LUKE 4

₁Jesu a ntse a tletse Mowa o o Boitshepo, a boa kwa Joretane, a nna a tsamaisiwa ke Mowa mo gare ga naga, ₂a ntse a raelwa ke diabolo ka malatsi a 40. A se ka a ja sepe mo malatsing ao; mme a sena go feta, morago a bolawa ke tlala.

₃Mme diabolo a mo raya a re: “E re fa o le Morwa Modimo, raya lentswe le, gore le fetoge senkgwe.”

₄Jesu a mo fetola a re: “Go kwadilwe ga twe: ‘Motho ga a ketla a tshela ka senkgwe se le sosi.’ ”

₅Diabolo a mo tlhatlosa, a mmontsha magosi otlhe a lefatshe ka ponyo ya leitlho. ₆Diabolo a mo raya a re: “Ke tlaa go naya thata yotlhe e, le kgalalelo ya magosi a, gonne mo go neetswe nna, mme ke ka go naya yo ke ratang go go mo naya. ₇Ke gone fa o ka nkobamela, gotlhe e tlaa nna ga gago.”

₈Jesu a mo fetola a re: “Go kwadilwe ga twe: ‘O obamele Morena Modimo wa gago, mme o direle one o le osi fela.’ ”

₉Foo a mo isa kwa Jerusalema, a mmaya mo setlhoeng sa tempele, a mo raya a re: “E re fa o le Morwa Modimo, o le fano o itigele kwa tlase; ₁₀gonne go kwadilwe ga twe: ‘O tlaa laya baengele ba one ka ga gago gore ba go dibele; ₁₁ba tlaa go legelela ka diatla gore e se re kgotsa motlhamongwe lonao lwa gago lwa sugakanngwa ke lentswe.’ ”

₁₂Jesu a mo fetola a re: “Go tulwe: ‘O se ka wa leka Morena Modimo wa gago.’ ”

₁₃E rile diabolo a sena go swetsa thaelo yotlhe, a mo tlogela ka lobaka.

₁₄Jesu a boela kwa Galilea ka thata ya Mowa; mme tumo ka ga gagwe ya tswela mo tikologong yotlhe ya lefatshe. ₁₅A ruta mo matlong a bone a thuto, a galalediwa ke botlhe fela.

₁₆Mme a fitlha mo Nasaretha kwa o goletseng teng; mme a tsena mo ntlong ya thuto ka letsatsi la Sabata jaaka a tlwaetse, a ema gore a bale. ₁₇Mme a neelwa lokwalo lwa moperofeti Isaia. A re a sena go menolola lokwalo, a bona felo fa go kwadilweng teng ga twe: ₁₈“Mowa wa Morena o mo go nna, gonne o ntloleditse go rerela bahumanegi Mafoko a a Molemo; o nthomile (go fodisa ba ba pelo di phatlogileng), go rerela bagolegwi kgololo, le phoufologo ya ba ba foufetseng, go golola ba ba teketilweng, ₁₉go bolela ngwaga o o lebosegang wa Morena.”

₂₀Mme a mena lokwalo, a ba a lo neela motlhanka, mme a dula. Matlho a botlhe ba ba mo ntlong ya thuto a bo a tlhomilwe mo go ene. ₂₁A simolola go ba raya a re: “Gompieno, lokwalo lo, lo dirafetse, mo ditsebeng tsa lona.”

₂₂Mme botlhe ba supa ka ga gagwe, ba gakgamalela mafoko a a monate a a tswang mo molomong wa gagwe. Ba re: “Yo, a ga se morwa Josefe?”

₂₃A ba raya a re: “Ruri, lo a bo lo tlaa mpolelela setshwantsho se, lo re: ‘Ngaka, iphodise; tsotlhe tse re di utwileng di dirilwe kwa Kaperenaume, o di dire le mono lefatsheng la gaeno.’ ” ₂₄A re: “Ruri ke o lo raya, ga go moperofeti ope yo o lebosegang mo lefatsheng la ga gabo.

