DANIELE 4

₁“Ke le kgosi Nebukatenesare, ke kwalela ditšhaba tsotlhe, le merafe yotlhe, le ba dipuo tsotlhe, ba ba agileng mo lefatsheng lotlhe, ka re: A kagiso e lo totafalele. ₂Go nkgatlhile go bolela ditshupo le dikgakgamatso tse Modimo wa Mogodimodimo o di ntiretseng.

₄“Nna ke le Nebukatenesare, ke ne ke le mo boiketlong fela mo ntlong ya me, ke galalela fela mo ntlong ya me ya bogosi. ₅Ka bona toro e e mpoifisitseng; dikgopolo tsa me, ke le mo bolaong jwa me, le diponatshegelo tsa tlhogo ya me tsa nkhidia. ₆Ke gone ka moo ka laola, gore banna botlhe ba ba botlhale ba Babilone ba leriwe fa pele ga me, gore, ba nkitsise phuthololo ya toro. ₇Foo ga tla baitseanape, le dingaka le Bakalatea le baswabi ba ditiro; mme ka bolela toro fa pele ga bone; mme ba se ka ba nkitsise phuthololo ya yone. ₈Kwa morago Daniele a tla fa pele ga me, ene yo leina la gagwe go tweng Beletešasare, ka fa leineng la modimo wa me, e le motho yo mowa wa medimo e e itshepileng o mo go ene, mme ka bolela toro fa pele ga gagwe, ka re: ₉Wena Beletešasare, mogolo wa baitseanape, e re ka ke itse fa mowa wa medimo e e itshepileng o le mo go wena, mme go se na bosaitsiweng bope jo bo go palelang, mpolelela diponatshegelo tsa toro ya me e ke e bonyeng le phuthololo ya tsone.

₁₀“Diponatshegelo tsa tlhogo ya me mo bolaong jwa me tsa nna jaana: Ka leba, mme bonang, ga bo go le setlhare mo gare ga lefatshe, mme go gola ga sone go le gogolo. ₁₁Setlhare seo sa gola, sa nna thata, mme go gola ga sone ga fitlha kwa legodimong, le go bonala ga sone ga fitlha kwa bokhutlong jwa lefatshe lotlhe fela. ₁₂Makakaba a sone a ne a le mantle, le loungo lwa sone lo le logolo, mme go le dijo tsa botlhe mo go sone: Diphologolo tsa naga tsa kwaya mo go sone, le dinonyane tsa loapi tsa aga mo dikaleng tsa sone, le batho botlhe ba otlwa ke sone.

₁₃“Ka leba mo diponatshegelong tsa tlhogo ya me mo bolaong jwa me, mme bonang, molebedi mongwe yo o leng moitshepi a fologa mo legodimong. ₁₄A kua thata, a bua, a re: ‘Remang setlhare se, lo kgaole dikala tsa sone, lo tlhotlhore makakaba a sone, lo gasagase loungo lwa sone; a diphologolo tsa naga di tloge fa tlase ga sone, le dinonyane tsa loapi mo dikaleng tsa sone. ₁₅Le fa go ntse jalo lo tlogele sesipi se na le metswe ya sone mo mmung, se bofilwe, ka mofiri wa tshipi le kgotlho, mo bojangnyeng jo botalana jwa naga; a se kolobediwe ke monyo wa legodimo, mme a kabelo ya gagwe e nne le diphologolo mo bojangnyeng jwa lefatshe. ₁₆A pelo ya gagwe e fetoge e se tlhole e le ya motho, mme a newe pelo ya sephologolo fela; a fetwe ke metlha e supa.

₁₇“ ‘Katlholo eo, e ka taolo ya balebedi, le topo eo e ka lefoko la baitshepi; e le gore batshedi ba tle ba itse fa Mogodimodimo a busa mo bogosing jwa batho, mme o tlaa a bo neye mongwe fela, yo o mo ratang a bo tlhomele motho yo o nyatsegang fela.’

₁₈“Nna kgosi Nebukatenesare ke bonye toro e, mme wena Beletešasare, bolela phuthololo, gonne banna ba ba botlhale botlhe ba bogosi jwa me ba reteletswe ke go nkitsise phuthololo; mme wena o nonofile, gonne mowa wa medimo e e itshepileng o mo go wena.”

₁₉Foo Daniele, yo leina la gagwe go tweng Beletešasare, a gakgamala ka lobaka, le megopolo ya gagwe ya mo hudua mo teng. Kgosi ya bua ya re: “Beletešasare, a toro, le fa e le phuthololo e se go hudue.”

