2 DIKGOSI 18

₁Jaana ga dirala e rile ka ngwaga wa boraro wa ga Hošea morwa Ela kgosi ya Iseraele, Hesekia morwa Ahase kgosi ya Juta a simolola go busa. ₂E rile a simolola go busa a bo a le dinyaga di le 25; mme a busa ka dinyaga di le 29 mo Jerusalema; leina la ga mmaagwe e ne e le Abi morwadia Sekaria. ₃A dira se se siameng mo matlhong a ga Jehofa, jaaka tsotlhe tse Dafite rraagwe o kileng a di dira. ₄A tlosa mafelo a a tlotlometseng, a thuba maje a a metloutlo, a rema Modimako, a thubaganya noga ya kgotlho e Moše o kileng a e dira; gonne bana ba Iseraele ba ne ba ntse ba tle ba e fisetse maswalo go tla go fitlha mo metlheng eo; ya rewa leina ga twe, Nehušetane. ₅O ne a ikanya Jehofa Modimo wa Iseraele; mme morago ga gagwe ga se ka ga nna le ope yo o tshwanang nae mo dikgosing tsotlhe tsa Juta, le fa e le mo go ba ba neng ba le pele ga gagwe. ₆Gonne a ngaparela Jehofa, ga a ka a kgaogana le go mo sala morago, a tshegetsa ditaolo tsa gagwe tse Jehofa o ne a di laoletse Moše. ₇Jehofa a nna nae; gongwe le gongwe kwa o ne a ya gone a segofala; a tsuololela kgosi ya Asiria a se ka a e direla. ₈A kgemetha Bafilisitia go ya go fitlha kwa Gasa le kwa melelwaneng ya gone, go tswa kagong e e godileng ya balebedi go ya motseng o o thekeleditsweng.

₉Jaana ga dirala e rile ka ngwaga wa bone wa kgosi Hesekia o e neng e le ngwaga wa bosupa wa ga Hošea morwa Ela kgosi ya Iseraele, Shalemanesere kgosi ya Asiria a bololela Samaria a o tlhasela. ₁₀E rile go sena go feta dinyaga di le tharo a o gapa; e bong ka ngwaga wa borataro wa ga Hesekia, o e neng e le ngwaga o o ferang o le mongwe wa ga Hošea kgosi ya Iseraele; Samaria wa gapiwa jalo. ₁₁Kgosi ya Asiria ya isa Baiseraele kwa Asiria, a ba baya mo Hala, le mo Habore fa nokeng ya Gosane, le mo metseng ya Bamete;

₁₂ka ba se ka ba ineela go utlwa lentswe la ga Jehofa Modimo wa bone, mme ba tlola kgolagano ya gagwe, e bong tsotlhe tse Moše motlhanka wa ga Jehofa o di laotseng, ba gana go di utlwa, le go di dira.

₁₃Jaana e rile ka ngwaga wa 14 wa kgosi Hesekia, Senakeribe kgosi ya Asiria a bololela metse yotlhe ya Juta e e thekeleditsweng, a e gapa. ₁₄Hesekia kgosi ya Juta a roma kwa kgosing ya Asiria kwa Lakiše a re: “Ke dirile molato; mpoela; se o se mpelesang ke tlaa se belega.” Kgosi ya Asiria ya laola gore Hesekia kgosi ya Juta a lefe ka dikilokerame tsa selefera di le 10 000, le dikilokerame tsa gouta di le 1 000. ₁₅Mme Hesekia a mo naya selefera sotlhe se se fitlhelwang mo ntlong ya ga Jehofa le mo dikhumong tsa ntlo ya kgosi. ₁₆E rile ka lobaka loo, Hesekia a kgaola gouta mo ditswalong tsa tempele ya ga Jehofa, le mo maotwaneng a Hesekia kgosi ya Juta o ne a di manegile, a e naya kgosi ya Asiria. ₁₇Kgosi ya Asiria a roma Taretane, le Rabe-sarise le Rabešake, kwa go kgosi Hesekia kwa Jerusalema ba tswa Lakiše, ba na le ntwa e kgolo. Ba ya ba fitlha kwa Jerusalema. E rile ba sena go fitlha, ba ya ba ema fa moseleng wa lekadiba le le godimo, o o mo tseleng e kgolo ya lotlhagare lwa motlhatswi wa matsela. ₁₈E rile ba sena go bitsa kgosi, Eliakime morwa Hilekia yo o ne a laola ntlo, a tswela kwa go bone, a na le Shebena mokwaledi, le Joa morwa Asafe wa mokwadi wa ditirafalo. ₁₉Rabešake a ba raya a re: “Rayang Hesekia lo re: ‘Kgosi e kgolo e bua jaana, e bong kgosi ya Asiria, ya re: Ana boikanyo ke bofe jo o ikantseng mo go jone? ₂₀Wa re: Go na le kgakololo le thata ya go tlhabana, mme e be e le mafoko a boithamako fela. Wa bo o kgantsha mang, fa e bo ne ne o ntsuololetse jaana? ₂₁Jaana bona, o ikantse seikokotlelo se, sa lotlhaka lo lo phitsegileng, e bong Egepeto; lo e tlaa reng fa motho a itshegeleditse ka lone, lo tsene mo seatleng sa gagwe, lo se tlhabe; Faro kgosi ya Egepeto o ntse jalo mo go botlhe ba ba mo ikanyang.

