DIPALO 7

₁Ga dirala ya re mo tsatsing le Moše o swetsang go tlhoma motlaagana ka lone, a o tloditse, a o itshepisitse, le dilo tsotlhe tse di nnang mo go one, le sebeso, le dilo tsotlhe tsa sone, a di tloditse a di itshepisitse; ₂dikgosana tsa Iseraele, ditlhogo tsa dikgotla tsa borra ba bone tsa isa tshupelo; tse e ne e le dikgosana tsa ditso, e le tsone tse di beilweng mo taolong mo go bone ba ba badilweng. ₃Ba isa seromololo sa bone fa pele ga Jehofa, makoloi a a khurumeditsweng a le marataro, dikgomo di le 12, koloi e le nngwe fela e pataganetswe ke dikgosana di le pedi, mme kgomo ya mongwe le mongwe wa bone, ba di isa fa pele ga motlaagana. ₄Jehofa a bua le Moše, a re: ₅“Di tseye mo go bone, gore e nne tsa go dira tirelo ya mogope wa bophuthegelo; o di neye Balefi, mongwe le mongwe ka fa tirelong ya gagwe.” ₆Moše a tsaya makoloi le dikgomo, a di naya Balefi. ₇A naya bomorwa Gerešone makoloi a le mabedi le dikgomo di le nne, ka fa tirelong ya bone; ₈a naya bomorwa Merari makoloi a le mane le dikgomo di le bofera mebedi, ka fa tirelong ya bone, fa tlase ga seatla sa ga Ithamare morwa Arone moperesiti. ₉Mme a se ka a naya bomorwa Kohathe epe, ka tirelo ya felo ga boitshepo e le ya bone; ba ne ba tle ba go rwale mo maruding. ₁₀Dikgosana tsa isetsa tshwaelo ya sebeso tshupelo mo tsatsing le se tloditsweng ka lone, ke go re dikgosana tsa isa seromololo sa tsone fa pele ga sebeso. ₁₁Jehofa a raya Moše, a re: “A ba ise seromololo sa bone sa tshwaelo ya sebeso, kgosana nngwe le nngwe ka letsatsi la yone.”

₁₂Yo o isitseng seromololo sa gagwe ka letsatsi la ntlha e ne e le Našone morwa Aminatabe, wa lotso lwa Juta. ₁₃Seromololo sa gagwe e le sejana sa selefera se le sengwe fela, bokete jwa sone e le dikilokerama di le 1,5, mogotšana wa selefera o le mongwe fela o o dikerama di le 800, ka fa selekanyong sa felo ga boitshepo; dilo tse tsoo pedi di ne di tletse setou se se tlhakanyeng le lookwane, e le tshupelo ya boupe; ₁₄loswana lwa gouta lo le longwe fela lo lo dikerama di le 110 lo tletse maswalo; ₁₅kgongwana e le nngwe fela, phelefu e le nngwe fela, kwanyana e tonanyana e le nngwe fela ya ngwaga wa ntlha, e le tshupelo e e fisiwang; ₁₆podi e le ngwe fela e tonanyana ya tshupelelo ya boleo; ₁₇dikgomo di le pedi, diphelefu di le tlhano, diphoko di le tlhano, dikwanyana tse ditonanyana di le tlhano tsa ngwaga wa ntlha, e le tsa setlhabelo sa ditshupelo tsa kagiso; e le sone seromololo sa ga Našone morwa Aminatabe.

₁₈Nethanele morwa Suare, kgosana ya Isakare, a isa ka letsatsi la bobedi: ₁₉A isa seromololo sa gagwe e le sejana sa selefera se le sengwe fela, bokete jwa sone e le dikilokerama di le 1,5, mogotšana wa selefera o le mongwe fela wa dikerama di le 800, ka fa selekanyong sa felo ga boitshepo; dilo tse tsoo pedi di tletse setou se se tlhakanyeng le lookwane, e le tshupelo ya boupe; ₂₀loswana lwa gouta lo le longwe fela lo lo dikerama di le 110, lo tletse maswalo; ₂₁kgongwana e le nngwe fela, phelefu e le nngwe fela, kwanyana e tonanyana e le nngwe fela ya ngwaga wa ntlha, e le tshupelo e e fisiwang; ₂₂podi e tonanyana e le nngwe fela ya tshupelelo ya boleo; ₂₃dikgomo di le pedi, diphelefu di le tlhano, diphoko di le tlhano, dikwanyana tse ditonanyana di le tlhano tsa ngwaga wa ntlha, e le setlhabelo sa ditshupelo tsa kagiso; e le sone seromololo sa ga Nethanele morwa Suare.

