Puso ya ga Hošea wa Iseraele
1E rile ka ngwaga wa 12 wa ga Ahase kgosi ya Juta, Hošea morwa Ela a simolola go busa Baiseraele mo Samaria, mme a busa ka dinyaga di 8. 2A dira se se bosula mo ponong ya ga Jehofa; le fa go ntse jalo e seng jaaka dikgosi tsa Iseraele tse di neng di le pele ga gagwe. 3Shalemanesere kgosi ya Asiria a mmololela; mme Hošea a tswa motlhanka wa gagwe, mme a isa dineo kwa go ene. 4Mme kgosi ya Asiria ya fitlhela kgolaganelo mo go Hošea; gonne o ne a romile batho kwa go So, kgosi ya Egepeto, a se ka a ntsha neo go e isa kwa kgosing ya Asiria, jaaka a tle a dire ka ngwaga le ngwaga; ka ntlha ya moo kgosi ya Asiria ya mo tswalela, ya mo golegela mo ntlong ya kgolegelo.
Go wa ga Samaria
5Foo kgosi ya Asiria ya tla ya farafara lefatshe lotlhe, ya fitlha kwa Samaria, ya nna ya tlhasela gone ka dinyaga di le tharo. 6E rile ka ngwaga o o ferang o le mongwe fela wa ga Hošea, kgosi ya Asiria ya gapa Samaria, ya isa Baiseraele kwa Asiria, ya ba baya mo Hala, le mo Habore, mo nokeng ya Gosane le mo metseng ya Bameta.
7Ga nna jalo, ka bana ba Iseraele ba leofetse Jehofa Modimo wa bone, yo o ba ntshitseng mo lefatsheng la Egepeto, mo seatleng sa ga Faro kgosi ya Egepeto, mme ba ineetse medimo e sele. 8Ba sepela mo melaong le mo mekgweng e merafe e e tlwaetseng, e le merafe e Jehofa o ne a e kgorometsa fa pele ga bana ba Iseraele le fa pele ga dikgosi tsa Iseraele. 9Bana ba Iseraele ba direla Jehofa Modimo wa bone dilo tse di sa siamang tsa tlhabang, ka go di bipa, ba ikagela mafelo a a tlotlometseng mo metseng yotlhe ya bone, go tswa kagong e e godileng ya balebedi go ya motseng o o thekeleditsweng. 10Ba itlhomela maje a a metloutlo le Medimako mo godimo ga thaba nngwe le nngwe le fa tlase ga setlhare sengwe le sengwe se setala. 11Ba fisetsa maswalo gone mo mafelong otlhe a a tlotlometseng, jaaka go ne go dira merafe e Jehofa o ne a e tlosa fa pele ga bone; ba dira dilo tsa boikepo go tlhotlheletsa Jehofa mo bogaleng. 12Ba direla medimo ya disetwa e Jehofa o buileng nabo ka ga yone, a re: “Lo se ka lwa dira selo se.”
13Le fa go ntse jalo Jehofa a naya Baiseraele le Bajuta tshupo ka moperofeti mongwe le mongwe, le ka molebi mongwe le mongwe, a re: “Sokologang mo ditseleng tsa lona tse di bosula, lo tshegetse ditaolo tsa me, le ditao tsa me, ka fa taolong yotlhe e ke e laoletseng borraeno, le e ke e isitseng kwa go lona ka batlhanka ba me baperofeti.” 14Mme le fa go ntse jalo ba gana go utlwa, ba ithatafatsa dithamo, jaaka dithamo tsa borraabo, ba ba neng ba sa dumele mo go Jehofa Modimo wa bone. 15Ba gana melao ya gagwe, le kgolagano e o ne a e dirile le borraabo, le ditshupo tse o ne a di ba supetsa; ba latela boithamako, ba nna bofafalele, ba etsa merafe e e mo tikologong ya bone, e Jehofa o ne a ba laile ka ga yone, a re, ba se ka ba dira jaaka yone. 16Ba latlha ditaolo tsotlhe tsa ga Jehofa Modimo wa bone, ba itirela ditshwantsho tse di thetsweng, e bong dinamane di le pedi, ba dira Modimako, ba obamela bontsi jotlhe jwa legodimo, ba direla Baale. 17Bomorwa bone, le bomorwadia bone ba ba ralatsa molelo, ba dira ka boitsejwanape le ka mereo, ba ithekisetsa go dira se se bosula mo ponong ya ga Jehofa, go mo tlhotlheletsa mo bogaleng. 18Ke gone ka moo Jehofa a nna bogale thata le Baiseraele, a ba tlosa mo ponong ya gagwe; go ne go sa sala ope fa e se lotso lwa Juta lo le losi fela.
19Le Bajuta ga ba a ka ba tshegetsa ditaolo tsa ga Jehofa Modimo wa bone, mme ba sepela mo ditaolong tsa Baiseraele tse ba di dirileng. 20Jehofa a gana losika lotlhe lwa Baiseraele, a ba utlwisa botlhoko, a ba tsenya mo seatleng sa bathopi, ga tsamaya a ba kgorometsa ba tswa mo ponong ya gagwe.
