JEREMIA 52

₁E rile Setekia a simolola go busa, a bo a le dinyaga di le 21 mme a busa ka dinyaga di le 11 mo Jerusalema, mme leina la ga mmaagwe e ne e le Hamutale morwadia Jeremia wa Libena. ₂Mme a dira se se bosula mo matlhong a ga Jehofa, ka fa go tsotlhe tse Jehoiakime o ne a di dirile. ₃Gonne ya re ka ntlha ya bogale jwa ga Jehofa, ga dirala mo Jerusalema le mo Juta, ga tsamaya a ba leleka fa pele ga gagwe; mme Setekia a tsuololela kgosi ya Babilone. ₄Ga dirala e rile ka ngwaga o o ferang mongwe fela wa puso ya gagwe, ka kgwedi ya lesome, ka letsatsi la lesome la kgwedi, Nebukatenesare kgosi ya Babilone a tla, ene le ntwa yotlhe ya gagwe, a tla go tlhasela Jerusalema, mme a o tlhaolelela a o dika; mme a aga dikago tsa tlhabanelo mo tikologong ya one. ₅Jalo motse wa nna wa tlhaselwa go ya ngwageng wa 11 wa kgosi Setekia. ₆Ya re ka kgwedi ya bone, ka letsatsi le le ferang mongwe fela, tlala ya bo e le botlhoko bobe mo motseng, batho ba lefatshe ba bo ba bile ba tlhoka dijo. ₇Foo ga ntshiwa phatlha mo motseng, mme batlhabani ba tshaba, ba tswa mo motseng bosigo, ka tsela ya kgoro e e fa gare ga dithako tse pedi, e e fa tshimong ya kgosi; (mme Bakalatea ba bo ba dikile motse); mme batshabi ba ya le tsela ya Araba. ₈Ntwa ya Bakalatea ya konatelela kgosi, mme ya tshwara Setekia mo dipaleng tsa Jeriko; mme ntwa ya gagwe yotlhe ya bo e mo phatlalaletse. ₉Foo a tsaya kgosi, ba e isa kwa kgosing ya Babilone kwa Ribela mo lefatsheng la Hamathe; mme ya atlhola ka ga gagwe. ₁₀Kgosi ya Babilone ya bolaya bomorwa Setekia fa pele ga matlho a gagwe; a ba a bolaela dikgosana tsotlhe tsa Juta mo Ribela. ₁₁A gonya Setekia matlho; mme kgosi ya Babilone ya mo golega ka mehiri, ya mo isa Babilone, mme ya mo tsenya mo ntlong ya kgolegelo go ya go fitlha kwa letsatsing la loso lwa gagwe.

₁₂Jaana e rile ka kgwedi ya botlhano, ka letsatsi la lesome la kgwedi, e le ngwaga wa 19 wa ga Nebukatenesare kgosi ya Babilone, Nebusaratane molaodi wa balebedi, yo o ne a tle a eme fa pele ga kgosi ya Babilone, a tla Jerusalema. ₁₃A fisa ntlo ya ga Jehofa, le ntlo ya kgosi; le matlo otlhe a Jerusalema, e bong ntlo nngwe le nngwe e kgolo a e fisa ka molelo. ₁₄Ntwa yotlhe ya Bakalatea, e e nang le molaodi wa balebedi, ya thuba dithako tsa Jerusalema mo tikologong. ₁₅Foo Nebusaratane molaodi wa balebedi a tlosa bahumanegi ba batho e le ditshwarwa, le masalela a batho a a tlogetsweng mo motseng, le ba ba ngwegileng, ba ngwegetse kwa kgosing ya Babilone, le masalela a bontsi jwa batho. ₁₆Nebusaratane molaodi wa balebedi a tlogela ba bahumanegi ba lefatshe, gore ba nne babaakanyi ba mafine le balemi.