₂₅“Ke lo bolelela boammaruri ka re, go ne go le basadi ba batlholagadi ba le bantsi mo go Iseraele, mo metlheng ya ga Elija, jale, ka legodimo le tswadilwe ka dinyaga di le tharo le dikgwedi di le thataro, mme ga nna leuba le legolo mo lefatsheng lotlhe; ₂₆Elija ga a ka a rongwa kwa go ope wa bone, fa e se kwa Sarepete mo lefatsheng la Sitone, kwa mosading yo e neng e le motlholagadi. ₂₇Gape go ne go le balepero ba le bantsi mo Iseraele mo metlheng ya moperofeti Eliša; mme ope wa bone a se ka a ntlafadiwa fa e se Naamane wa Mosiria.”

₂₈Botlhe ba ba mo ntlong ya thuto ba re ba utlwa dilo tse, ba tlala bogale. ₂₉Ba nanoga ba mo kgoromeletsa kwa ntle ga motse, ba mo gogela kwa tlhoreng ya thota e motse wa bone o agilweng mo go yone, gore ba mo piriganyetse ka kwa tlase. ₃₀Mme ene a ba ralala, a tswa a itsamaela fela.

₃₁A fitlha kwa Kaperenaume, motse wa Galilea. A bo a ba ruta ka letsatsi la Sabata. ₃₂Mme ba gakgamalela thuto ya gagwe; ka gonne lefoko la gagwe le ne le na le thata. ₃₃Mo ntlong ya thuto ga bo go le motho yo o nang le mowa o o maswe, mme a goa ka lentswe le legolo. ₃₄A re: “Hee! Re go dirang wena Jesu wa Nasaretha? A o tsile go re senya? Ke a go itse yo o leng ene; o Moitshepi wa Modimo.”

₃₅Mme Jesu a o kgalemela a re: “Didimala, o tswe mo go ene,” ya re mowa o o maswe o sena go mo piriganya fa gare ga bone, wa tswa mo go ene, mme wa se ka wa mo utlwisa botlhoko.

₃₆Botlhe ba welwa ke kgakgamalo, ba raana ba re: “Ana lefoko le ke la eng? Gonne o laola mewa e e maswe ka thata le ka nonofo, mme e tswe.” ₃₇Tumedi ka ga gagwe ya tswela kwa mafelong otlhe mo tikologong ya lefatshe.

₃₈Mme a ema a tswa mo ntlong ya thuto, a ba a tsena mo ntlong ya ga Simone. Mme mogwagadia Simone wa mosadi a bo a tshwerwe ke bolwetse jo bogolo jwa letshoroma; mme ba mo mo rapelela. ₃₉Mme a ya a mo okama, a kgalemela bolwetse jwa letshoroma; mme jwa mo tlogela; mme a akofa a ema, a ba direla.

₄₀Jaana e rile letsatsi le kotlomela, botlhe ba ba nang le ba ba bobolang malwetse mangwe le mangwe, ba ba isa kwa go ene; mme a baya diatla mo go mongwe le mongwe wa bone, a ba fodisa. ₄₁Le mewa e e maswe le yone ya tswa mo bathong ba le bantsi, ya goa ya re: “O Morwa Modimo.” Mme a e kgalemela, a se ka a e leseletsa go bua; ka e mo itse fa e le ene Keresete.

₄₂E rile bosigo bo sena go sa a tsamaya a ya kwa gare ga naga fela; mme batho ba mmatla, ba fitlha kwa go ene, ba re ba a mo kganela gore a se ba tlogele. ₄₃A ba raya a re: “Ke na le go rerela le metse e mengwe Mafoko a a Molemo a bogosi jwa Modimo, gonne ke romilwe go dira jalo.”

₄₄Mme a nna a rera mo matlong a thuto a Galilea.