DIPALO 6

₁Jehofa a bua le Moše, a re: ₂“Bua le bana ba Iseraele, o ba reye o re: E re fa monna kgotsa mosadi a dira ikano nngwe e e itsegeng, ikano ya Monasirita, ya go itomololela Jehofa: ₃A a ikgaoganye le bojalwa jwa mofine, le bojalwa jo bo loileng; a se ka a nwa botšarara jwa bojalwa jwa mofine, kgotsa botšarara jwa bojalwa jo bo loileng, le gone a se ka a nwa metsi ape a loungo lwa mofine, le gone a se ka a ja loungo lwa mofine lo loša, kgotsa lo lo swabitsitsweng. ₄Ka malatsi otlhe a tomologo ya gagwe a se ka a ja sepe se se dirilweng ka mofine, le fa e le ka dithapo, le fa e le ka makape.

₅“Ka malatsi otlhe a ikano ya gagwe ya tomologo, go se ka ga tla logare mo tlhogong ya gagwe; go tsamaya malatsi a feta, a o itomololetseng Jehofa ka one; o tlaa nna boitshepo, a lese makaodi a moriri wa tlhogo ya gagwe a gole a nne maleele.

₆“Ka malatsi otlhe a o itomololetseng Jehofa ka one a a se atamele setoto sa motho. ₇A se ka a itshekolola ka ga rraagwe, le fa e le ka ga mmaagwe, le fa e le ka ga ngwana wa ga rraagwe wa mosimane, kgotsa wa mosetsana fa ba a swa, gonne go itomololela Modimo ga gagwe go mo tlhogong ya gagwe. ₈Ka malatsi otlhe a boitomololo jwa gagwe o boitshepelo Jehofa.

₉“Fa motho mongwe a swela fa go ene ka tshoganetso fela, mme a itshekolola tlhogo ya gagwe ya tomologo, foo a ipeole tlhogo ya gagwe mo letsatsing la intlafatso ya gagwe, a e beole ka letsatsi la bosupa. ₁₀E re ka letsatsi la bofera mebedi a ise maphoi a le mabedi kwa moperesiting, kwa mojakong wa mogope wa bophuthegelo. ₁₁A moperesiti a ise lengwe tshupelelo ya boleo, le le lengwe tshupelo e e fisiwang, a mo direle tetlanyo ka a leofile ka ga baswi, mme a a itshepise tlhogo ya gagwe ka tsatsi leo. ₁₂A a lomololele Jehofa malatsi a tomologo ya gagwe, a ise kwanyana e tononyana ya ngwaga wa ntlha tshupelelo ya molato, mme malatsi a pele a tlaa bo a le lefela, ka tomologo ya gagwe e ne ya itshekololwa.

₁₃“O ke one molao wa Monasirita, fa malatsi a tomologo ya gagwe a fetile; a a isiwe kwa mojakong wa mogope wa bophuthegelo; ₁₄a a isetse Jehofa seromololo sa gagwe, e bong kwanyana e tonanyana e le nngwe fela e e se nang bogole, ya ngwaga wa ntlha, e le tshupelo e e fisiwang, le kwanyana e namagadi e le nngwe fela e e se nang bogole, ya ngwaga wa ntlha, e le tshupelelo ya boleo, le phelefu e le nngwe fela e e se nang bogole, e le ya ditshupelo tsa kagiso, ₁₅le seroto sa senkgwe se se sa bedisiwang, dipapetlana tsa setou se se tlhakanyeng le lookwane, le dinkgwenyana tse di lotsatsa tse di sa bedisiwang, tse di tloditsweng lookwane, di na le tshupelo ya tsone ya boupe le ditshupelo tsa tsone tse di nowang.

₁₆“A moperesiti a di ise fa pele ga Jehofa, a ise tshupelelo ya gagwe ya boleo le tshupelo ya gagwe e e fisiwang. ₁₇A a ise phelefu e le setlhabelo sa ditshupelo tsa kagiso go Jehofa, e na le seroto sa senkgwe se se sa bedisiwang; le gone moperesiti a ise tshupelo ya boupe ya one, le tshupelo ya one e e nowang. ₁₈A Monasirita a ipeole tlhogo ya gagwe ya tomologo fa mojakong wa mogope wa bophuthegelo, a tseye moriri wa tlhogo ya gagwe ya tomologo, a o tsenye mo molelong o o fa tlase ga setlhabelo sa ditshupelo tsa kagiso. ₁₉A moperesiti a tseye letsogo la phelefu le le apeilweng, le papetlana e le nngwe fela ya senkgwe mo serotong, le senkgwenyana se le sengwe fela se se lotsatsa, a di beye mo diatleng tsa Monasirita a sena go ipeola tlhogo ya tomologo. ₂₀A moperesiti a di fokise tshupelo ya mofoko fa pele ga Jehofa; yone e boitshepo e le ya moperesiti, e na le sehuba sa mofoko, le serope sa tsholetso; morago ga moo Monasirita o ka nwa bojalwa jwa mofine.

₂₁“Ke one molao wa Monasirita yo o ikanang, le wa seromololo sa gagwe mo go Jehofa ka ga tomologo ya gagwe, kwa ntle ga se o ka nonofang go se bona, jaaka ikano ya gagwe e o e ikanang, o na le go dira jalo ka fa molaong wa tomologo ya gagwe.”

₂₂Jehofa a bua le Moše, a re: ₂₃“Bua le Arone le bomorwawe, o re: Lo tle lo segofatse bana ba Iseraele ka go dira jaana: Lo ba reye lo re:

₂₇“Jalo ba tlaa bo ba baya leina la me mo baneng ba Iseraele, mme ke tlaa ba segofatsa.”