DANIELE 3

₁Nebukatenesare kgosi a dira setshwantsho sa gouta, se le bogodimo jwa mabogo a le 60, le boatlhamo jwa mabogo a le marataro: a se tlhoma mo lobaleng lwa Dura, mo kgaolong ya Babilone. ₂Foo Nebukatenesare kgosi a roma a ya go phutha dikgosana, le balaodisiwa, le balaodi, le baatlhodi le baboloki ba mahumo, le bagakolodi, le ditlhogo tsa maotlana, le balaodi botlhe ba dikgaolo tsa lefatshe, gore ba tle go kgakola setshwantsho se Nebukatenesare kgosi o se tlhomileng. ₃Foo dikgosana, le balaodisiwa, le balaodi, le baatlhodi, le baboloki ba mahumo, le bagakolodi, le ditlhogo tsa maotlana, le balaodi botlhe ba dikgaolo tsa lefatshe, ba phuthegela kgakolo ya setshwantsho se Nebukatenesare kgosi o se tlhomileng; mme ba ema fa pele ga setshwantsho se Nebukatenesare kgosi o se tlhomileng. ₄Foo mokui a kuela godimo, a re: “Lona ditšhaba, le merafe, le ba dipuo lo a laolwa, ga twe: ₅Mogang lo utlwang tumo ya dinaka, le ditlhaka, le diharepe, le diphare, le dikwadi, le meropana, le diletso tsotlhe, lo wele fa fatshe, lo obamele setshwantsho sa gouta se Nebukatenesare kgosi o se tlhomileng. ₆Le fa e le mang yo o sa weleng fa fatshe a se obamela, fela ka lobaka loo a latlhelwe mo gare ga bokepiso jo bo molelo, jo bo tukang.” ₇Ke gone ka lobaka loo, e rile ditšhaba tsotlhe di utlwa tumo ya dinaka, le ditlhaka, le diharepe le diphare, le meropa, le diletso tsotlhe, batho botlhe ba ditšhaba, le ba merafe, le ba dipuo, ba wela fa fatshe ba obamela setshwantsho sa gouta se Nebukatenesare kgosi o ne a se tlhomile.

₈Ke gone, ya re ka lobaka loo Bakalatea bangwe ba atamela, ba naya Bajuta molato. ₉Ba bua ba raya Nebukatenesare kgosi, ba re: “A kgosi a tshele ka bosakhutleng. ₁₀Kgosi, o tlhomile molao wa go re mongwe le mongwe yo o utlwang tumo ya dinaka, le ditlhaka, le diharepe, le diphare, le dikwadi, le meropana, le diletso tsotlhe, a wele fa fatshe a obamele setshwantsho sa gouta. ₁₁Le fa e le mang yo o sa weleng fa fatshe a se obamela, a latlhelwe mo gare ga bokepiso jo bo molelo, jo bo tukang. ₁₂Go na le Bajuta bangwe ba o ba laodisiteng ditiro tsa kgaolo ya Babilone e bong Shaterake, le Mešake, le Abetenego; banna bao, kgosi, ga ba a go tlhokomela; ga ba a direla medimo ya gago, le fa e le go obamela setshwantsho sa gouta se o se tlhomileng.”

₁₃Foo Nebukatenesare a laola ka tšhakgalo le tšararego gore Shaterake, le Mešeke, le Abetenego ba leriwe kwa go ene. Foo ba lere batho bao fa pele ga kgosi. ₁₄Nebukatenesare a bua, a ba raya, a re: “Lona, Shaterake, le Mešeke, le Abetenego, a lo dira ka bomo, fa e bo ne ne lo sa direle modimo wa me jaana, lo sa obamele setshwantsho se ke se tlhomileng? ₁₅Jaana fa e tlaa re lo utlwa tumo ya dinaka, le ditlhaka, le diharepe, le diphare, le dikwadi, le meropana le diletso tsotlhe, lo bo lo iketleeditse go wela fa fatshe lo obamela setshwantsho se ke se dirileng, go molemo; mme fa lo sa se obamele, lo tlaa latlhelwa ka lobaka loo fela mo gare ga bokepiso jo bo molelo, jo bo tukang; mme modimo e be e le ofe o o tlaa lo gololang mo diatleng tsa me?”

