DITIRO 5

₁Mme monna mongwe, go twe Ananiase, a na le Safira mosadi wa gagwe, a rekisa boswa bongwe. ₂Mme a sadisa madi bontlhanngwe, mosadi le ene a itse jalo; mme a tlisa bontlhanngwe a bo baya fa dinaong tsa baaposetole. ₃Mme Petere a re: “Ananiase, ana Satane o tlaleditseng pelo ya gago gore o aketse Mowa o o Boitshepo, le go sadisa bontlhanngwe jwa madi a tshimo? ₄A e rile e sa ntse e le teng, a e ne e ntse e se ya gago? Le e sena go rekisiwa, a e ne e ntse e se mo thateng ya gago? Go ntse jang ka o gakologetswe selo se mo pelong ya gago? Ga o a aketsa batho, o akeditse Modimo.” ₅Ananiase ya re a utlwa mafoko a, a wela fa fatshe, a swa; mme poifo e kgolo ya tlela botlhe ba ba utlwileng. ₆Makau a tloga a mo phutha, a mo rwalela kwa ntle, a mo fitlha.

₇E ka ne e le lobaka lwa dinako di le tharo morago ga moo, mosadi wa gagwe a tsena, a sa itse se se dirafetseng. ₈Petere a mmotsa a re: “Mpolelela fa tshimo lo e rekisitse ka go le kalo.” Mme a re: “Ee, ka go le kalo.”

₉Petere a mo raya a re: “Go ntse jang ka lo dumalanye mmogo go leka Mowa wa Morena? Bona dinao tsa ba ba fitlhileng monna wa gago di fa mojako, mme ba tlaa go rwalela kwa ntle.” ₁₀Ka bonako fela a wela fa dinaong tsa gagwe, a swa; mme makau a tsena, a mo fitlhela a sule, a mo rwalela kwa ntle, a mo fitlha fa monneng wa gagwe. ₁₁Mme poifo e kgolo ya tlela phuthego yotlhe, le botlhe ba ba utlwileng dilo tse.

₁₂Ditshupo le dikgakgamatso di le dintsi tsa dirwa mo bathong ka diatla tsa baaposetole; mme ba nna mmogo botlhe mo mathuding a ga Solomone ka bongwefela jwa pelo. ₁₃Mme mo go ba bangwe ga bo go se motho ope yo o lekang go ikopanya nabo; le fa go ntse jalo batho bone ba ba tlotla; ₁₄badumedi ba oketsegela Morena bogolo, bontsi jwa banna le basadi. ₁₅Ba ba ba tla ba ntshetsa balwetse mo mebileng, ba ba baya mo malaong le mo masekamelong, e tle e re Petere a feta, le fa e ka bo e le moriti wa gagwe, o tshutifalele mongwe wa bone. ₁₆Le gone ga phuthega bontsi jo bo tswang mo metseng e e mo tikologong ya Jerusalema, ba tlisa balwetsi le ba ba tshwenngwang ke mewa e e maswe; mme ba fodisiwa botlhe.

₁₇Moperesiti yo mogolo a ema le botlhe ba o nang nabo, ba e leng lekoko la Basadukai, mme ba tlala lefufa, ₁₈ba tsenya baaposetole diatla, ba ba tsenya mo ntlong ya kgolegelo ya motse. ₁₉Mme moengele mongwe wa Morena a bula ntlo ya kgolegelo bosigo, a ba ntshetsa kwa ntle, a re: ₂₀“Tsamayang, lo ye go ema lo bue le batho mo tempeleng mafoko otlhe a Botshelo jo.” ₂₁Ya re ba utlwa, ba tsena mo tempeleng bosigo boo sa, mme ba ruta. Moperesiti yo mogolo a tla le ba o nang nabo, ba phutha ba lekgotla le ditlhogo tsa bana ba Iseraele, mme ba roma kwa ntlong ya kgolegelo gore ba ye go tlisiwa. ₂₂Mme maotlana a a ileng a se ka a ba fitlhela mo ntlong ya kgolegelo; a boa, a bolela a re: ₂₃“Re fitlhetse ntlo ya kgolegelo e tswetswe ka tlhomamo yotlhe, le badisa ba eme fa mejakong; mme e rile re sena go bula, ra se ka ra fitlhela motho ope mo teng.” ₂₄Jaana ya re molaodi wa tempele le ditlhogo tsa baperesiti ba utlwa mafoko a, ba akabala thata ka ga bone gore selo se se tlaa felela kae. ₂₅Ga tla mongwe a ba bolelela a re: “Bonang, banna ba lo ba tsentseng mo ntlong ya kgolegelo, ba eme mo tempeleng ba ruta batho.” ₂₆Foo molaodi a tsamaya le maotlana, ba ba tlisa, e seng ka kgolo; gonne ba boifa batho, e se re kgotsa ba kgobotlediwa.