21Gonne o ne a rutlile Baiseraele mo ntlong ya ga Dafite; mme ba dira Jeroboame morwa Nebate kgosi; Jeroboame a faposa Baiseraele mo go saleng Jehofa morago, a ba a ba leofisa boleo jo bogolo. 22Bana ba Iseraele ba sepela mo maleong otlhe a ga Jeroboame a o ne a a dira; ga ba a ka ba fapoga mo go one; 23ga tsamaya Jehofa a tlosa Baiseraele mo ponong ya gagwe, jaaka a ne a bua ka batlhanka botlhe ba gagwe baperofeti. Jalo Baiseraele ba tlosiwa mo lefatsheng la bone, ba sa le ba isiwa kwa Asiria, nako e ntse ke eno.
Baasiria ba thibelela mo Iseraele
24Kgosi ya Asiria ya tsaya batho kwa Babilone, le kwa Kuthe, le kwa Afa, le kwa Hamatha le kwa Sefarefaime, a ba baya mo metseng ya Samaria mo boemong jwa bana ba Iseraele; mme ba rua Samaria ba aga mo metseng ya gone. 25Ga dirala ya re mo tshimologong ya go aga ga bone gone, ba bo ba sa boife Jehofa; ke gone ka moo Jehofa a tlisa ditau mo go bone, tsa bolaya bangwe ba bone. 26Ke gone ka moo batho ba bua le kgosi ya Asiria ba re: “Merafe e o e tlositseng wa e baya mo metseng ya Samaria ga e itse mokgwa wa Modimo wa lefatshe; ke gone ka moo o lerileng ditau mo go bone; mme bonang, dia ba bolaya ka ba sa itse mokgwa wa Modimo wa lefatshe.” 27Foo kgosi ya Asiria ya laola ya re: “Isang gone mongwe wa baperesiti ba lo tswang go ba tsaya gone; a ba ye go aga gone, mme a a rute batho mokgwa wa Modimo wa lefatshe.” 28Mongwe wa baperesiti ba ba tlositsweng kwa Samaria a tla a aga mo Bethele, a ba ruta ka fa ba tlaa boifang Jehofa ka gone. 29Le fa go ntse jalo morafe mongwe le mongwe o no wa itirela medimo ya yone, wa e tsenya mo matlong a mafelo a a tlotlometseng a Basamaria ba a dirileng, morafe mongwe le mongwe mo metseng ya yone e ba agileng mo go yone. 30Banna ba Babilone ba dira Sukothe-benothe, le banna ba Kuthe ba dira Neregale, le banna ba Hamathe ba dira Ašima, 31Baafa ba dira Nibefatse le Taratake, mme Basefarefa ba fisa bana ba bone mo molelong, ba ba fisetsa Atarameleke le Anameleke medimo ya Sefarefaime. 32Jalo ba direla Jehofa, ba itirela baperesiti ba ba ga bone, ba mafelo a a tlotlometseng, ba ba ba isetsa ditlhabelo mo matlong a mafelo a a tlotlometseng. 33Ba ne ba boifa Jehofa mme ba direla e e leng medimo ya bone, ka fa mokgweng wa merafe e ba tlositsweng mo go yone.
34Nako e sa le eno ba ntse ba dira jaaka mekgwa ya pele; ga ba boife Jehofa le gone ga ba dire jaaka ditao tsa bone, le fa e le jaaka ditaolelo tsa bone tse di tlhomameng, le fa e le jaaka molao le taolo tse Jehofa o ne a di laolela bana ba ga Jakobe, yo o ne a mo raya leina la Iseraele; 35yo Jehofa o ne a dira kgolagano nae, a ba laya a re: “Lo se ka lwa boifa medimo e sele, le fa e le go e ikobela, le fa e le go e direla, lefa e le go e isetsa tlhabelo. 36Mme Jehofa yo o lo ntshitseng mo lefatsheng la Egepeto ka thata e kgolo, le ka letsogo le le otlologileng, lo boife ene, lo ikobele ene, lo isetse ene tlhabelo; 37le ditao, le taolelo, le molao le taolo tse o ne a di lo kwalela, lo tlhokomele go di dira ka bosakhutleng; lo se ka lwa boifa medimo e sele. 38Kgolagano e ke e dirileng le lona, lo se ka lwa e lebala; le gone lo se ka lwa boifa medimo e sele; 39lo boife Jehofa Modimo wa lona; mme o tlaa lo golola mo seatleng sa baba botlhe ba lona.” 40Le fa go ntse jalo, ga ba a ka ba reetsa, mme ba dira jaaka mokgwa wa bone wa pele.
41Jalo merafe eo ya boifa Jehofa, ya ba ya direla ditshwantsho tsa bone tse di setilweng; le bana ba bone le bana ba bana ba bone, jaaka borraabo ba dirile le bone ba dira jalo, nako e sa le eno.