Beletešasare a fetola, a re: “Morena wa me, a toro e nne ka ga ba ba go ilang, le phuthololo ya yone e nne ka ga baba ba gago. ₂₀Setlhare se o se bonyeng, se se neng sa gola, sa nna thata, se go gola ga sone ga fitlha kwa legodimong, le go bonala ga sone ga fitlha kwa lefatsheng lotlhe; ₂₁se makakaba a sone a ne a le mantle, le loungo lwa sone lo le logolo, se dijo tsa botlhe di ne di le mo go sone; se diphologolo tsa naga di ne di agile tlase ga sone, le se dinonyane tsa loapi di ne di dirile boago jwa tsone mo dikaleng tsa sone:

₂₂“Ke wena kgosi, o godile, o thatafetse; gonne bogolo jwa gago bo godile, bo fitlha kwa legodimong, le puso ya gago kwa bokhutlong jwa lefatshe. ₂₃E re ka kgosi e bonye molebedi mongwe a bile a le moitshepi a fologa mo legodimong, a re: ‘Remang setlhare, lo se senye; le fa go ntse jalo lo tlogele sesipi sa metswe ya sone mo mmung se bofilwe ka mofiri wa tshipi le kgotlho, mo bojangnyeng jo botalana jwa naga; mme a se kolobediwe ke monyo wa legodimo, mme a kabelo ya gagwe e nne le diphologolo tsa naga, go tsamaya a fetwa ke metlha e supa.’

₂₄“Phuthololo ke e, kgosi: Ke taolo ya Mogodimodimo e e tsileng mo kgosing, morena wa me; ₂₅ya go re: O tlaa lelekwa mo bathong, mme boago jwa gago bo tla nna le diphologolo tsa naga, o tlaa fudisiwa bojang jaaka dikgomo, o tlaa kolobediwa ke monyo wa legodimo, mme o tlaa fetwa ke metlha e supa; go tsamaya o itse fa Mogodimodimo a busa mo bogosing jwa batho, mme o tle a bo neye mongwe fela yo o mo ratang. ₂₆E re ka ba laotse gore go lesiwe metswe ya sesipi sa setlhare; bogosi jwa gago bo tlaa tlhomama mo go wena, o sena go itse fa magodimo a a busa. ₂₇Ke gone kgosi, a kgakololo ya me e amogelesege mo go wena, mme o khutlise maleo a gago ka tshiamo, le maikepo a gago ka go iponatsa boutlwelobotlhoko mo bahumaneging; fa ekare kgotsa go ka nna go lelefatsa kagiso ya gago.”

₂₈Tsotlhe tse tsa tla mo kgosing Nebukatenesare. ₂₉E rile kwa bofelong jwa dikgwedi di le 12 a bo a tsamayatsamaya mo ntlong ya gagwe ya segosi mo Babilone. ₃₀Kgosi ya bua, ya re: “A ga se one Babilone o mogolo, o ke o agileng gore o nne boago jwa segosi, ka bonatla jwa thata ya me, le ka ntlha ya kgalalelo ya borena jwa me?”

₃₁E rile lefoko le sa ntse le le mo molomong wa kgosi, ga fologa lentswe kwa legodimong, la re: “Kgosi Nebukatenesare, ke wena yo o rewang: Bogosi bo tlogile mo go wena. ₃₂O tlaa lelekwa mo bathong, le boago jwa gago bo tlaa nna le diphologolo tsa naga; o tlaa fudisiwa bojang jaaka dikgomo, mme o tlaa fetwa ke metlha e supa; go tsamaya o itse fa Mogodimodimo a busa mo bogosing jwa batho, mme o tle a bo neye mongwe fela yo o mo ratang.”

₃₃Selo seo sa dirafalela Nebukatenesare fela ka nako eo: A lelekwa mo bathong, a hula bojang jaaka dikgomo, mmele wa gagwe wa kolobediwa ke monyo wa legodimo, moriri wa gagwe wa ba wa tla wa gola wa nna jaaka diphuka tsa ntswi yo motona, le dinala tsa gagwe jaaka menoto ya dinonyane.

₃₄E rile metlha eo e sena go feta, nna Nebukatenesare ka tsholeletsa matlho a me legodimong, mme tlhaloganyo ya me ya boela mo go nna, ka baka Mogodimodimo, ka boka ka ba ka tlotla yo o tshelang ka bosakhutleng;

₃₆“Tlhaloganyo ya me ya boela mo go nna ka baka loo; le borena jwa me jwa boela mo go nna le phatsimo ya me, ka ga kgalalelo ya bogosi jwa me; le bagakolodi ba me le bagolwane ba me ba mpatla; mme ka tlhomama mo bogosing jwa me, ka ba ka okelediwa bogolo jo bo feteletseng.

₃₇“Jaana nna Nebukatenesare ka baka Kgosi ya legodimo, ke ba ke e godisa ke e tlotla; gonne ditiro tsotlhe tsa yone di boammaaruri, mme le ditsela tsa yone di tekatekanyo; ba ba sepelang mo pelafalong o nonofile go ba isa tlase.”