LUKE 3

₁Jaana e rile ka ngwaga wa 15 wa puso ya ga Kaesare Tiberio, ka Ponto Pilato a le molaodi wa Jutea, le Herote a le kgosana ya Galilea, le Filipo monnawe a le kgosana ya Iturea le ya lefatshe la Terakoniti, le Lesaniase a le kgosana ya Abilene, ₂le Anase le Kaiafase ba le baperesiti ba bagolo, lefoko la Modimo la tla kwa go Johane morwa Sakaria, a le mo nageng. ₃Mme a tla mo lefatsheng lotlhe le le mo tikologong ya Joretane, a rera kolobetso ya boikwatlhao jo bo bonang boitshwarelo jwa dibe; ₄jaaka go kwadilwe mo lokwalong lwa mafoko a moperofeti Isaia, a re:

₇Foo a raya batho ba bantsintsi ba ba ileng go kolobediwa ke ene a re: “Lotsalo lwa dinoga ke lona, lo tlhagisitswe e mang go tshaba bogale jo bo tlang? ₈Ke gone ungwang maungo a a tshwanetseng boikwatlhao; mme lo se ka lwa simolola go ithaya lo re: ‘Re na le Aberahame rraetsho;’ gonne ke a lo raya, Modimo o nonofile go tsosetsa Aberahame bana ka maje a. ₉Le jaana selepe se tsepilwe mo metsweng ya ditlhare; ke gone setlhare sengwe le sengwe se se sa ungweng loungo lo lo molemo se a rengwa, se latlhelwe mo molelong.”

₁₀Matshutitshuti a batho a mmotsa a re: “Mme re tlaa dirang?”

₁₁A ba fetola a re: “Yo o nang le dikobo di le pedi, a a abele yo o se nang sepe; le yo o nang le dijo, a a dire jalo.”

₁₂Ga tla bakgethisi le bone go kolobediwa, ba mo raya ba re: “Moruti, rona re tlaa dirang?”

₁₃A ba raya a re: “Se kgethiseng ka thata go fetisa mo lo go laoletsweng.”

₁₄Le batlhabani le bone ba mmotsa ba re: “Mme rona re tlaa dirang?” A ba raya a re: “Se bogiseng ope, le gone se tseeleng ope sepe ka patiko, mme lo itumelele tuelo ya lona.”

₁₅Ya re ka batho ba le mo tebelelong, mme botlhe ba akanya mo dipelong tsa bone ka ga Johane, gore a jaana ga e ka ne e le ene Keresete; ₁₆Johane a fetola, a ba raya botlhe a re: “Nna le gale, ke lo kolobetsa ka metsi; mme go tla yo o thata bogolo go nna, yo kgole ya ditlhako tsa gagwe ke sa tshwanelang go e hunolola; ene o tlaa lo kolobetsa ka Mowa o o Boitshepo, le ka molelo; ₁₇yo loselo lwa gagwe o lo tshotseng ka seatla; mme o tlaa olosetsa ruri mo segotlong sa gagwe, a ba a phuthela mabele mo ntlong ya polokelo; o tlaa tshuba mmoko ka molelo o o sa timeng.”

₁₈A nna a rerela batho mafoko a a molemo ka dikgakololo di le dintsi di sele; ₁₉mme kgosana Herote ene, ka a omantswe ke ene ka ntlha ya ga Herodiase mosadi wa ga Filipo monnawe, le ka ntlha ya dilo tsotlhe tse di bosula tse Herote o di dirileng, ₂₀a fela a oketsa dilo tsotlhe tse ka go tswalela Johane mo ntlong ya kgolegelo.

₂₁Jaana e rile batho botlhe ba sena go kolobediwa, ya re Jesu le ene a kolobediwa, a rapela, legodimo la atlhamologa. ₂₂Mowa o o Boitshepo wa fologela mo go ene o na le popego e kete ya lephoi, mme ga tswa lentswe mo legodimong, le le reng: “O morwaake yo o rategang; ke itumetse thata mo go wena.”

₂₃Jesu ka esi o rile a simolola go ruta, a bo a le e ka ne e le dinyaga di le 30 mme, jaaka go ne go gopolwa, ya bo e le morwa Josefe, morwa Heli, ₂₄morwa Mathate, morwa Lefi, morwa Meleki, morwa Janai, morwa Josefe, ₂₅morwa Matathie, morwa Amose, morwa Nahume, morwa Eseli, morwa Nagai, ₂₆morwa Maathe, morwa Matathiase, morwa Semeine, morwa Joseke, morwa Jote, ₂₇morwa Joanane, morwa Rese, morwa Serubabele, morwa Shealetiele, morwa Neri, ₂₈morwa Meleki, morwa Adi, morwa Kosame, morwa Elematame, morwa Ere, ₂₉morwa Jesua, morwa Eliesere, morwa Jorime, morwa Mathate, morwa Lefi, ₃₀morwa Simeone, morwa Jutase, morwa Josefe, morwa Joname, morwa Eliakime, ₃₁morwa Melea, morwa Menne, morwa Matathe, morwa Nathane, morwa Dafite, ₃₂morwa Jese, morwa Obete, morwa Boase, morwa Salamone, morwa Našone, ₃₃morwa Aminatabe, morwa Arani, morwa Heserone, morwa Perese, morwa Juta, ₃₄morwa Jakobe, morwa Isake, morwa Aberahame, morwa Tera, morwa Nahore, ₃₅morwa Saruge, morwa Reu, morwa Pelege, morwa Ebere, morwa Shela, ₃₆morwa Kainane, morwa Arefekesate, morwa Sheme, morwa Noa, morwa Lameke, ₃₇morwa Methusela, morwa Enoke, morwa Jarete, morwa Mahalalele, morwa Kainane, ₃₈morwa Enose, morwa Sethe, morwa Atame, morwa Modimo.