Khutsafalo ka ga Jerusalema
1Ana motse o dutse
o ntse matlotla jang,
o o neng o ntse o tletse batho!
O fetogile mosadi wa motlholagadi
jang!
Ene yo o ne a le mogolo
mo merafeng,
e le morwadia kgosi
mo dikgaolong tsa lefatshe,
o tsile a nna montsha lekgetho
jang!
2O lela mo go botlhoko bosigo,
dikeledi tsa gagwe
di mo marameng a gagwe;
mo baratweng botlhe ba gagwe,
ga a na ope yo o mo gomotsang;
ditsala tsotlhe tsa gagwe
di mo diretse ka bolotsana,
di fetogile baba ba gagwe.
3Juta o ile botshwarong
ka ntlha ya patiko,
le ka ntlha ya botlhanka jo bogolo;
o agile mo merafeng,
ga a bone boikhutso.
Babogisi botlhe ba gagwe
ba mo tshwaretse mo teng
ga mogala wa gopo.
4Ditsela tsa Sione di a hutsafala,
ka go bo go sa tle ope phuthegong
e e laotsweng;
dikgoro tsotlhe tsa gagwe
di swafetse;
baperesiti ba gagwe ba a fegelwa;
makgarebane a gagwe a a patikwa,
le ene ka esi o mo bogalakeng.
5Baganetsi ba gagwe
ba fetogile ba nna tlhogo,
baba ba gagwe ba a segofala;
gonne Jehofa o mo patikile
ka ntlha ya bontsi
jwa ditlolo tsa gagwe.
Banyana ba bannye ba gagwe
ba ile botshwarong
fa pele ga moganetsi.
6Mo go morwadia Sione
bontle jotlhe jwa gagwe bo tlogile;
dikgosana tsa gagwe di fetogile
di ntse jaaka dikwalata
tse di sa boneng bofulo,
mme di tsamaile,
di koafetse fa pele ga mokonatedi.
7Mo metlheng ya patikego ya gagwe,
le mo manyobonyobong a gagwe,
Jerusalema o gakologelwa dilo
tsotlhe tsa gagwe tse di eletsegang
tsa metlha ya bogologolo;
e rile batho ba gagwe
ba wela mo seatleng sa mmaba,
mme go se na ope yo o mo thusang,
baganetsi ba mmona,
ba sotla ka ditshwafalo tsa gagwe.
8Jerusalema o leofile thata;
ke gone o fetogile
o ntse jaaka selo se se maswe;
botlhe ba ba kileng ba mo tlotla
ba a mo nyatsa,
ka ba bonye bosaikategang jwa gagwe.
Ee, o a fegelwa,
mme o retologile kwa morago.
9Bomaswe jwa gagwe
bo ne bo le mo ditswalong
tsa gagwe tse di kgokgothang;
ga a ka a gakologelwa
bokhutlo jwa gagwe;
ke gone o ileng kwa tlase
mo go gakgamatsang;
ga a na mogomotsi.
“Jehofa, bona patikego ya me;
gonne mmaba o ikgodisitse.”
10Moganetsi o atlareleditse
mo dilong tsotlhe tsa gagwe
tse di eletsegang diatla.
Gonne o bonye fa merafe
e tsenye mo felong ga gagwe
ga boitshepo,
ba o laotseng ka ga bone, wa re:
Ba se ka ba tsena mo phuthegong
ya gago.
11Batho botlhe ba gagwe
ba a fegelwa,
ba batla dijo;
ba ntshitse dilo tsa bone
tse di eletsegang
ba anantse ka tsone dijo
tsa go ikidibolola ka tsone.
“Jehofa, a ko o lebe, o bone;
gonne ke befile thata.”
12“A e a bo e se sepe mo go lona
lotlhe ba lo fetang ka tsela?
Lebang, lo bone
bo go na le bohutsana bongwe
jo bo tshwanang le bohutsana
jwa me, jo ke bo dirwang,
jo Jehofa o mpatikileng ka jone
mo motlheng wa bogale jwa gagwe
jo bo tukang.
13O tsentse molelo o o tswang
godimong mo marapong a me,
mme wa a fenya.
O aletse dinao tsa me lotloa,
o mpuseditse kwa morago;
o ntshwafaditse,
o nkidibaditse motshegare otlhe.
14“Jokwe ya ditlolo tsa me
e golegilwe ke seatla sa gagwe;
di logantswe,
di palame mo thamong ya me;
o tlhaedisitse thata ya me,
Morena o ntsentse mo diatleng
tsa batho ba ke se nang thata
ya go emalana nabo.
15Morena o nyaditse banna
ba ba diganka botlhe ba me
mo gare ga me;
o mpileditse phuthego e e masisi
go tla go pitla makau a me.
Morena o gatakile kgarebana
morwadia Juta jaaka e ka bo e le
mo kgatisetsong
ya bojalwa jwa mofine.
16“Ke lelela dilo tse;
leitlho la me,
leitlho la me le tshologa metsi;
ka go bo mogomotsi
yo o ne a tshwanetse
go rudisa mowa wa me
o kgakala le nna.
Bana ba me ba ntse lore fela,
gonne mmaba o fentse.”
17Sione o atlaretse diatla tsa gagwe;
ga go na ope yo o mo gomotsang;
Jehofa o laotse ka ga Jakobe,
gore ba ba mo tikologong ya gagwe
e nne baganetsi ba gagwe.
Jerusalema o ntse mo go bone
jaaka selo se se maswe.
18“Jehofa o tshiamo;
gonne ke tsuololetse taolo
ya gagwe.
Ke a lo rapela,
utlwang lona ditšhaba tsotlhe,
lo bone bohutsana jwa me.
Makgarebane a me, le makau a me
a ile botshwarong.
19Ka bitsa baratiwa ba me,
mme ba ntsieditse;
baperesiti ba me le bagolwane
ba me ba gonogela mo motseng,
ba sa ntse ba batla dijo
tsa go ikidibolola ka tsone.
20“Jehofa a ko o lebe,
gonne ke mo pitlaganong,
boteng jwa me bo huduegile;
pelo ya me e pitikologile
mo teng ga me;
gonne ke tsuolotse thata;
kwa ntle
tšhaka e thukhutha batho bana,
le mo gae go ntse jaaka loso fela.
21Ba utlwile fa ke fegelwa;
ga go na ope yo o ka nkgomotsang;
baba botlhe ba me
ba utlwetse pitlagano ya me;
ba itumela ka o go dirile.
O tlaa fitlhisa letsatsi
le o le boletseng,
mme ba tlaa tshwana le nna.
22“A boikepo jotlhe jwa bone
bo tle fa pele ga gago;
o ba direle jaaka o ntireletse
ditlolo tsotlhe tsa me.
Gonne diphegelo tsa me di dintsi,
le pelo ya me e idibetse.”
