Ntwa ya ga Etome le Juta
1Ga dirala ya re morago ga moo, bana ba Moabe, le bana ba Amone, le bangwe ba Bameuni ba na nabo, ba bololela Jehošafate ba tla go tlhabana nae. 2Foo ga tla bangwe ba ba bolelelang Jehošafate, ba re: “Go tla bontsi jo bogolo jwa batho go tlhabana nao, ba tswa moseja ga lewatle kwa Siria; mme bona, ba mo Hasasone-tamare” (ke one Enegedi). 3Jehošafate a boifa, mme a ineela mo go batleng Jehofa, a laola gore go ikidiwe dijo go ya le lefatshe lotlhe la Juta. 4Mme Bajuta ba phuthega, ba tla go senka thuso mo go Jehofa, ba tswa fela mo metseng yotlhe ya Juta, ba tla go senka Jehofa. 5Jehošafate a ema mo phuthegong ya ba Juta le ba Jerusalema, mo ntlong ya ga Jehofa, fa pele ga lolwapa lo loša; 6mme a re: “Jehofa Modimo wa borraetsho, a ga o Modimo kwa legodimong? A ga o molaodi wa magosi otlhe a merafe? Mo seatleng sa gago go thata le nonofo, mme go se na ope yo o ka emang fa pele ga gago. 7Wena Modimo wa rona, a ga o a leleka banni ba lefatshe leno fa pele ga Baiseraele batho ba gago, lefatshe wa le naya losika lwa ga Aberahame, tsala ya gago, ka bosakhutleng. 8Ba aga mo go lone, ba bile ba go agetse felo ga boitshepo ga leina la gago mo go lone, ba re: 9‘Fa bosula bo tla mo go rona, tšhaka, tshekiso, kgotsa kgogodi, kgotsa leuba, re tlaa ema fa pele ga ntlo e, le fa pele ga gago (gonne leina la gago le mo ntlong e,) re tlaa biletsa kwa go wena mo pitlaganong ya rona, mme o tlaa utlwa o boloka.’
10“Mme jaana bona, bana ba Amone le ba Moabe le ba thaba ya Seira, ba o ganneng, wa re Baiseraele ba se ka ba ba tlhasela, jale ka ba tswa lefatsheng la Egepeto, mme ba ba fapoga, ba se ka ba ba senya; 11bona jaaka ba re duela, ba tla go re ntsha mo bosweng jwa gago, jo o bo re neileng go bo rua. 12Modimo wa rona a ga o ketla o ba sekisa? Gonne rona ga re na thata ya go tlhabana le lesomo le legolo le le re bololetseng; le gone ga re itse se re ka se dirang; mme matlho a rona a koo go wena.”
13Bajuta botlhe ba ema fa pele ga Jehofa ba na le banyana ba bone, le basadi ba bone, le bana ba bone. 14Foo ya re mo gare ga phuthego, mowa wa ga Jehofa wa tla mo go Jahasiele Molefi, wa bomorwa Asafe, e bong mo go Jahasiele morwa Sekaria morwa Benaia morwa Jeiele morwa Matania; 15mme a re: “Reetsang lona lotlhe Bajuta, le lona banni ba Jerusalema, le wena kgosi Jehošafate; Jehofa o lo raya jaana, a re: ‘Lo se ka lwa boifa, le gone lo se ka lwa rerega ka ntlha ya bontsi jo bogolo jo; gonne tlhabano ga se ya lona, ke ya Modimo. 16E re ka moso lo bolole lo ye go tlhabana nabo; bona, ba tlhatloga ka fa botlhatlogong jwa Sise; lo tlaa ba fitlhela kwa sekhutlong sa molapo, bolebagana le naga ya Jeruele. 17Ga go ketla go batlwa gore lo tlhabane mo tlhabanong e; lo ikemiseng lo eme fela, mme lo bone poloka ya ga Jehofa e e nang le lona, lona ba Juta le ba Jerusalema.’ Lo se ka lwa boifa, lo bo lo se rerege; e re ka moso lo bolole lo ye go tlhabana nabo; gonne Jehofa o na le lona.”
18Jehošafate a ikoba tlhogo, a ikisa fa fatshe ka sefatlhogo, le Bajuta botlhe le banni ba Jerusalema ba wela fa pele ga Jehofa, ba obamela Jehofa. 19Balefi ba bana ba Makohathe le ba bana ba Bakora, ba ema ba baka Jehofa, Modimo wa Iseraele, ka lentswe le le tsholetsegileng thata.