₂₄Eliabe morwa Helone, kgosana ya bana ba ga Sebulone, a isa ka letsatsi la boraro: ₂₅Seromololo sa gagwe, e le sejana sa selefera se le sengwe fela, bokete jwa sone e le dikilokerama di le 1,5, mogotšana wa selefera o le mongwe fela o o dikerama di le 800, ka fa selekanyong sa felo ga boitshepo; dilo tse tsoo pedi di ne di tletse setou se se tlhakanyeng le lookwane, e le tshupelo ya boupe; ₂₆loswana lwa gouta lo le longwe fela lo lo dikerama di 110, lo tletse maswalo; ₂₇kgongwana e le nngwe fela ya ngwaga wa ntlha, e le tshupelo e e fisiwang; ₂₈podi e le nngwe fela e tonanyana ya tshupelelo ya boleo; ₂₉dikgomo di le pedi, diphelefu di le tlhano, diphoko di le tlhano, dikwanyana tse ditonanyana di le tlhano tsa ngwaga wa ntlha, e le setlhabelo sa ditshupelo tsa kagiso; e ne e le sone seromololo sa ga Eliabe morwa Helone.

₃₀Elisure morwa Shedure, kgosana ya bana ba ga Rubene, a isa ka letsatsi la bone: ₃₁Seromololo sa gagwe e ne e le sejana sa selefera se le sengwe fela, bokete jwa sone e le dikilokerama di le 1,5, mogotšana wa selefera o le mongwe fela o o dikerama di 800, ka fa selekanyong sa felo ga boitshepo; dilo tse tsoo pedi di tletse setou se se tlhakanyeng le lookwane, e le tshupelo ya boupe; ₃₂loswana lwa gouta lo le longwe fela lo lo dikerama di 110, lo tletse maswalo; ₃₃kgongwana e le nngwe fela, phelefu e le nngwe fela, kwanyana e tonanyana e le nngwe fela ya ngwaga wa ntlha, e le tshupelo e e fisiwang; ₃₄podi e tonanyana e le nngwe fela ya tshupelelo ya boleo; ₃₅dikgomo di le pedi, diphelefu di le tlhano, diphoko di le tlhano, dikwanyana tse ditonanyana di le tlhano tsa ngwaga wa ntlha, e le setlhabelo sa ditshupelo tsa kagiso; e ne e le sone seromololo sa ga Elisure morwa Shedure.

₃₆Ka letsatsi la botlhano Shelumiele morwa Surišatai, kgosana ya bana ba ga Simeone: ₃₇Seromololo sa gagwe e le sejana sa selefera se le sengwe fela, bokete jwa sone e le dikilokerama di le 1,5, mogotšana wa selefera o le mongwe fela o o dikerama di 800, ka fa selekanyong sa felo ga boitshepo; dilo tse tsoo pedi di tletse setou se se tlhakanyeng le lookwane, e le tshupelo ya boupe; ₃₈loswana lwa gouta lo le longwe fela lo lo dikerama di 110, lo tletse maswalo; ₃₉kgongwana e le nngwe fela, phelefu e le nngwe fela, kwanyana e tonanyana e le nngwe fela ya ngwaga wa ntlha, e le tshupelo e e fisiwang; ₄₀podi e tonanyana e le nngwe fela ya tshupelelo ya boleo; ₄₁dikgomo di le pedi, diphelefu di le tlhano, diphoko di le tlhano, dikwanyana tse ditonanyana di le tlhano tsa ngwaga wa ntlha, e le setlhabelo sa ditshupelo tsa kagiso; e ne e le sone seromololo sa ga Shelumiele morwa Surišatai.

₄₂Ka letsatsi la borataro Eliasafe morwa Duele, kgosana ya bana ba ga Gate: ₄₃Seromololo sa gagwe e ne e le sejana sa selefera se le sengwe fela, bokete jwa sone e le dikilokerama di le 1,5, mogotšana wa selefera o le mongwe fela o o dikerama di 800, ka fa selekanyong sa felo ga boitshepo; dilo tse tsoo pedi di ne di tletse setou se se tlhakanyeng le lookwane, e le tshupelo ya boupe; ₄₄loswana lwa gouta le le longwe fela lo lo dikerama di 110, lo tletse maswalo; ₄₅kgongwana e le nngwe fela, phelefu e le nngwe fela, kwanyana e tonanyana e le nngwe fela ya ngwaga wa ntlha, e le tshupelo e e fisiwang; ₄₆podi e tonanyana e le nngwe fela e le tshupelelo ya boleo; ₄₇dikgomo di le pedi, diphelefu di le tlhano, diphoko di le tlhano, dikwanyana tse ditonanyana di le tlhano tse ngwaga wa ntlha, e le setlhabelo sa ditshupelo tsa kagiso; e ne e le sone seromololo sa ga Eliasafe morwa Duele.

