2 DITIRAFALO 21

₁Jehošafate a robala le borraagwe, mme a fitlhwa le borraagwe mo motseng wa ga Dafite; mme Jehorame morwawe a busa mo boemong jwa gagwe.

₂O ne a na le bomonnawe bomorwa Jehošafate, e bong Asaria, le Jehiele, Sekaria, le Asaria, le Mikaele le Shafatia; boa botlhe e le bomorwa Jehošafate kgosi ya Iseraele. ₃Rraabo a ba tshwaela a ba naya dineo tse dikgolo, tsa selefera, le tsa gouta le tsa dilo tse di tlhokegang, le metse e e thekeleditsweng mo Juta; mme bogosi jone a bo naya Jehorame, ka e le ene motsalwapele. ₄Jaana e rile Jehorame a le mo bogosing jwa ga rraagwe, a ithatafaditse, a bolaya bomonnawe botlhe ka tšhaka, le bangwe ba dikgosana tsa Iseraele.

₅Jehorame o rile a simolola go busa a bo a le dinyaga di le 32; mme a busa ka dinyanga di 8 mo Jerusalema. ₆Mme a sepela mo tseleng ya dikgosi tsa Iseraele jaaka ba ntlo ya ga Ahabe ba ne ba dira; gonne o ne a nyetse morwadia Ahabe, mme a dira se se bosula mo matlhong a ga Jehofa. ₇Mme Jehofa a gana go senya ntlo ya ga Dafite ka ntlha ya kgolagano e o kileng a e dira le Dafite, le jaaka a mo solofeditse, go re o tlaa naya ene le bana ba gagwe lobone ka metlha yotlhe.

₈E rile mo metlheng ya ga Jehorame Baetome ba tsuololela Bajuta, ba itirela kgosi ya bone. ₉Foo Jehorame a kgabaganya a na le balaodi ba gagwe ba mephato, le dikara tsotlhe tsa gagwe di na nae; a tsoga bosigo a kgemetha Baetome ba ba mo dikanyeditseng, le balaodi ba dikara. ₁₀Jalo Baetome ba sa le ba tsuololela Juta ba tswa taolong ya bone nako ke eno. Balibena le bone ba mo tsuololela ka lone lobaka loo, ka gobo o ne a latlhile Jehofa, Modimo wa borraagwe. ₁₁Gape o ne a dira mafelo a a tlotlometseng mo dithabeng tsa Juta, a akafadisa banni ba Jerusalema, a timetsa Bajuta.

₁₂Mme ga tla lokwalo kwa go ene lo tswa mo go Elija moperofeti, lwa re: “Jehofa o bua jaana, Modimo wa ga Dafite rraago, a re: ‘E re ka o se ka wa sepela mo ditseleng tsa ga Jehošafate rraago, le fa e le mo ditseleng tsa ga Asa kgosi ya Juta, ₁₃mme o sepetse mo tseleng ya dikgosi tsa Iseraele, o akafaditse Bajuta le banni ba Jerusalema, go bile go tshwana jaaka go dirile ba ntlo ya ga Ahabe; gape o bolaile bomonnao ba ntlo ya ga rraago ba ba neng ba go gaisa ka molemo: ₁₄Bona, Jehofa o tlaa itaya batho ba gago ka sebetso se segolo, le bana ba gago, le basadi ba gago, le dilo tsa gago tsotlhe fela. ₁₅O tlaa bona bolwetse jo bogolo ka botlhoko jwa mala, go tsamaya mala a gago a wela kwa ntle ka ntlha ya bolwetse, ka gale le ka gale.’ ”

₁₆Jehofa a tsosetsa Jehorame mowa wa Bafilisitia, le wa Baarabia ba ba bapileng le Baethiopia. ₁₇Mme ba bololela lefatshe la Juta, ba thobela mo go jone ka thata, ba tlosa thoto yotlhe e e fitlhetsweng mo ntlong ya kgosi, le bomorwawe, le basadi ba gagwe; a ba a tla a se ka a salelwa ke ngwana ope wa mosimane, fa e se Jehoahase, yo mmotlana wa bomorwawe.

₁₈Morago ga moo gotlhe, Jehofa a mo itaya mo maleng ka botlhoko jo bo se nang kalafo. ₁₉Ga dirala ya re motlha mongwe, go sena go feta dinyaga di le pedi mala a gagwe a wela kwa ntle ka ntlha ya bolwetse jwa gagwe, mme a swa ka matlhoko a a thata. Mme batho ba gagwe ba se ka ba mo direla phisetso e e etsang phisetso ya borraagwe.

₂₀O rile a simolola go busa a bo a le dinyaga di le 32, mme a busa mo Jerusalema ka dinyaga di fera mebedi; a swa a sa elediwe ke ope; mme ba mo fitlha mo motseng wa ga Dafite, mme e seng mo diphupung tsa dikgosi.