₂₇E rile ba sena go ba tlisa, ba ba baya fa pele ga lekgotla. Moperesiti yo mogolo a ba botsa a re: ₂₈“Re lo laile thata re re: Lo se ka lwa ruta mo ineng le; bonang, lo tladitse Jerusalema ka thuto ya lona, lo ikaeletse go baya molato wa madi a motho yo mo go rona.”

₂₉Petere le baaposetole ba fetola ba re: “Re na le go utlwa Modimo bogolo go batho. ₃₀Modimo wa borraetsho o tsositse Jesu, yo lona lo mmolaileng, ka go mo pega mo setlhareng. ₃₁Ene yoo, Modimo o mo goleditse ka seatla sa one se segolo, gore a nne Kgosana le Mmoloki, gore a neye Iseraele boikwatlhao le boitshwarelo jwa dibe. ₃₂Rona re basupi ba dilo tse; le one Mowa o o Boitshepo o ntse jalo, o Modimo o o neileng bone ba ba o utlwang.”

₃₃Mme bone, ya re ba utlwa jalo, ba segega mo pelong, mme ba rata go ba bolaya. ₃₄Mme ga ema Mofarisai mongwe mo lekgotleng, go twe, Gamaliele, moruti wa molao, e le motho yo o tlotlwang ke batho botlhe, mme a laola gore baaposetole ba name ba ntsheditswe kwa ntle. ₃₅A sala a ba raya a re: “Lona banna ba Iseraele, lo itise ka ga batho ba, mo go se lo reng lo tloga lo se dira. ₃₆Gonne e rile motlha mongwe ga tsoga Theutase, a ikgantsha, a re ke motho mongwe; mme, batho bangwe e ka ne e le ba ba 400, ba ikopanya nae; mme a bolawa; le botlhe ba ba ineetseng mo go ene ba phatlaladiwa, ba nyelela. ₃₇Morago ga motho yo, ga tsoga Jutase wa Galilea mo motlheng wa go kwalwa maina, a itatedisa batho bangwe; le ene a swa; le batho ba ba ineetseng mo go ene ba falalediwa koo. ₃₈Jaana, ke a lo raya ka re: Lo ithibe mo bathong ba, lo ba lese; gonne fa kgakologelo e, kgotsa tiro e, e le ya batho, e tlaa senyega; ₃₉mme fa e le ya Modimo, go tlaa lo retelela go ba fenya; e ka tla ya re kgotsa lwa fitlhelwa lo bile lo tlhabana le Modimo.” ₄₀Ba dumalana nae; ya re ba sena go bitsa baaposetole, ba ba betsa, ba ba laya gore ba se ka ba bua mo ineng la ga Jesu, ba ba lesa ba tsamaya. ₄₁Foo ba tswa fa pele ga lekgotla, ba itumela ka ba kailwe tshwanelo ya go tlotlololwa ka ntlha ya Leina. ₄₂Ka malatsi otlhe, mo tempeleng le mo magabone, ba se ka ba bakela go ruta le go rera Jesu, fa e le Keresete.