a a oba, a ba a fologa;

lefifi le lentsho la bo le le

fa tlase ga dinao tsa gagwe.

₁₀A bo a palame tšheruba, a fofa;

ee, a fofa ka bofefo mo diphukeng

tsa phefo.

₁₁A dira lefifi felo ga gagwe

ga maiphitlho, mogope wa gagwe

ka fa ntlheng tsotlhe tsa gagwe;

lefifi la metsi,

maru a maima a legodimo.

₁₂Ka go galalela

mo go neng go mo eteletse pele,

maru a gagwe a maima a feta,

sefako le magala a molelo.

₁₃le gone Jehofa a dumisa maru

mo magodimong,

Mogodimodimo a ntsha kodu;

sefako le magala a molelo.

₁₄A hula metswi ya gagwe

a ba phatlalatsa;

ee, dikgadima di le dintsi

mme a ba phatlalatsa a ba alola.

₁₅Foo meedi ya metsi ya bonala,

metheo ya lefatshe le yone

ya bipololwa, ka kgalemo ya gago,

Jehofa, ka pudulo ya mowa

wa dinko tsa gago.

₁₆A roma a le godimong, a ntsaya;

a ntshwatola mo metsing a magolo.

₁₇A nkgolola mo mmabeng wa me

yo o thata,

le mo go ba ba nkidileng,

gonne ba le thata bobe mo go nna.

₁₈Ba ne ba nkwela godimo

mo letsatsing la tatlhego ya me;

mme Jehofa ya nna ene

seitshwarelelo sa me.

₁₉A nntshetsa kwa felong

fa go atlhameng; a nkgolola,

ka gobo a itumela thata mo go nna.

₂₀Jehofa o ne a ntuela

ka fa tshiamong ya me;

ka fa go itshepeng ga diatla tsa me

o ntefetse.

₂₁Gonne ke tshwere ditsela

tsa ga Jehofa,

le gone ga ke a kgaogana le Modimo

wa me ka go ikepa.

₂₂Gonne dikatlholo tsotlhe tsa gagwe

di ne di le fa pele ga me,

mme ke se ka ka tlosa melao

ya gagwe fa go nna.

₂₃Le gone ke ne ke le boitekanelo

mo go ene, mme ka ithiba

mo boikepong jwa me.

₂₄Ke gone ka moo Jehofa o ntefetseng

ka fa tshiamong ya me,

ka fa go itshepeng ga diatla tsa me

mo matlhong a gagwe.

₂₅Yo o kutlwelobotlhoko

o tlaa mo itshupetsa

fa o le kutlwelobotlhoko;

monna yo o boitekanelo

o tlaa mo itshupetsa o le boitekanelo;

₂₆yo o itshekileng

o tlaa mo itshupetsa o le boitsheko;

yo o kgopo

o tlaa mo itshupetsa fa o le lesoko.

₂₇Gonne o tlaa boloka batho

ba ba patikwang;

matlho a a kadileng

o tlaa a bokalatsa.

₂₈Gonne o tlaa tshuba lobone lwa me;

Jehofa Modimo wa me

o tlaa bonesa lefifi la me.

₂₉Gonne ke sotlhomela lesomo ka wena;

ke ba ke tlola lorako

ka Modimo wa me.

₃₀Ka ga Modimo,

tsela ya one e lekanetse;

lefoko la ga Jehofa le lekilwe;

ene ke thebe mo go bone botlhe

ba ba mo ikanyang.

₃₁Gonne yo e leng Modimo ke mang,

fa e se Jehofa?

Yo o leng lefika ke mang,

fa e se Modimo wa rona?

₃₂E bong Modimo o o ntlamang

ka nonofo, o bo o dire

tsela ya me e nne boitekanelo.

₃₃O dira dinao tsa me

go nna jaaka maoto a tshephe;

mme o mpeye mo mafelong a me

a a godimo.

₃₄O ruta diatla tsa me go tlhabana;

mabogo a me a ba a tle a obe bora

jwa kgotlho.

₃₅O bile o nneile le thebe

ya poloka ya gago;

letsogo la gago le le siameng

le ntshegeditse,

le bonolo jwa gago

bo ntirile mogolo.

₃₆Dikgato tsa me

o di atlhamoloseditse fa tlase ga me,

dinao tsa me ga di a relela.

₃₇Ke tlaa khukhela baba ba me,

ke ba tshwara;

le gone ga nketla ke bowa

go tsamaya ba nyelediwa pele.

₃₈Ke tlaa ba kgabuka,

ba ba ba tla ba retelelwa

ke go tsoga;

ba tlaa wela fa tlase ga dinao tsa me.

₃₉Gonne o ntlamanyeditse tlhabano

ka nonofo;

bone ba ba neng ba ntsogologetse

o ba khubamisitse fa tlase ga me.

₄₀Le gone o dirile gore

baba ba me ba nneye mekotla

gore ke tle ke kgaole ba ba nkilang.

₄₁Ba ne ba goa, mme ga bo

go se na ope yo o bolokang;

le kwa go Jehofa,

mme a se ka a ba araba.

₄₂Foo ka ba leta

jaaka lorole fa pele ga phefo;

ka ba gelolela kwa ntle

jaaka seretse sa mebila.

₄₃O nkgolotse

mo petapetanong tsa batho;

o ntirile tlhogo ya merafe;

sešaba se ke ntseng ke sa se itse

se tlaa ntirela.

₄₄Ba tlaa re fela ba utlwa ga me,

ba bo ba ineela fela mo go nna;

baeng ba tlaa inkhubamisetsa.

₄₅Baeng ba tlaa kaologa,

mme ba tlaa tla ba roroma,

ba tswa mo dipharong tsa bone.

₄₆Jehofa o tshedile;

a go bakwe lefika la me;

a go godisiwe Modimo

wa poloko ya me;

₄₇e bong Modimo o o mpusolosetsang,

o ba o khubamisa batho

fa tlase ga me.

₄₈O mphalodisa mo babeng ba me;

ee, o a tle o nkgoleletse godimo

ga ba ba ntsogologelang;

o nkgolole mo mothong

yo o thubakang.

₄₉Ke gone ka mo

ke tlaa go ntshetsang malebogo,

Jehofa, mo merafeng,

ke tlaa opelela leina la gago dipako.

₅₀O naya kgosi ya gagwe

kgololego e kgolo;

o supetsa motlodiwa wa gagwe

bopelonomi mo go Dafite

le losika lwa gagwe

go ya bosakhutleng.