₂₂“ ‘Fa lo nthaya lo re: “Re ikanya Jehofa Modimo wa rona”; a ga se ene yoo yo mafelo a gagwe a a tlotlometseng le dibeso tse gagwe Hesekia o di tlositseng, mme a raya Juta le Jerusalema a re: “Lo obamele fa pele ga sebeso se se mo Jerusalema!” ’ ₂₃Ke gone jaana, ke a go rapela, neela mong wa me kgosi ya Asiria dipeelo, ke tlaa go naya dipitse di le 2 000 fa o ka nonofa ntlheng ya gago go di pega bapalami. ₂₄Fa e le foo, o ka fularisa jang sefatlhogo sa molaodi mongwe yo mmotlana mo batlhankeng ba mong wa me, wa ikanya Egepeto ka ga dikara le ka ga dipitse? ₂₅A jaana ke bololetse felo fa fela go tla ke go senya kwa ntle ga Jehofa? Aitse Jehofa o ntheile a re: ‘Bololela lefatshe le, o le senye.’ ”

₂₆Foo ga bua Eliakime morwa Hilekia le Shebena le Joa, ba raya Rabešake ba re: “Re a go rapela, a ko o bue le batlhanka ba gago ka puo ya Sesiria; gonne re a se tlhaloganya; o se ka wa bua le rona ka puo ya Sejuta mo tsebeng tsa batho ba ba mo godimo ga lorako.” ₂₇Rabešake a ba raya a re: “A mong wa me o nthomile kwa go mong wa gago le kwa go wena go tla ke bua mafoko a? A ga a a nthoma kwa bathong ba ba dutseng mo lorakong, go ba jesa mantle a bone le go ba nosa motlhapo wa bone le lona?”

₂₈Foo Rabešake a ema, a kua ka lentswe le legolo mo puong ya Sejuta, a bua a re: “Utlwang lefoko la kgosi e kgolo, kgosi ya Asiria. ₂₉Kgosi e bua jaana ya re: ‘A Hesekia a se lo tsietse; gonne ga a ketla a nonofa go lo golola mo seatleng sa gagwe. ₃₀Le gone a Hesekia a se lo ikanyise Jehofa ka gore: Ruri Jehofa o tlaa re golola, mme motse o ga o ketla o tsenngwa mo seatleng sa kgosi ya Asiria. ₃₁Lo se ka lwa reetsa Hesekia, gonne kgosi ya Asiria e bua jaana ya re: Itetlanyeng le nna, mme lo tle kwa go nna; a mongwe le mongwe wa lona a je mofine wa gagwe, le mongwe le mongwe mofeige wa gagwe, mme mongwe le mongwe a nwe metsi a ledu la gagwe. ₃₂Go tsamaya ke tla ke lo isa kwa lefatsheng le le tshwanang le la lona, lefatshe la mabele le bojalwa jwa mofine, lefatshe la senkgwe le la masimo a mafine, lefatshe la lookwane la matlhware le la dinotshe, gore lo tshele, e seng go swa; ka re, lo se ka lwa reetsa Hesekia fa a lo rapela, a re: Jehofa o tlaa lo golola. ₃₃A mongwe wa medimo ya merafe o kile wa golola lefatshe la one mo seatleng sa kgosi ya Asiria? ₃₄Medimo ya Hamathe e kae, le ya Arepata? Medimo ya Sefarefaime e kae, le ya Hena, le ya Ifa? A e golotse Samaria mo seatleng sa me? ₃₅E mang mo medimong yotlhe ya mafatshe e e golotseng lefatshe la ga yone mo atleng sa me, fa e bo ne ne Jehofa a tlaa golola Jerusalema mo seatleng sa me?’ ”

₃₆Batho ba didimala, ba se ka ba mo fetola ka lefoko lepe; gonne taolo ya kgosi e ne e le go re: “Lo se ka lwa mo fetola.” ₃₇Foo Eliakime morwa Hilekia yo o laolang ntlo, le Shebene mokwaledi, le Joa morwa Asafe, mokwadi wa ditirafalo, ba tla kwa go Hesekia ba ikgagotse diaparo, ba mmolelela mafoko a ga Rabešake.