₁₆Shaterake, le Mešeke, le Abetenego ba fetola kgosi, ba re: “Nebukatenesare, ga re na tshwanelo ya go go fetola mo selong se. ₁₇Fa go ka nna jalo, Modimo wa rona o re o direlang, o nonofile go re golola mo bokepisong jo bo molelo, jo bo tukang; mme o tlaa re golola mo seatleng sa gago, kgosi. ₁₈Fa go sa nna jalo, o tle o itse kgosi, fa re gana go direla medimo ya gago, le go obamela setshwantsho sa gouta se o se tlhomileng.”

₁₉Foo Nebukatenesare a tlala tšararego, mme tebego ya sefatlhogo sa gagwe ya bo e fetogetse Shaterake, le Mešeke, le Abetenego; ke gone ka moo a bua, a laola gore ba gotedise bokepiso ga supa bogolo go tlwaelo ya jone go gotedisiwa ga gale. ₂₀A laola banna bangwe ba diganka ba mephato ya gagwe, gore ba bofe Shaterake, le Mešeke, le Abetenego, le go ba latlhela mo bokepisong jo bo molelo jo bo tukang. ₂₁Foo banna bao ba bofelwa mo marukgweng a bone, le mo ditlhorong tsa bone, le mo dikobong tsa bone, le mo diaparong tse dingwe tsa bone, mme ba latlhelwa mo gare ga bokepiso jo bo molelo, jo bo tukang. ₂₂Ke gone ya re ka taolo ya kgosi e ne e ba potlakisa, le bokepiso bo ne bo le molelo thata, kgabo ya molelo ya bolaya banna bao ba ba tshotseng Shaterake, le Mešeke, le Abetenego. ₂₃Banna ba bararo bao, Shaterake le Mešeke, le Abetenego, ba wela mo bokepisong jo bo molelo jo bo tukang ba bofilwe.

₂₄Foo Nebukatenesare kgosi a gakgamadiwa, mme a nanoga ka potlako, a bua, a raya bagakolodi ba gagwe, a re: “A ga re a latlhela batho ba le bararo mo gare ga molelo, ba bofilwe?” Ba fetola kgosi, ba re: “Go ntse jalo, kgosi.”

₂₅A fetola, a re: “Bonang, ke bona banna ba le bane ba ba sa bofiwang, ba tsamaya fela mo teng ga molelo, mme ga ba a utlwa botlhoko bope; ponalo ya wa bone e ntse jaaka ya mongwe morwa medimo.”

₂₆Foo Nebukatenesare a atamela mojako wa bokepiso jo bo molelo, jo bo tukang; a bua, a re: “Shaterake, le Mešeke, le Abetenego, lona batlhanka ba Modimo wa Mogodimodimo, tswang lo tle kwano.” Foo Shaterake, le Mešeke, le Abetenego ba tswa mo gare ga molelo. ₂₇Dikgosana, le balaodisiwa, le balaodi, le bagakolodi ba kgosi, ka ba ne ba phuthegile, ba bona banna bao, go re, molelo o ne o se na thata epe mo mebeleng ya bone, le go re moriri wa ditlhogo tsa bone o ne o sa baboga, le go re, marukgwe a bone a ne a sa fetoga, le go re go ne go se na monkgo wa molelo mo go bone.

₂₈Nebukatenesare a bua, a re: “A go bakweng Modimo wa ga Shaterake, le Mešeke, le Abetenego, o o romileng moengele wa one, mme wa golola batlhanka ba one ba ba ikantseng mo go one, mme ba fetotse lefoko la kgosi, ba ineetse ka mebele ya bone gore ba se direle modimo ope, le fa e le go o obamela, fa e se Modimo o e leng wa bone fela.

₂₉“Ke gone ke dira molao wa go re, ba sešaba sengwe le sengwe, le ba morafe monwe le mongwe, le ba puo nngwe le nngwe, ba ba ka buang sengwe se se sokameng ka ga Modimo wa ga Shaterake, le Mešeke, le Abetenego, ba remaganngwe, le matlo a bone a dirwe dithotobolo, ka gonne ga go na modimo ope o sele o o nonofileng go golola ka fa mokgweng o o ntseng jaana.” ₃₀Foo kgosi ya baya Shaterake, le Mešeke, le Abetenego kwa pele mo kgaolong ya Babilone.