₄₈Ka letsatsi la bosupa Elišama morwa Amihute, kgosana ya bana ba ga Eferaime: ₄₉Seromololo sa gagwe e le sejana sa selefera se le sengwe fela, bokete jwa sone e le dikilokerama di le 1,5, mogotšana wa selefera o le mongwe fela o o dikerama di 800, ka fa selekanyong sa felo ga boitshepo; dilo tse tsoo pedi di tletse setou se se tlhakanyeng le lookwane, e le tshupelo ya boupe; ₅₀loswana lwa gouta lo le longwe fela lo lo dikerama di 110, lo tletse maswalo; ₅₁kgongwana e le nngwe fela, phelefu e le nngwe fela, kwanyana e tonanyana e le nngwe fela ya ngwaga wa ntlha, e le tshupelo e e fisiwang, ₅₂podi e tonanyana e le nngwe fela e le tshupelelo ya boleo; ₅₃dikgomo di le pedi, diphelefu di le tlhano, diphoko di le tlhano, dikwanyana tse ditonanyana di le tlhano tsa ngwaga wa ntlha, e le tlhano tsa ngwaga wa ntlha, e le setlhabelo sa ditshupelo tsa kagiso, e le sone seromololo sa ga Elišama morwa Amihute.

₅₄Ka letsatsi la bofera mebedi Gamaliele morwa Petasure, kgosana ya bana ba ga Manase: ₅₅Seromololo sa gagwe e ne e le sejana sa selefera se le sengwe fela, bokete jwa sone e le dikilokerama di le 1,5, mogotšana wa selefera o le mongwe fela o o dikerama di 800, ka fa selekanyong sa felo ga boitshepo; dilo tse tsoo pedi di tletse setou se se tlhakanyeng le lookwane, e le tshupelo ya boupe; ₅₆loswana lwa gouta lo le longwe fela lo lo dikerama di 110, lo tletse maswalo; ₅₇kgongwana e le nngwe fela, phelefu e le nngwe fela, kwanyana e tonanyana e le nngwe fela ya ngwaga wa ntlha, e le tshupelo e e fisiwang; ₅₈podi e tonanyana e le nngwe fela, e le tshupelelo ya boleo; ₅₉dikgomo di le pedi, diphelefu di le tlhano le dikwanyana tse ditonanyana di le tlhano tsa ngwaga wa ntlha, e le setlhabelo sa ditshupelo tsa kagiso, e le sone seromololo sa ga Gamaliele morwa Petasure.

₆₀Ka letsatsi la bofera mongwe fela Abitane morwa Giteoni, kgosana ya bana ba ga Benjamine: ₆₁Seromololo sa gagwe e ne e le sejana sa gouta se le sengwe fela, bokete jwa sone e le dikilokerama di le 1,5, mogotšana wa selefera o le mongwe fela o o dikerama di 800, ka fa selekanyong sa felo ga boitshepo; dilo tse tsoo pedi di tletse setou se se tlhakanyeng le lookwane, e le tshupelo ya boupe; ₆₂loswana lwa gouta lo le longwe fela lo lo dikerama di 110 lo tletse maswalo; ₆₃kgongwana e le nngwe fela, phelefu e le nngwe fela, kwanyana e tonanyana e le nngwe fela ya ngwaga wa ntlha, e le tshupelo e e fisiwang; ₆₄podi e tonanyana e le nngwe fela e le tshupelelo ya boleo; ₆₅dikgomo di le pedi, diphelefu di le tlhano, diphoko di le tlhano, dikwanyana tse ditonanyana di le tlhano tsa ngwaga wa ntlha, e le setlhabelo sa ditshupelo tsa kagiso; e le sone seromololo sa ga Abitane morwa Giteoni.

₆₆Ka letsatsi la lesome Ahiesere morwa Amišatai, kgosana ya bana ba ga Dane: ₆₇Seromololo sa gagwe e ne e le sejana sa selefera se le sengwe fela, bokete jwa sone e le dikilokerama di le 1,5, mogotšana wa selefera o le mongwe fela o o dikerama di 800, ka fa selekanyong sa felo ga boitshepo; dilo tse tsoo pedi di tletse setou se se tlhakanyeng le lookwane, e le tshupelo ya boupe; ₆₈loswana lwa gouta lo le longwe fela lo lo dikerama di 110, lo tletse maswalo; ₆₉kgongwana e le nngwe fela, phelefu e le nngwe fela; kwanyana e tonanyana e le nngwe fela ya ngwaga wa ntlha, e le tshupelo e e fisiwang; ₇₀podi e tonanyana e le nngwe fela, e le tshupelelo ya boleo; ₇₁dikgomo di le pedi, diphelefu di le tlhano, diphoko di le tlhano, dikwanyana tse ditonanyana di le tlhano tsa ngwaga wa ntlha, e le setlhabelo sa ditshupelo tsa kagiso, e le sone seromololo sa ga Ahiesere morwa Amišatai.

