DITIRO 4

₁Ya re ba sa ntse ba bua le batho, baperesiti le molaodi wa tempele le Basadukai ba ba kgomogela, ₂ba betilwe ke pelo, ka gobo ba ruta batho, ba bolela go tsoga ga baswi ka Jesu. ₃Ba ba tsenya diatla, ba ba latsa mo kgolegong; gonne go ne go setse go le maitseboa. ₄Mme ba bantsi ba bone ba ba utlwileng lefoko ba dumela; palo ya banna ya tloga ya nna e ka ne e le 5 000.

₅Ga dirala ya re ka moso, balaodi ba bone le bagolwane, le bakwadi ba phuthega mo Jerusalema; ₆le Anase moperesiti yo mogolo a le teng, le Kaiafase, le Johane le Alekesantere, le botlhe ba losika lwa moperesiti yo mogolo. ₇Ya re ba sena go ba emisa fa gare, ba ba botsa ba re: “Golo mo, lo go dirile ka thata efe, kgotsa ka leina lefe?”

₈Petere ka a tletse Mowa o o Boitshepo, a ba raya a re: “Lona balaodi ba batho, le bagolwane, ₉fa re bodiwa gompieno ka ga tiro e e molemo e e diretsweng monnani, ke go re, monna yo, o fodisitswe ka mokgwa o o ntseng jang; ₁₀a go itsiwe ke lona lotlhe le batho botlhe ba Iseraele, fa e le ka leina la ga Jesu Keresete wa Nasaretha, yo lo mmapotseng, yo Modimo o mo tsositseng mo losong; ka re, monna yo, o eme fa, fa pele ga lona a fodile, e le ka ene. ₁₁Ke ene lentswe le le nyaditsweng ke lona baagi, le le bileng le dirilwe la tlhogo ya kgokgotsho. ₁₂Ga go na poloka mo go ope o sele; le gone ga go na leina lepe le sele fa tlase ga legodimo, le batho ba le neilweng, le re nang le go bolokwa mo go lone.”

₁₃Jaana ya re ba bona bopelokgale jwa ga Petere le Johane, mme ba lemogile fa ba sa rutega, e le batho fela, ba gakgamala; ba ba lemoga fa ba kile ba ne ba nna le Jesu. ₁₄Mme e re ka ba bona motho yo o fodisitsweng a eme nabo, ba tlhoka se ba ka se buang ka ga gone. ₁₅Ya re ba sena go ba laola gore ba tswele kwa thoko ga phuthego, ba sala ba gakololana. ₁₆Ba re: “Banna ba, re tlaa ba dirang? Gonne le gale go a bonala mo bathong botlhe ba ba agileng mo Jerusalema, fa tiro e e gakgamatsang e e tumo kgolo e dirilwe ke bone; ga re ka ke ra go latola. ₁₇A re ba kgalemeleng gore ba se tlhole ba bua le motho ope mo ineng le, gore selo se, se se anamele mo bathong.”

₁₈Ba ba bitsa, ba ba laya gore ba se ka ba bua gope, le fa e le go ruta mo ineng la ga Jesu. ₁₉Petere le Johane ba ba fetola ba re: “E re fa go siame mo matlhong a Modimo go reetsa lona bogolo go go reetsa Modimo, a go atlhole lona; ₂₀gonne rona ga re na sepe fa e se go bua fela dilo tse re di bonyeng le tse re di utlwileng.” ₂₁Bone ya re ba sena go ba ba ba kgala, ba ba lesa, ka ba sa bone sepe sa ka fa ba ka ba betsang ka gone ka ntlha ya batho; gonne batho botlhe ba galaletsa Modimo ka ga se se dirilweng. ₂₂Gonne motho yo tiro e e gakgamatsang ya phodiso e dirilweng mo go ene, dinyaga tsa gagwe di ne di fetile 40.

₂₃Ya re ba sena go lesiwa ba tla kwa lesomong la bone, ba bolela tsotlhe tse ditlhogo tsa baperesiti le bagolwane ba di buileng nabo. ₂₄Bone ya re ba utlwa, ba tlhatloseletsa mantswe a bone gongwe kwa Modimong, ba re: “Morena, wena yo o dirileng legodimo le lefatshe le lewatle, le tsotlhe tse di mo go one; ₂₅yo o kileng wa bua ka Mowa o o Boitshepo, ka molomo wa ga rraetsho Dafite motlhanka wa gago, wa re:

₂₇“Gonne ammaaruri, Herote le Ponto Pilato, ba na le Baditšhaba le batho ba Iseraele, ba le mo motseng o, ba ne ba phuthegetse Jesu Motlhanka wa gago yo o boitshepo, yo o ne o mo tloditse, ₂₈go tla ba dira sengwe le sengwe se seatla sa gago le go rata ga gago go se laotseng gale gore se dirafale. ₂₉Jaana Morena, bona dipopo tsa bone; mme o neye batlhanka ba gago go bua lefoko la gago ka pelokgale yotlhe fela; ₃₀le wena o ntse o otlolola letsogo la gago go fodisa; o mme ditshupo le dikgakgamatso di dirwe ka leina la ga Jesu Motlhanka wa gago yo o boitshepo.”

₃₁E rile ba sena go rapela, felo fa ba phuthegetseng teng ga reketla; mme botlhe ba tlala Mowa o o Boitshepo, mme ba nna ba bua lefoko la Modimo ka pelokgale.

₃₂Bontsi jwa ba ba dumetseng ba bo ba le pelo nngwe fela le mowa mongwe fela; ga bo go se ope wa bone yo o reng sepe sa dilo tse o nang natso ke sa gagwe; mme dilo tsotlhe ba ne ba di tlhakanetse. ₃₃Baaposetole ba supa ka ga go tsoga ga Morena Jesu, ka nonofo e kgolo; mme tshegofatso e kgolo ya nna mo go bone botlhe. ₃₄Le gone ga bo go se ope mo go bone yo o tlhokang, gonne botlhe ba ba nang le masimo kgotsa matlo, ba a rekisa, mme ba tlisa madi a dilo tse di rekisitsweng. ₃₅Ba a baya fa dinaong tsa baaposetole; mme ga abelwa mongwe le mongwe ka fa o tlhokang ka gone.

₃₆Mme Josefe, yo o retilweng ke baaposetole ba re Barenabase, ke go re, Morwa kgomotso, fa go phuthololwa, e le Molefi, e le motho wa lefatshe la Kupero ka go tsalwa, ₃₇a bo a na le tshimo, mme a e rekisa, a tlisa madi, a a baya fa dinaong tsa baaposetole.