₁₇Maotwana a kgotlho a a ne a le mo ntlong ya ga Jehofa, le ditlhomo, le lewatle la kgotlho, tse di ne di le mo ntlong ya ga Jehofa, Bakalatea ba di thubaganya, mme kgotlho yotlhe ya tsone ba e isa Babilone. ₁₈Le dipitsa, le diolela melora, le dipoma tsa dipone, le megotšana le dintshwana, le dijana tsotlhe tsa kgotlho tse ba ne ba direla ka tsone, ba tsamaya ka tsone. ₁₉Le dinwelo, le diolela molelo, le megotšana, le dipitsa, le ditlhomo tsa dipone, le dintshwana, le megopo; se e neng e le sa gouta, e le gouta, le se e neng e le sa selefera, e le selefera, molaodi wa balebedi a tsamaya ka tsone. ₂₀Maotwana a mabedi, lewatle le lengwe fela, le dipoo tse di 12 tsa kgotlho, tse di ne di tshegeditse ditlhomo, tse kgosi Solomone o kileng a di direla ntlo ya ga Jehofa; kgotlho ya dilwana tsotlhe tse e ne e sena selekanyo. ₂₁Ka ga maotwana, bogodimo jwa lekotwana lengwe e ne e le jwa dimetara di le 8; mme ya bo e dikolositswe thathelelo e e dimetara di le tlhano; mme bokweno jwa yone e ne e le dimilimeta ra di le 75; mme e ne e le logapa fela. ₂₂Go ne go le tlhogwana ya kgotlho mo godimo; mme bogodimo jwa tlhogwana e le nngwe fela bo ne bo le dimetara di ka nna pedi, le tiro ya selotloa, le digaranata mo tlhogwaneng tikologong, gotlhe fela e le kgotlho; lekotwana la bobedi le ne le na le dilo tse di ntseng jalo, le digaranata. ₂₃Go ne go na le digaranata di le 96 ka fa ditlhakoreng; digaranata tsotlhe di ne di le lekgolo mo tikologong ya tiro ya selotloa.

₂₄Mme molaodi wa balebedi a tsaya Seraia moperesiti yo mogolo, le Sefania moperesiti wa bobedi, le balebedi ba kgoro boo bararo. ₂₅Mo motseng a tsaya molaodisiwa mongwe yo o ne a laodisitswe batlhabani; le banna ba supa mo go ba ba neng ba tle ba bone sefatlhogo sa kgosi, ba ba fitlhetsweng mo motseng; le mokwaledi wa molaodi wa ntwa, yo o ne a tle a phuthe batho ba lefatshe; le banna ba 60 ba lefatshe, ba ba fitlhetsweng mo gare ga motse. ₂₆Nebusaratane molaodi wa balebedi a ba tsaya, a ba isa kwa kgosing ya Babilone kwa Ribela. ₂₇Kgosi ya Babilone ya ba kgemetha, ya ba bolaela mo Ribela mo lefatsheng la Hamathe. Jalo ba Juta ba tlosiwa mo lefatsheng la ga bone e le ditshwarwa fela. ₂₈Tšhaba e ke yone e Nebukatenesare o ne a e tlosa e le ditshwarwa; ka ngwaga wa bosupa Bajuta ba tlosiwa ba le 3 023. ₂₉Ka ngwaga wa 18 wa ga Nebukatenesare a isa batho ba le 832, ba tlosiwa mo Jerusalema. ₃₀Ka ngwaga wa 23 wa ga Nebukatenesare, Nebusaratane molaodi wa balebedi a isa botshwarong Bajuta ba le 745; ba le mmogo batho bao e ne e le 4 600.

₃₁Ga dirala ya re ka ngwaga wa 37 wa botshwaro jwa ga Jehoiakine kgosi ya Juta, ka kgwedi ya 12, ka tsatsi la 25, Efile-merotake kgosi ya Babilone, ka ngwaga wa ntlha wa puso ya gagwe a tsholetsa tlhogo ya ga Jehoiakine kgosi ya Juta, mme a mo ntsha mo ntlong ya kgolegelo. ₃₂A bua sentle nae, a baya setulo sa gagwe sa bogosi godimo ga ditulo tsa dikgosi tse di nang nae mo Babilone. ₃₃A mo apola diaparo tsa ntlo ya kgolegelo a mo apesa di sele, a ja dijo fa pele ga gagwe ka metlha yotlhe ya botshelo jwa gagwe. ₃₄Ka ga mojo wa gagwe, o ne a newa mojo ka metlha yotlhe ke kgosi ya Babilone, mojo ka tsatsi lengwe le lengwe go ya go fitlha mo letsatsing la loso lwa gagwe, ka metlha yotlhe ya botshelo jwa gagwe.