GENESISE 22

₁Ga dirala ya re morago ga dilo tse, Modimo wa leka Aberahame, wa mo raya wa re: “Aberahame!”

A araba a re: “Ke fano.”

₂Wa re: “Tsaya morwao jaana, morwao yo o esi, yo o mo ratang, e bong Isake, o ye kwa lefatsheng la Moria, o mo dire tshupelo ya phiso gone, mo thabeng nngwe e ke tlaa e go bolelelang.”

₃Aberahame a phakela ka moso, a belesa esela ya gagwe, a ba a tsaya makau a gagwe a le mabedi, le Isake morwawe; a fatsetsa tshupelo ya phiso dikgong, a nanoga a ya felong kwa Modimo o go mmoleletseng. ₄Ya re ka letsatsi la boraro Aberahame a tsholetsa matlho a gagwe, a bona felo foo kwa kgakala. ₅Aberahame a raya makau a gagwe a re: “Salang fa le esela. Nna le mosimane re tlaa ya fale; re tlaa obama, re ba re boela kwano go lona.”

₆Aberahame a tsaya dikgong tsa tshupelo ya phiso, a di baya mo go Isake morwawe; a tsaya molelo ka seatla sa gagwe, le thipa; ba tsamaya mmogo boo babedi. ₇Isake a bua le Aberahame rraagwe a re: “Rra!”

A re: “Ke fano, morwaaka.”

A re: “Bona, molelo ke o, le dikgong; mme kwanyana ya tshupelo ya phiso e kae?”

₈Aberahame a re: “Morwaaka, Modimo o tlaa ipatlela kwanyana ya tshupelo ya phiso.” Jalo ba tsamaya mmogo boo babedi.

₉Ba tla ba fitlha felong kwa Modimo o go mmoleletseng. Aberahame a aga sebeso gone, a rulaganya dikgong, a golega Isake morwawe, a mmaya mo sebesong mo godimo ga dikgong. ₁₀Aberahame a ntsha letsogo a tsaya thipa, a re o bolaya morwawe, ₁₁mme moengele wa ga Jehofa a mmitsa a le kwa legodimong a re: “Aberahame, Aberahame!”

A re: “Ke fano.”

₁₂A re: “O se ka wa baya mosimane seatla sa gago, le gone o se ka wa mo dira sepe; ka jaanong ke a itse fa o boifa Modimo, ka e le fa o se ka wa gana ka morwao yo o esi, fa ke mo tsaya.”

₁₃Aberahame a tsholetsa matlho a gagwe a leba, a bona, fa morago ga gagwe ga bo go le phelefu, e tshwerwe ka dinaka mo sekgweng. Aberahame a ya a tsaya phelefu, a e isa tshupelo ya phiso mo boemong jwa ga morwawe. ₁₄Aberahame a raya felo foo leina a re, Monei; jaaka go tle go buiwe le gompieno go twe, “Mo thabeng ya ga Jehofa-o-a-naya”.

₁₅Moengele wa ga Jehofa a bitsa Aberahame lwa bobedi a le kwa legodimong a re: ₁₆“Ke ikanne ka nna ka nosi, go bua Jehofa, ka o dirile selo se, wa se ka wa gana ka morwao yo o esi, ₁₇ke tlaa go segofatsa, ke ntsifatsa losika lwa gago jaaka dinaledi tsa legodimo, le jaaka mošawa o o mo dintshing tsa lewatle. Losika lwa gago lo tlaa rua kgoro ya metse ya baba ba lona. ₁₈Merafe yotlhe ya lefatshe e tlaa segofala mo losikeng lwa gago, ka o utlwile lentswe la me.” ₁₉Jalo Aberahame a boela kwa makaung a gagwe, ba nanoga ba tsamaya mmogo ba ya Beerešeba. Mme Aberahame a aga mo Beerešeba.

₂₀Ya re morago ga dilo tse Aberahame a bolelelwa ga twe: “Bonang, Mileka le ene o bonye bana le Nahore, monnao. ₂₁Use, wa ntlha wa gagwe, le Buse monnawe, le Kemuele rra Arame, ₂₂le Kesete, le Haso, le Piletaše, le Jitelafe, le Bethuele.” ₂₃Bethuele a tshola Rebeka. Ba ba ferang mebedi ba, Mileka a ba bona le Nahore, monnaa Aberahame. ₂₄Mogadingwana wa gagwe, yo leina la gagwe go tweng Reuma, le ene a bona Teba, le Gahame, le Tahaše, le Maaka.