Loso le phitlho ya ga Sara
1Botshelo jwa ga Sara e ne e le dinyaga di le 127; e ne e le tsone dinyaga tsa botshelo jwa ga Sara. 2Sara a swela mo Kiriathe-areba, ke gore, Heberone, mo lefatsheng la Kanana. Aberahame a hutsafalela Sara le go mo lelela.
3Aberahame a tswa fa pele ga moswi wa gagwe, a bua le bana ba ga Hethe, a re: 4“Ke moeng le mojaki fela mo go lona. Nnayang felo ga phitlhelo mo go lona, e nne ga me, gore ke fitlhe moswi wa me, ke mo tlose mo matlhong a me.”
5Bana ba ga Hethe ba fetola Aberahame ba mo raya ba re: 6“Re utlwile morena wa me. O kgosana e kgolo thata mo go rona. Fitlha moswi wa gago mo go e e leng ntle ya diphupu tsa rona, fitlha moswi wa gago. Ga go na ope mo go rona yo o tlaa ganang ka phupu ya gagwe fa o e tsaya, gore o tle o fitlhe moswi wa gago.”
7Aberahame a ema a ikobela beng ba lefatshe, e bong bana ba ga Hethe. 8A bua nabo a re: “Fa e le go rata ga lona gore ke fitlhe moswi wa me, ke mo tlose mo matlhong a me, lo nkutlwe, lo nthapelele mo go Eferone, morwa Sohare, 9gore a nneye logaga lwa Makapela, lo o nang nalo, lo lo fa sekhutlong sa sebata sa naga ya gagwe. A lo nneye ka tlhwatlhwa e e tshwanetseng, a dire mo ga lona, gore e nne felo ga me ga phitlhelo.”
10Eferone a bo a dutse mo gare ga bana ba ga Hethe. Eferone wa Mohite a fetola Aberahame mo kutlong ya bana ba ga Hethe, e bong botlhe ba ba tsenang ka kgoro ya motse wa gagwe, 11a re: “Nyaa, morena wa me, o nkutlwe. Sebata sa naga ke a se go naya, le logaga lo lo mo go sone ke a lo go naya, fa pele ga bomorwa batho ba gaetsho ke a go go naya. Fitlha moswi wa gago.”
12Aberahame a ikoba fa pele ga batho ba lefatshe. 13A bua le Eforone mo kutlong ya batho ba lefatshe a re: “Fa o rata, ke a go rapela, o nkutlwe. Ke tlaa go naya tlhwatlhwa ya sebata sa naga; e tseye mo go nna, mme ke tlaa fitlha moswi wa me gone.”
14Eferone a fetola Aberahame a mo raya a re: 15“Morena wa me, a ko o nkutlwe; kana sebata sa lefatshe se se lekanyweng ke dipapetla tsa selefera di le 400, e bo e le eng fa gare ga me nao? Ka re, fitlha moswi wa gago fela.” 16Aberahame a utlwa Eferone; Aberahame a lekanyetsa Eferone selefera e o e badileng mo kutlong ya bana ba ga Hethe, dipapetla di le 400 tsa selefera, e le madi a a neng a tle a dumalanwe ke barekisi.
17Jalo sebata sa naga ya ga Eferone se se mo Makapela, se se potileng Mamere ka kwano, go le sebata sa naga, le logaga lo lo mo go sone, le ditlhare tsotlhe tse di mo sebateng seo sa naga, le tse di mo molelwaneng tikologong ya sone, tsa tlhomamisediwa. 18Aberahame go nna boswa fa pele ga bana ba ga Hethe, fa pele ga botlhe ba ba tsenang ka kgoro ya motse wa gagwe.
19Morago ga mo, Aberahame a fitlha Sara mosadi wa gagwe mo logageng lwa sebata sa naga ya Makapela, ka kwano ga Mamere, ke go re, Heberone, mo lefatsheng la Kanana. 20Sebata sa naga, le logaga lo lo mo go sone ga tlhomamisediwa Aberahame ke bana ba ga Hethe go nna felo ga phitlhelo.