₇₂Ka letsatsi la 11 Pagiele morwa Okerane, kgosana ya bana ba ga Ašere: ₇₃Seromololo sa gagwe e ne e le sejane sa selefera se le se sengwe fela, bokete jwa sone e le dikilokerama di le 1,5, mogotšana wa selefera o le mongwe fela o o dikerama di 800, ka fa selekanyong sa felo ga boitshepo; dilo tse tsoo pedi di tletse setou se se tlhakanyeng le lookwane, e le tshupelo ya boupe; ₇₄loswana lwa gouta lo le longwe fela lo lo dikerama di 110, lo tletse maswalo; ₇₅kgongwana e le nngwe fela, phelefu e le nngwe fela, kwanyana e tonanyana e le nngwe fela ya ngwaga wa ntlha, e le tshupelo e e fisiwang; ₇₆podi e tonanyana e le nngwe fela e le tshupelelo ya boleo; ₇₇dikgomo di le pedi, diphelefu di le tlhano, diphoko di le tlhano, dikwanyana tse ditonanyana di le tlhano tsa ngwaga wa ntlha, e le setlhabelo sa ditshupelo tsa kagiso, e le sone seromololo sa ga Pagiele morwa Okerane.

₇₈Ka letsatsi la bo 12 Ahira morwa Enane, kgosana ya bana ba ga Nafetali: ₇₉Seromololo sa gagwe e ne e le sejana sa selefera se le sengwe fela, bokete jwa sone e le dikilokerama di le 1,5, mogotšana wa selefera o le mongwe fela o o dikerama di 800, ka fa selekanyong sa felo ga boitshepo; dilo tse tsoo pedi di tletse setou se se tlhakanyeng le lookwane, e le tshupelo ya boupe; ₈₀loswana lwa gouta lo le longwe fela lo lo dikerama di 110, lo tletse maswalo; ₈₁kgongwana e le nngwe fela, phelefu e le nngwe fela, kwanyana e tonanyana e le nngwe fela ya ngwaga wa ntlha, e le tshupelo e e fisiwang; ₈₂podi e tonanyana e le nngwe fela e le tshupelelo ya boleo; ₈₃dikgomo di le pedi, diphelefu di le tlhano, diphoko di le tlhano, dikwanyana tse ditonanyana di le tlhano tsa ngwaga wa ntlha, e le setlhabelo sa ditshupelo tsa kagiso, e le sone seromololo sa ga Ahira morwa Enane.

₈₄E ne e le yone neelo ya sebeso ke dikgosana tsa Iseraele, ka letsatsi le se tloditsweng ka lone; e bong dijana tsa selefera di le 12, megotšana ya selefera e le 12, dintshwana tsa gouta di le 12; ₈₅sejana sengwe le sengwe sa selefera se le bokete jwa dikilokerama di le 1,5, selefera sa dijana tse fa se le mmogo, e ne e le dikilokerama di le 27,6, sengwe le sengwe ka fa selekanyong sa felo ga boitshepo; ₈₆dintshwana tsa gouta tse di 12 tse di tletseng maswalo, bokete jwa tsone tsotlhe di kopanye e ne e le dikilokerama di le 1,32, nngwe le nngwe bokete jwa yone e le jwa dikerama di le 110 ka fa selekanyong sa felo ga boitshepo. ₈₇Dikgomo tsotlhe tsa tshupelo e e fisiwang di ne di le 12, diphelefu di le 12, dikwanyana tse ditonanyana tsa ngwaga wa ntlha di le 12, le tshupelo tsa tsone tsa boupe; dipodi tse ditonanyana tsa tshupelelo ya boleo di le 12. ₈₈Dikgomo tsotlhe tsa ditlhabelo tsa ditshupelo tsa kagiso e ne e le dikgomo di le 24, diphelefu di le 60, dipodi tse ditonanyana di le 60, le dikwanyana tse ditonanyana tsa ngwaga wa ntlha di le 60. E ne e le yone neelo ya sebeso, se sena go tlodiwa.

₈₉E rile Moše a ya mo mogopeng wa bophuthegelo a ya go bua nae, foo a utlwa Lentswe le bua nae le tswa fa godimo ga senno sa boutlwelobotlhoko se se mo godimo ga letlole la tshupo, le tswa mo gare ga ditšheruba tse pedi, mme a bua nae.