20Ka moso ba phakela ba bololela kwa nageng ya Tekoa; mme ya re ba tswa, Jehošafate a ema, a re: “Nkutlwang lona Bajuta, le lona banni ba Jerusalema; lo dumeleng mo go Jehofa Modimo wa lona, jalo lo tlaa tlhomamisiwa; dumelang baperofeti ba gagwe, jalo lo tlaa tlhogonolofala.” 21O rile a sena go gakololana le batho, a tlhoma bone ba ba tlaa opelelang Jehofa, ba baka bontle jwa boitshepo, gore e re ba tsamaya fa pele ga ntwa, ba re: “Bakang Jehofa, gonne boutlwelobotlhoko jwa gagwe bo eme ka bosakhutleng.”
22Ya re ba simolola go opela le go baka, Jehofa a beela bana ba Amone balaledi, le ba Moabe le ba thaba ya Seire, ba ba tsileng go tlhabana le Bajuta; mme ba kgemethwa. 23Gonne bana ba Amone le ba Moabe ba nanoga ba tlhabana le bana ba thaba ya Seire go tla ba bolaya le go ba lailela ruri; e rile ba sena go fetsa banni ba Seire, ba tloga ba menogana ba senyana. 24E rile Bajuta ba tla kagong ya tebelo ya naga, ba leba bontsi jwa batho; mme bonang, ya bo e le ditoto-toto fela tse di wetseng fa fatshe, go se na ope yo o falotseng.
25E rile Jehošafate le batho ba gagwe ba tla go tsaya thopo ya bone, ba fitlhela mo go bone letlotlo la dikhumo le diaparo, le mekgabo e e thata go rekwa, ba di itlosetsa mo go bone, go feta mo ba ka go rwalang, mme ga feta malatsi a le mararo ba ntse ba rora thopo, e ne e le kgolo thata. 26Ya re ka letsatsi la bone ba phuthega mo molapong wa Beraka, gonne ke gone kwa ba ne ba baka Jehofa gone; ke gone ka moo felo foo ga rewa leina ga twa, Molapo wa Beraka, nako e sa le eno. 27Foo ba bowa, motho mongwe le mongwe wa Juta le wa Jerusalema, Jehošafate a le fa pele ga bone, ba ya gape kwa Jerusalema ka boitumelo; gonne Jehofa a ba itumedisitse ka ga baba ba bone. 28Ba fitlha Jerusalema ka disaletere le diharepe le dinaka mo ntlong ya ga Jehofa. 29Poifo ya Modimo ya nna mo magosing otlhe a mafatshe ka, ba utlwa fa Jehofa a tlhabanye le baba ba Iseraele. 30Bogosi jwa ga Jehošafate jwa bona boiketlo, gonne Modimo wa gagwe o ne wa mo naya boikhutso mo tikologong yotlhe.
Bokhutlo jwa puso ya ga Jehošafate
31Jehošafate a busa Bajuta: O rile a simolola go busa a bo a le dinyaga di le 35. A busa ka dinyaga di le 25 mo Jerusalema. Leina la ga mmaagwe e ne e le Asuba morwadia Shilihi. 32A sepela mo tseleng ya ga Asa rraagwe, a se ka a e fapoga, a ntse a dira se se siameng mo matlhong a ga Jehofa. 33Le fa go ntse jalo mafelo a a tlotlometseng ga a ka a tlosiwa; le gone batho ba ne ba ise ba itlhomamise dipelo mo Modimong wa borraabo.
34Jaana ditiro tse dingwe tsa ga Jehošafate tsa ntlha le tsa morago, bonang, di kwadilwe mo mafokong a ga Jehu morwa Hanani, a a tsentsweng mo lokwalong lwa dikgosi tsa Iseraele.
35Morago ga moo Jehošafate kgosi ya Juta a ikopanya le Ahasia kgosi ya Iseraele; ene yo o ne a dira ka boikepo jo bogolo. 36A ikopanya nae go tla ba dira dikepe tse di ka yang Tarešiše; mme ba dira di kepe mo Esione-gebere. 37Foo Eliesere morwa Dotafahu wa Mareša a bolela ka ga Jehošafate, a re: “E re ka o ikopantse le Ahasia, Jehofa o sentse ditiro tsa gago.” Mme Dikepe tsa thubega, tsa ba tsa retelelwa ke go ya Tarešiša.
